Isaias 3 - Marahay na Bareta Biblia

Karibokan sa Jerusalem

¹ Huli ta uya, an Kagurangnan, an Kagurangnan nin mga hukbo, hahaleon niya sa Jerusalem saka sa Juda an gabos na sinasarigan kan katawohan. Hahaleon niya an sinasarigan nindang pagkakan asin tubig.

² Hahaleon man niya an mga makosog na tawo saka an mga soldados, an mga hukom saka an mga propeta, an mga parahula saka an mga kamagurangan,

³ an mga opisyal nin hukbo saka an mga lalaking ginagalangan, an mga parahatol saka an mga salamangkero asin an mga paralumay.

⁴ Gigibohon nin Kagurangnan na paghadean sinda nin mga aking lalaki, asin mga omboy an mamamahala sainda.

⁵ Dangan aapihon kan lambang saro an saiyang kapwa, an lambang tawo mang-aapi kan saiyang kataed. An mga hoben magigin matumang sa saindang mga kamagurangan, asin an mga mayong halagang tawo sa mga ginagalangan.

⁶ Madatong an panahon na pipilion kan mga kaayon nin saiyang kamag-anakan an saro sainda dangan sasabihan: “Igwa ka nin gubing, tugang, kaya ika an mamayo samuya, sa panahon na ini nin kasakitan.”

⁷ Alagad masimbag siya: “Bakong ako! Dai ko kamo matatabangan; mayo man ako nin kakanon o gubing. Bakong ako an gigibohon nindong lider!”

⁸ An Jerusalem napadungkal, asin narumpag an Juda; huli ta tumang sa Kagurangnan an saindang mga gibo saka mga tataramon.

⁹ An saindang pagpapalaen an masaksi laban sainda; ipinapahayag ninda an saindang kasalan siring sa Sodoma, dai ninda itinatago iyan. Herak man sainda! Huli ta sinda man sana an nagdara nin kapahamakan sa sainda.

¹⁰ Magigin maogma an mga matanos asin magigin marahay an saindang kamugtakan, huli ta magkakakan sinda kan bunga nin saindang kapagalan.

¹¹ Herak man sa mga maraot! Madatong sainda an kapahamakan, huli ta kun ano an saindang ginibo iyo man an gigibohon sainda.

¹² Inaapi nin mga usurero an sakong banwaan; dinadaya sinda kan parapautang. Banwaan ko, linalagalag ka kan saimong mga pamayo, kaya dai mo aram an saimong dalan.

Hinuhukoman nin Kagurangnan an Saiyang Banwaan

¹³ Andam an Kagurangnan sa pagpahayag kan saiyang kaso; nagtitindog siya sa paghukom sa saiyang banwaan.

¹⁴ Huhukoman nin Kagurangnan an mga pamayo saka an mga kamagurangan kan saiyang banwaan. Ini an pahayag nin Kagurangnan: “Kamo an nagsamsam kan mga ubasan; nasa saindong mga harong an mga nasamsam nindo sa mga dukha.

¹⁵ Mayo kamong deretso sa pagronot kan sakong banwaan, sa pag-api kan mga dukha. Ako, an Kagurangnan, an Dios nin mga hukbo, an nagtaram.”

Patanid sa mga Babae nin Jerusalem

¹⁶ Nagtaram an Kagurangnan: “Huli ta mapalangkaw an mga aking babae nin Jerusalem, tuog an liog kun maglakaw, pasurusikrap kan saindang mga mata, garo nagduduyan an lubot, asin nagpapatanog kan mga pulseras sa saindang mga bitis,

¹⁷ papadusahan ko sinda— aarisan ko an saindang mga payo asin magdadanay sindang siring.”

¹⁸ Maabot an panahon na hahaleon nin Kagurangnan sa mga babae nin Jerusalem an gabos na bagay na saindang ipinagpapaabaw-abaw—an mga samno na sulot ninda sa saindang mga bitis, payo, liog,

¹⁹ asin mga kamot. Kukuahon niya an saindang mga belo

²⁰ asin mga kopya; an mga pulseras sa braso saka an mga telang ibinubugkos ninda sa saindang mga kamot saka habayan, an mga laogan nin mga pahamot, asin an anting-anting;

²¹ an saindang mga singsing sa muro saka sa dungo;

²² an magagayon nindang mga gubing, an mga alikboy saka an saindang mga pitaka;

²³ an mga turban asin an mga belo.

²⁴ Alagad embes na mamarong nin pahamot, magigin mabata sinda; embes na sarong paha, lubid an gagamiton ninda; embes na marahay na pakasukray na buhok, payo na mayong buhok; embes na sarong magayon na gubing, trapo an igugubing ninda; embes na kagayonan, kasosopgan!

²⁵ An saimong mga lalaki magkakagaradan sa espada, asin an saimong makokosog na mga lalaki magkakagaradan sa gera.

²⁶ Magtatangis asin magmomondo an mga trangkahan nin Jerusalem dangan siring sa sarong babae, huba na matukaw siya sa daga.