Isaias 30 - Marahay na Bareta Biblia

An Mayong Halagang Pakipagtipan sa Egipto

¹ Nagtaram an Kagurangnan: “Herak man sa mga namamayo sa Juda huli ta nagtumang sinda sako. Sinusunod ninda an mga plano na bako ako an naggibo, asin nakikipagtipan sinda tumang sa sakong kabotan; dinadagdagan pa ninda an saindang mga kasalan.

² Nagduduman sinda sa Egipto tanganing maghagad nin tabang maski dai pa sinda naghahagad kan sakong hatol. Boot nindang surogon sinda kan Egipto, kaya ibinubugtak ninda an saindang pagsarig sa hade nin Egipto.

³ Alagad mayo nin magigibo an hade sa pagtabang sainda, asin an pagsurog sainda kan Egipto mabunga nin kapahamakan.

⁴ Huli ta maski duminatong na an saindang mga sugo sa mga Egipciong syudad nin Zoan saka Hanes,

⁵ an mga taga Juda mabasol na nagsarig sinda sa dai masasarigan na nasyon, sarong nasyon na dai makakatao nin tabang sa panahon na linalaom ninda iyan.”

⁶ Iyo ini an mensahe nin Dios dapit sa mga hayop kan kalangtadan sa habagat: “An mga sugo naglakaw sa daga na pano nin pag-alaman, saen nag-eerok an mga leon asin saen igwa nin makamandag na mga halas saka naglalayog na mga dragon. Kinakargahan ninda an likod kan saindang mga asno saka mga kamelyo nin mahahalagang mga regalo para sa sarong nasyon na dai makakatao sainda nin tabang.

⁷ An tabang na itinatao nin Egipto mayo nin kamugtakan. Kaya nginaranan ko an Egipto nin ‘An Dragon na Dai Naghihiro sa Pakatukaw.’”

An Masombikal na Banwaan

⁸ Tinaraman ako nin Dios na isurat sa sarong libro kun ano an kabaing kan banwaan, tanganing magkaigwa nin danay na talaan kun gurano sinda karaot.

⁹ Matumang sinda sa Dios, danay na nagpuputik, danay na nagtatalikod sa katukdoan nin Kagurangnan.

¹⁰ An mga propeta sinasabihan ninda na mag-alo. An sabi ninda, “Dai nindo pagsambiton samo an tama. An boot mi sanang madangog an itaram nindo. Pabayae kami nindo sa samong mga kaisipan.

¹¹ Humale kamo sa samong agihan asin dai nindo pag-olangon an samong dalan. Habo ming madangog an dapit sa saindong banal na Dios nin Israel.”

¹² Alagad iyo ini an sinasabi kan banal na Dios nin Israel, “Dai nindo pinapahalagahan an sinasabi ko saindo asin nananarig kamo sa dahas saka sa daya.

¹³ Nagkasala kamo. Nakakaagid kamo sa sarong halangkaw na kudal na igwa nin gatak magpoon sa itaas sagkod sa ibaba; madali na kamong magaba.

¹⁴ Mapapasa kamo arog sa sarong koron saka magkakaroronot, kaya mayo nin makukuang dakulang pedaso na magagamit sa pagkua nin baga, o sa pagsadok nin tubig hale sa tapayan.”

¹⁵ Ini an tataramon kan Kagurangnan Dios, an banal na Dios nin Israel, “Sa pagbalik saka sa pagpahingalo makakaligtas kamo; sa dai paggirong asin sa pagsarig magkakaigwa kamo nin kosog.” Alagad habo nindong gibohon ini!

¹⁶ Kundi boot pa nindong magdulag sa saindong mga kaiwal sa paagi nin pagsakay sa maririkas na kabayo. Tama kamo—an pagdulag iyo mananggad an kaipuhan na gibohon nindo! Naghohona kamong marikas na an saindong mga kabayo, alagad mas marikas an mga kabayo kan mga naglalamag saindo!

