Isaias 41 - Marahay na Bareta Biblia

Tinawan nin Dios nin Kasigurohan an Israel

¹ Nagsabi an Dios, “Pag-alo kamo asin pagdangog sako, kamo na mga harayong daga! Mag-andam kamo sa pagdara kan saindong kaso sa hukoman; tatawan kamo nin panahon na magtaram. Magtiripon kita tanganing maaraman ta kun siisay an tama.

² “Siisay an nagdara kan parasakop hale sa sirangan, asin nagtataong kapangganahan saiya saen man siya magduman? Siisay an nagtatao saiya nin kapangganahan laban sa mga hade saka sa mga nasyon? Sa wasiwas kan saiyang espada, nagkakawararak sindang garo alpog, asin huli kan saiyang mga bosog, nagkakawararak sindang arog sa dagaming ipinapalid kan doros.

³ Linalamag niya sinda asin ligtas siyang minaagi; marikas siya nin marahay na garong dai nagduduta sa daga an mga bitis niya!

⁴ Siisay an nagboot na mangyari an siring? Siisay an nagplano kan kasaysayan nin mga henerasyon? Ako, an Kagurangnan, yaon duman sa kapinonan, asin ako, an Kagurangnan, magigin yaon duman sa kataposan.

⁵ “An mga tawo sa hararayong mga daga nakahiling kan sakong ginibo, kaya pinagtarakigan sinda sa takot. Nagtiripon sinda asin nagdirigdi sinda gabos.

⁶ Nagtatarabangan an mga panday asin pinapakosog ninda an boot kan lambang saro.

⁷ Nagsasabi an karpintero sa alahero, ‘Marahay an saimong ginigibo! An lalaking naglilinig kan ladawan nagpapakosog kan boot kan lalaking nagbibilog kaiyan. Nagsasabi sinda, ‘Marahay an pakasolda’— dangan ipinapako ninda an ladawan sa pamumugtakan kaiyan.

⁸ “Alagad ika, Israel, na sakong sorogoon, ika an banwaan na sakong pinili, an kapagarakian ni Abraham, na sakong katood.

⁹ Kinua taka hale sa mga poro kan daga; inapod taka hale sa pinakaharayong mga kanto kaini asin sinabihan, ‘Ika an sakong sorogoon.’ Dai taka isinikwal kundi pinili.

¹⁰ Dai ka matakot—kaiba mo ako! Ako an saimong Dios—dai ka dapat matakot sa anoman! Papakosogon taka asin tatabangan; iingatan taka asin ililigtas.

¹¹ “Mamamatean kan mga naaanggot saimo an sosog nin pagkadaog. An mga nakikilaban saimo magagadan

¹² asin mawawara sa daga.

¹³ Ako an Kagurangnan na saimong Dios; pinapakosog taka asin sinasabihan, ‘Dai ka matakot; tatabangan taka.’”

¹⁴ Nagsasabi an Kagurangnan, “Maski sadit asin maluya ka, Israel, dai ka matakot; tatabangan taka. Ako, an banal na Dios nin Israel, iyo an nagliligtas saimo.

¹⁵ Gigibohon takang siring sa sarong ginikan, na igwang bago saka matarom na mga ngipon. Giginikon mo an kabukidan asin roronoton mo sinda; magigin alpog an kabubuldan.

¹⁶ Papatoronon mo sinda; dadarahon sinda kan doros sa harayo, asin iwawarak sinda kan bagyo. Dangan magigin maogma ka huli ta ako an saimong Dios; oomawon mo ako, an banal na Dios nin Israel.

¹⁷ “Kun an sakong banwaan maghanap nin tubig dangan mayong makua, kun magmara an saindang halonan sa paha, ako, an Kagurangnan, an masimbag sainda; ako, an Dios nin Israel, dai nanggad mapabaya sainda.

¹⁸ Gigibohon kong magbulos an mga salog sa mga bulod na mayo nin mga kahoy asin magbulos an mga burabod nin tubig sa mga kapantayan. Gigibohon ko na an desyerto magin mga sapa nin tubig asin an mamarang daga magin mga burabod na nagbubulos.

¹⁹ Papataluboon ko sa desyerto an mga sedro, an mga akasya, an mga mirto asin an mga oliba. An kalangtadan gigibohon kong mga kadlagan, kadlagan nin mga aguho, hunipero asin cipres.

²⁰ Mahihiling ini kan mga tawo asin maaaraman ninda na ako, an Kagurangnan, an naggibo kaiyan. Dangan masasabotan ninda na an banal na Dios nin Israel an nagboot na mangyari iyan.”

An Angat nin Kagurangnan sa mga Bakong Totoong Dios

²¹ An Kagurangnan, an hade nin Israel, nagsasabi kaini: “Kamong mga dios-dios kan mga nasyon, sangatan nindo an saindong kaso. Ipahayag nindo an saindong pinakamarahay na depensa!

²² Madya kamo digdi asin isabi nindo an mangyayari, tanganing mamidbid nyato iyan kun mangyari na. Ipaliwanag nindo sa hukoman an mga pangyayari kan nakaaging panahon, dangan sabihi kami kun ano an saindang kahulogan.

²³ Sabihi kami kun ano pa an mangyayari— dangan maaaraman mi na kamo mga dios! Maggibo kamo nin sarong bagay na marahay o maraot man nganing panluyahon kami asin pagtakigan!

²⁴ Kamo asin an gabos nindong gibo mayo nin halaga; makauuyam an mga nagsasamba saindo!

²⁵ “Nagpili na ako nin sarong lalaki na nag-eerok sa sirangan; pinapasalakay ko siya hale sa amihan. Tinitimaktimakan niya an mga pamayo na garo sinda laboy, siring kan paragibo nin koron na nagtitimaktimak kan laboy.

²⁶ Siisay saindo an nagsabi na mangyayari ini, tanganing masabi mi na tama siya? Mayo ni saro saindo na nagtaram dapit kaini; mayo man lamang nin nakadangog na kamo nagtaram!

²⁷ Ako, an Kagurangnan, an enot na nagbareta sa Sion; igwa ako nin sinugo sa Jerusalem nganing magsabing, ‘Nagdadangadang an saimong banwaan! Mapuruli na sinda sa saindang harong!’

²⁸ Kan maghiling ako sa mga dios-dios mayo sinda nin ikinataram; mayo sainda nin nakasimbag kan sakong mga hapot.

²⁹ Mayong kamugtakan an mga dios-dios na ini; mayo sindang nagigibo— maluluya saka mayo nin kapangyarihan an mga ladawan na ini.”