Isaias 4 - Marahay na Bareta Biblia

¹ Pag-abot kan panahon na iyan, pupugolon nin pitong babae an sarong lalaki asin sasabihan, “Kami na an bahala kan samong kakakanon saka gugubingon, alagad pabayae kaming apodon kang samong agom, tanganing mahale sa samo an kasosopgan sa dai pagkakaigwa nin agom.”

Papatindogon Giraray an Jerusalem

² Maabot an panahon na papadakulaon asin papagayonon nin Kagurangnan an gabos na tinanom sa Israel. Mawiwilihan asin ipag-oorgulyo kan mga matatadang mga tawo an bunga kan daga.

³ An gabos na natada sa Jerusalem, na mga pinili nin Dios tanganing matadang buhay, aapodon banal.

⁴ Huli kan saiyang kapangyarihan, huhukoman saka lilinigan nin Kagurangnan asin huhugason niya an kasalan nin Jerusalem saka an dugo na pinabulos duman.

⁵ Dangan sa ibabaw kan Bukid nin Jerusalem asin sa mga nagkatiripon duman, mapadara an Kagurangnan nin dampog sa aldaw, asin aso saka sarong maliwanag na kalayo sa banggi. An bilog na syudad tatahoban asin iingatan kan kamurawayan nin Dios.

⁶ Lilindongan kan saiyang kamurawayan an syudad sa init kan aldaw asin gigibohon niyang sarong lugar na ligtas, harayo sa bagyo saka sa uran.