¹⁷ Madurulag an sangribo saindo pakahiling sa sarong kaiwal, asin lima sanang soldados an kaipuhan tanganing magdurulag kamo gabos. Mayo nin matatada sa saindong hukbo pwera kan solo-solong kahoy na nakakabitan kan bandera sa ibabaw kan bulod.

¹⁸ Alagad naghahalat an Kagurangnan tanganing maherakan kamo. Paladan an mga nagsasarig sa Kagurangnan.

Bebendisyonan nin Dios an Saiyang Banwaan

¹⁹ Kamo na mga nag-eerok sa Jerusalem dai na magtatangis. Maheherakon an Kagurangnan, asin kun mag-agrangay kamo saiya nganing tabangan, sisimbagon niya kamo.

²⁰ Papaagihon kamo nin Kagurangnan sa mga masakit na panahon, alagad tutukdoan niya kamo sa panahon na iyan, asin dai na kaipuhan na hanapon pa nindo siya.

²¹ Kun kamo malagalag, sa too man o sa wala kan dalan, madadangog nindo an saiyang tingog sa likodan nindo na magsasabi saindong, “Uya an dalan. Sunoda ini.”

²² Dangan kukuahon nindo an saindong mga dios-dios na pinatos sa plata saka bulawan, asin itatapok nindo iyan arog sa mga maating bagay dangan makurahaw kamo, “Hale kamo!”

²³ Sa panahon na magtanom kamo nin banhi, mapadara nin uran an Kagurangnan asin magkakaigwa nin dakul na sabsabon an saindong mga hayop.

²⁴ An mga baka saka mga asno na saindong ipinag-aarado kan saindong mga oma, magkakakan kan pinakamarahay na kakanon.

²⁵ Sa aldaw na masakop an mga bantayan kan saindong mga kaiwal saka magkagaradan an saindang mga tawohan, mabulos an burabod nin tubig hale sa lambang bukid saka bulod.

²⁶ An liwanag kan bulan magigin siring sa aldaw, asin an aldaw magigin pitong beses an kaliwanagan ki sa dating liwanag kaini, arog sa liwanag nin pitong aldaw na nagliwanag sa saro sanang aldaw. An gabos na ini mangyayari kun bolongon dangan paomayan na nin Kagurangnan an mga lugad na itinao niya sa saiyang banwaan.

Papadusahan nin Dios an Asiria

²⁷ Uya, an Kagurangnan nagdadangadang hale sa harayo. An kalayo saka an aso nagpapahiling kan saiyang kaanggotan. Nagtataram siya, asin nakakasulo an saiyang mga tataramon siring sa kalayo.

²⁸ Sinusugo niya an doros sa saiyang enotan siring sa baha na minadara kan gabos na maaagihan kaiyan. Sinisighid kaiyan an mga nasyon sa saindang kapahamakan asin tinatapos an mga maraot nindang mga plano.

²⁹ Alagad kamo, banwaan nin Dios, magigin maogma asin mag-aawit kamo siring kan saindong ginigibo sa pagkabanggi nin sarong banal na pyesta. Magigin maogma kamo siring sa mga naglalakaw sa tugtog kan plawta pasiring sa Templo nin Kagurangnan, an Gapo nin Israel.

³⁰ Ipapadangog nin Kagurangnan sa gabos an saiyang mapangyaring tingog asin ipapamate niya an kosog kan saiyang kaanggotan. Magkakaigwa nin kalayo, kikilat, pag-uran nin yelo, saka makosog na uran.

³¹ Magkakatarakot an mga taga Asiria kun madangog na ninda an tingog nin Kagurangnan asin mamamatean ninda an kosog kan saiyang padusa.

³² An lambang paghampak sainda nin Kagurangnan sasabayan kan tanog nin mga tamborin saka lira kan saiyang banwaan. An Dios mismo an makikilaban sa mga taga Asiria.

³³ Haloy nang panahon na inandam an sarong lugar saen susuloon an hade kan Asiria sa sarong dakulang kalayo. Hararom saka mahiwas an lugar, asin halangkaw an tambak nin kahoy. An Kagurangnan an mahangos nin kalayo nganing makutan iyan.