Isaias 16 - Marahay na Bareta Biblia

An Mayong Paglaom na Kamugtakan nin Moab

¹ An mga taga Moab nagpadara nin sarong kordero hale sa syudad nin Sela sa kalangtadan, bilang regalo sa naghahade sa Jerusalem.

² Yaon sinda sa pangpang kan Salog nin Arnon asin mayo sindang aram na dudumanan, siring sa mga gamgam na pinahale sa saindang salagan.

³ Minasabi sinda sa mga taga Juda, “Sabihi kami kun ano an samong dapat na gibohon. Suroga kami siring sa sarong kahoy na nagtatao nin malipot na lindong kun odto, asin tugote kaming magpahingalo sa saindong limpoy. Nakadulag kami sa mga naglalamag samo; tagoa kami sa lugar na mayo nin makakakua samo.

⁴ Tugotan nindo kaming makihimanwa saindo. Suroga kami sa mga boot gumadan samo.” (An pang-api saka an panggadan matatapos, asin mawawara an mga nagraraot kan daga.

⁵ Dangan magigin hade an sarong kapagarakian ni David, asin pamamayohan niya an banwaan sa kaimbodan saka sa pagkamoot. Magigin marikas siya sa paggibo kan tama; bilang hukom, ipapahiling niya an hustisya.)

⁶ Minasabi an mga taga Juda, “Nadangog mi an kapalangkawan kan mga taga Moab. Gabos kaputikan an saindang ipinagpapaabaw-abaw asin ipinaghahambog.”

⁷ Maghihibi an mga taga Moab huli sa kasakitan na saindang tinitios. Gabos sinda maghihibi sa oras na magiromdoman ninda an mga masiram na pagkakan na dati nindang kinakakan sa syudad nin Kir-heres. Mawawaraan sinda nin paglaom.

⁸ Huli ta nagkararaot an mga oma na harani sa Hesbon asin an mga ubasan nin Sibma—an mga ubasan na ginigikanan kan arak na nakakapaburat sa mga pamayo kan mga nasyon. Sarong panahon kaidto, an mga balagon nakakaabot sagkod sa syudad nin Jazer, asin sa kalangtadan sa sirangan, saka sa ibong kan Gadan na Dagat sa solnopan.

⁹ Ngunyan naghihibi ako para sa mga balagon nin Sibma siring na ako naghihibi para sa Jazer. Nagtatagdo an sakong mga luha para sa Hesbon asin Eleale, huli ta mayo nang aanihon na makakapaogma sa mga tawo.

¹⁰ Mayo nang paraoma ngunyan na naoogma sa matubang na mga oma. Mayo nang nagkukurahaw o nag-aawit sa mga ubasan. Mayo nang magtitimaktimak nin mga ubas sa paggibo nin arak; mayo na an mga kinurahaw nin kaogmahan.

¹¹ Kaya nag-aagrangay ako sa kamondoan para sa Moab asin para sa Kir-heres.

¹² Pinapagal kan mga taga Moab an saindang sadiri sa pagsakat pasiring sa paganong mga lugar na pagsasambahan saka sa saindang mga templo sa pagpamibi, alagad dai iyan makakatabang sainda.

¹³ Iyo iyan an mensahe na itinao nin Kagurangnan dapit sa Moab.

¹⁴ Alagad nagsasabi ngunyan an Kagurangnan, “Sa laog sana nin tolong taon, mawawara an dakulang kayamanan nin Moab. Sa kadaklan kan saiyang namamanwaan, kadikit sana an matatada, asin an mga ini magigin maluya.”