Isaias 20 - Marahay na Bareta Biblia

An Tanda kan Hubang Propeta

¹ Sa pagboot ni Sargon, an emperador nin Asiria, sinalakay kan pamayo kan hukbo nin Asiria an Filisteong syudad nin Asdod.

² Tolong taon na an nakalihis kan sabihan nin Kagurangnan si Isaias na aking lalaki ni Amoz, na hukason an saiyang sandalyas asin an sulot niyang sako. Nagkuyog siya asin naglakaw na huba saka mayo nin sandalyas.

³ Kan masakop an Asdod, nagsabi an Kagurangnan, “Tolong taon nang namuhay na huba saka mayo nin sandalyas an sakong sorogoon na si Isaias. Tanda iyan kun ano an mangyayari sa Egipto asin Etiopia.

⁴ Hurubang dadarahon kan hade nin Asiria an mga bilanggo na saiyang nabihag hale sa duwang nasyon na ini. Aki asin gurang, malakaw sinda na mayong sandalyas saka huba, mayong tahob an lubot na magdadara nin kasosopgan sa Egipto.

⁵ Dangan panruruluyahon saka magkakamurongnan sinda huli ta ibinugtak ninda an saindang paglaom sa Etiopia asin ipinag-orgulyo ninda an Egipto.

⁶ Pag-abot kan panahon na iyan, masabi an mga nag-eerok sa baybayon kan Filistea, ‘Hilinga! Iyo ini an mangyayari sa satong linaoman asin hinagadan nin tabang tanganing surogon kita sa hade nin Asiria! Paano kita makakadulag?’”