Isaias 39 - Marahay na Bareta Biblia

Mga Sugo Hale sa Babilonia

¹ Kan panahon na iyan, nabaretaan ni Merodacbaladan, na hade nin Babilonia asin aki ni Baladan, na naghelang si Hadeng Ezekias, kaya pinadarahan niya ini nin surat saka regalo.

² Inako ni Ezekias an mga sugo dangan ipinahiling niya sainda an saiyang kayamanan—an saiyang mga plata saka bulawan, an saiyang mga pahamot saka mamahalon na lana, asin an gabos niyang kagamitan sa hukbo. Ipinahiling niya sainda an gabos na nasa mga kwartong sarayan asin an nasa gabos na lugar na sakop kan saiyang kahadean.

³ Dangan nagduman an propetang si Isaias ki Hadeng Ezekias asin naghapot, “Saen hale an mga lalaking ini? Ano an sinabi ninda saimo?” Nagsimbag si Ezekias, “Hale sinda sa harayong nasyon, sa Babilonia.”

⁴ “Ano an nahiling ninda sa palasyo?” an hapot ni Isaias. “Nahiling ninda an gabos. Ipinahiling ko sainda an gabos na nasa mga kwartong sarayan,” an simbag kan hade.

⁵ Sinabihan ni Isaias an hade, “Hinanyoga an tataramon kan Kagurangnan nin mga hukbo:

⁶ Maabot an panahon na an gabos na bagay sa saimong palasyo, an gabos na bagay na tinipon kan saimong mga ginikanan sagkod sa aldaw na ini, dadarahon sa Babilonia. Mayo kaiyan nin matatada.

⁷ Dadarahon man duman an nagkapira kan saimong aking lalaki asin gigibohon na eunuko na maglilingkod sa palasyo kan hade nin Babilonia.”

⁸ Dangan nagsimbag si Ezekias, “Marahay an tataramon nin Kagurangnan na sinabi mo sako.” Huli ta nagsaboot si Ezekias, “Magkakaigwa nin katoninongan saka katiwasayan sa sakuyang panahon.”