Isaias 48 - Marahay na Bareta Biblia

An Dios iyo an Kagurangnan kan Maabot na Panahon

¹ Dangoga nindo ini, banwaan nin Israel, kamo na naggikan ki Juda: Minasumpa kamo sa ngaran kan Kagurangnan asin minasabing sinasamba nindo an Dios nin Israel— alagad bakong tudok sa puso nindo an saindong sinasabi.

² Alagad nag-oorgulyo kamo sa pagsabi na mga namamanwaan kamo kan banal na syudad, asin nananarig kamo sa Dios nin Israel, na Kagurangnan nin mga hukbo an ngaran.

³ Nagsasabi an Kagurangnan sa Israel, “Kaidtong panahon hinulaan ko an mangyayari; dangan sa madali, pinangyari ko iyan.

⁴ Huli ta aram ko na magigin matagas an saindong mga payo, arog katagas sa lansang asin arog sa bronse na dai nahihiro.

⁵ Kaya hinulaan ko an mga mangyayari saindo kaidto pang panahon, ipinahayag ko an mga mangyayari bago iyan nagkatotoo, tanganing dai kamo makapagsabi na iyan pinapangyari kan saindong mga dios-dios saka mga ladawan.

⁶ “An gabos kong sinabi nangyari na ngunyan; kaipuhan akoon nindong totoo an sakong mga hula. Ngunyan sasabihan ko kamo dapit sa mga bagay na maabot pa, mga bagay na dai ko pa ipinahayag kaidto.

⁷ Ngunyan ko pa sana pinapangyari an mga iyan; mayo pang arog kaini na nangyari kaidto. Kun nangyari na iyan kaidto, sasabihon nindong aram nindo an gabos na iyan.

⁸ Aram kong dai kamo pwedeng paniwalaan, asin poon sa pagkamundag inapod na kamong mga matumang. Iyan an dahelan kun tadaw ta dai pa nindo nadangog an siring kaini, kun tadaw ta dai pa saindo kaiyan nin nakapagsabi.

⁹ “Huli sa sakong ngaran pinugol ko an sakong kaanggotan, huli sa sakong kaomawan pinugol ko iyan para saindo; pinugol ko iyan tanganing dai ko kamo mapuho.

¹⁰ Binalo ko kamo sa kalayo nin pagtios, siring na an plata linilinig sa horno. Alagad nakua ko kamong mayo nin halaga.

¹¹ Huli sa sako man sana, ginigibo ko iyan— dai ko itutugot na pagbasang-basangon an sakong ngaran o na may makihiras kan sakong kamurawayan, na para sa sako nanggad sana asin bakong sa kiisay pa man.”

Si Ciro, an Lider na Pinili nin Kagurangnan

¹² Nagsasabi an Kagurangnan, “Magdangog ka sako, Israel, banwaan na sakong inapod! Ako an Dios, an enot, an huri, an iyo sanang Dios!

¹³ An sakong kamot an nagbugtak kan pundasyon kan kinaban asin an nagbiklad kan kalangitan. Kun inaapod ko an kinaban saka an kalangitan, minadatong sinda tolos asin minatindog sa sakong atubang.

¹⁴ “Kamo gabos, pagtiripon asin paghinanyog! Maski saro sa mga dios-dios dai makakahula na an lalaking sakong pinili iyo an masalakay sa Babilon; gigibohon niya an sakong ipinapagibo.

¹⁵ Ako an nagtaram asin an nag-apod saiya; ako an nangenot asin an nagtao nin kapangganahan saiya.

¹⁶ “Ngunyan dumolok kamo sako asin dangoga an sakong sinasabi. Poon sa kapinonan dai ako nagtaram sa hilom, asin pinapangyari ko an sakong mga tataramon.” (Asin ngunyan itinao sako nin Kagurangnan Dios an saiyang kapangyarihan dangan sinugo niya ako.)

An Plano nin Kagurangnan para sa Saiyang Banwaan

¹⁷ An banal na Dios nin Israel, an Kagurangnan na nagliligtas saimo, nagsasabi: “Ako an Kagurangnan na saimong Dios, an boot na magtukdo saimo para sa saimong karahayan asin an mangengenot saimo sa dalan na saimong lalakawan.

¹⁸ “Kun saimo sanang dinangog an sakong katogonan siring kutana sa sarong salog an saindong katoninongan, asin siring sa mga alon nin dagat an saindong katanosan!

¹⁹ Siring kutana kadakul sa baybay kan dagat an saindong kapagarakian, asin dai nanggad sinda mapupuho o matutunaw sa sakong atubang.”

²⁰ Maghale kamo sa Babilon, magdulag kamo! Maogma nindong ikurahaw an bareta; ipasabot iyan saen man na lugar: “Ilinigtas nin Kagurangnan an Israel na saiyang sorogoon!”

²¹ Kan pangenotan nin Kagurangnan an saiyang banwaan sa sarong mainit asin mamarang desyerto, dai sinda nagtios nin paha. Pinaluwas niya an tubig sa gapo para sainda; binanga niya an gapo, asin nagbulos an tubig.

²² “Mayo nin kaligtasan para sa mga parakasala,” an sabi nin Kagurangnan.