Isaias 27 - Marahay na Bareta Biblia

¹ Sa aldaw na iyan, gagamiton nin Kagurangnan an saiyang mapangyari saka nakakagadan na espada tanganing padusahan an Leviatan, an nagdudulag saka nagbubulonbukon na halas, asin tanganing gadanon an dragon na yaon sa dagat.

² Sa aldaw na iyan, masabi an Kagurangnan dapit sa saiyang nawiwilihan na ubasan,

³ “Binabantayan saka binabaribi ko iyan. Aldaw-banggi na ginigibo ko iyan tanganing mayong maraot na mangyari diyan.

⁴ Dai na ako naaanggot sa ubasan. Kun igwa pa sana nin mga tonok saka mga binit na sakong lalabanan, sinulo ko na an mga iyan.

⁵ Alagad kun mawot kan mga kaiwal kan sakong banwaan an sakong pagsurog, makipagtoninong sinda sako. Iyo, makipagtoninong sinda sako.”

⁶ Sa mga maabot na aldaw, an banwaan nin Israel, an mga kapagarakian ni Jacob, magkakaigwa nin gamot arog sa sarong kahoy, asin magsusupang dangan mamumurak sinda. Mapapano kan saindang bunga an bilog na kinaban.

⁷ Mas makuri an padusa na itinao nin Kagurangnan sa kaiwal nin Israel ki sa Israel, asin mas dakul na lalaki an nagkagaradan.

⁸ Pinadusahan nin Kagurangnan an saiyang banwaan sa paagi nin pagtapok sainda. Hinale niya sinda sa paagi nin makuring doros na hale sa sirangan.

⁹ Alagad papatawadon sana an kasalan nin Israel kun an mga gapo sa paganong mga altar maronot na arog sa tisa, asin mayo nang nagtitindog na altar nin insenso o simbolo kan diosang si Asera.

¹⁰ Gaba na an pinapusog na syudad. Mayo na nin nag-eerok diyan siring sa mayong laog na kalangtadan. Nagin iyan sarong pasabsaban nin mga hayop—sarong lugar na mapapahingaloan ninda.

¹¹ Aralang asin barari na an mga sanga kan mga kahoy; pinoporot sinda kan mga babae tanganing igatong. Huli ta mayo nin pakasabot an mga tawong ini, dai sinda maheherakan kan Dios na naglalang sainda; dai sinda pahihilingan nin pagkaherak.

¹² Sa aldaw na iyan, magpoon sa Salog nin Eufrates sagkod sa pagdolonan kan Egipto, saro-sarong titiponon nin Kagurangnan an saiyang banwaan, siring sa sarong tawo na naglalaen kan trigo sa ata.

¹³ Pag-abot kan aldaw na iyan, patatanogon an sarong trompeta tanganing apodon an gabos na Israelita hale sa Asiria saka Egipto na itinapok duman. Madatong sinda asin masamba sa Kagurangnan sa Jerusalem, sa banal niyang bulod.