Isaias 49 - Marahay na Bareta Biblia

An Israel, Sarong Ilaw para sa mga Nasyon

¹ Pagdangog kamo sako, harayong mga nasyon, kamong mga tawong nag-eerok sa harayong lugar! Bago ako namundag, pinili na ako nin Kagurangnan asin itinalaan nang magin saiyang sorogoon.

² Ginibo niyang matarom siring sa espada an sakong mga tataramon. Sa lindong kan saiyang kamot iningatan niya ako. Ginibo niya ako siring sa sarong bosog, na mapanas asin andam na gamiton.

³ Sinabihan niya ako, “Israel, sorogoon taka; huli saimo, oomawon ako nin mga tawo.”

⁴ Alagad nagsabi ako, “Mayong pakinabang an sakong kapagalan! Mayo na akong kosog, alagad mayo man akong naginibohan.” Alagad totoong nasa Kagurangnan an sakong katanosan, asin nasa Dios an sakong balos.

⁵ Bago ako namundag pinili na ako nin Kagurangnan; ginibo akong sorogoon niya nganing ibalik an mga nagkawararak na tawo nin Israel. Tinatawan ako nin kaomawan kan Kagurangnan; an sakong kosog saiya minagikan.

⁶ Sinabihan ako nin Kagurangnan, “Igwa ako nin mas mahalagang trabaho para saimo, sakong sorogoon. Bako sanang ibabalik mo an kadakulaan kan natadang mga Israelita, kundi gigibohon takang sarong ilaw para sa mga nasyon— tanganing makaligtas an bilog na kinaban.”

⁷ An banal na Dios nin Israel asin paraligtas nagsasabi sa pinagduhagi nin makuri, sa naoongisan kan mga nasyon asin sorogoon kan gabos na namamayo. “Talingkas kang mahihiling kan mga hade asin matindog sinda sa pagtaong galang saimo; mahihiling man iyan kan mga prinsipe asin maduruko sinda sa pag-omaw saimo.” Mangyayari iyan huli ta an Kagurangnan iyo an nagpili kan saiyang sorogoon; inootob kan banal na Dios nin Israel an saiyang mga panuga.

An Paghirahay sa Jerusalem

⁸ An Kagurangnan nagsasabi sa saiyang banwaan, “Pag-abot kan panahon sa pagligtas saimo, mawiwilihan taka asin sisimbagon ko an saimong agrangay. Babantayan saka iingatan taka, asin sa paagi mo makikipagtipan ako sa gabos na banwaan. Papaerokon taka giraray sa saimong daga na ngunyan raot.

⁹ Sasabihan ko an mga bilanggo, ‘Puli na kamo!’ asin an mga nasa kadikloman, ‘Luwas kamo digdi sa liwanag!’ Makakaarog sinda sa mga karnero na nagsasabsab sa kabubuldan;

¹⁰ dai na nanggad sinda magugutom o mapapaha. Dai na sinda maaano kan saldang asin kan init kan desyerto, huli ta papangenotan sinda kan namomoot sainda. Dadarahon niya sinda sa mga burabod nin tubig.

¹¹ “Magibo ako nin tinampo sa kabukidan asin maandam ako nin dalan na aagihan kan sakong banwaan.

¹² Maabot an sakong banwaan hale sa harayong lugar, hale sa amihan saka sa solnopan, asin hale sa Aswan sa habagat.”

¹³ Pag-awit, kalangitan! Pagkurahaw sa kaogmahan, kinaban! Mag-arawit logod an kabukidan! Huli ta rarangahon nin Kagurangnan an saiyang banwaan; maheherakan niya an nagtitios niyang banwaan.

¹⁴ Alagad nagsabi an mga taga Jerusalem, “Pinabayaan na kita nin Kagurangnan! Nalingawan na niya kita!”

¹⁵ Kaya nagsisimbag an Kagurangnan, “Malilingawan daw nin sarong ina an saiyang aki? Dai daw niya mamomotan an omboy na saiyang ipinangidam? Alagad maski malingawan pa nin sarong ina an saiyang aki, dai ko nanggad kamo malilingawan!

¹⁶ Jerusalem, dai taka nanggad malilingawan! Isinurat ko sa sakong mga palad an saimong ngaran.

¹⁷ “An mga mahirahay saimo madali nang dumatong, asin maharale na an mga nagraot saimo.

¹⁸ Mangalagkalag ka asin hilinga an nangyayari! Nagtitiripon na an saimong banwaan—mapuruli na sinda! Siring na ako an Dios na buhay ipag-oorgulyo mo an saimong banwaan, siring na ipinag-orgulyo nin sarong nobya an saiyang mga alahas.

¹⁹ “Totoong rinaot an saimong daga—alagad iyan magigin sadit na para sa mga tawong nagdadangadang nganing mag-erok diyan. Asin an mga nagraot saimo magigin harayo nin marahay saimo.

²⁰ Sarong aldaw masabi saimo an mga tawong nagkamurundag kan panahon nin pagkatapokan, ‘Sadit nang marahay an dagang ini— kaipuhan nyato an dakulang lugar na eerokan!’

²¹ Dangan magsasaboot kang, ‘Siisay an nangaki kan gabos na ini para sako? Nagkagaradan na an sakong mga aki asin dai na ako pwedeng mangaki. Itinapok ako asin isinubol sa harayo— siisay an nagpadakula kan kaakian na ini? Ako na sana an natada— saen naghale an mga aki na ini?’”

²² Nagsasabi an Kagurangnan Dios sa saiyang banwaan, “Uya, iiitaas ko an sakong kamot sa mga nasyon, asin iiitaas ko an sakong tanda sa mga banwaan; dangan dadarahon nindang papuli an saindang mga aking lalaki sa saindang daghan, saka an saindang mga aking babae sa saindang mga abaga.

²³ An mga hade magigin garo mga ama nindo; an mga reyna garo mga ina nindo. Maduruko sinda sa atubang nindo asin oomawon ninda kamo; mapakumbaba na ipapahiling ninda an paggalang saindo. Dangan maaaraman nindo na ako an Kagurangnan; dai mapapasopog an siisay man na naghahalat kan sakuyang tabang.”

²⁴ Maaagaw mo daw an sinamsaman nin sarong soldados? Ikakaligtas mo daw an mga nabihag kan makuring mananakop?

²⁵ Nagsisimbag an Kagurangnan, “Maaagaw maski an mga nabihag kan mga soldados, asin maaagaw an sinamsaman kan makuring mananakop. Lalabanan ko an nakikilaban saindo asin ililigtas ko an mga aki nindo.

²⁶ Gigibohon ko na maggaradanan an mga nang-aapi saindo, asin mabuburat sinda sa sadiri nindang dugo arog sa pagkaburat sa arak. Dangan maaaraman kan katawohan na ako an Kagurangnan, an nagliligtas asin nagpapatalingkas saindo. Maaaraman ninda na ako iyo an mapangyaring Dios nin Israel.”