Isaias 15 - Marahay na Bareta Biblia

Raraoton nin Dios an Moab

¹ Iyo ini an mensahe dapit sa Moab. Sa laog nin saro sanang banggi, nagkararaot an mga syudad nin Ar asin Kir; mayo na maski sarong tingog na nadadangog sa daga nin Moab.

² An mga taga Dibon minasarakat sa itaas kan bulod tanganing magtangis sa paganong mga lugar na pagsasambahan. Sa kamondoan, tatangisan kan mga taga Moab an mga syudad nin Nebo saka Medeba; inaris ninda an buhok sa saindang mga payo asin barabas sa kamondoan.

³ An mga tawo sa tinampo nakagubing nin sako; sa mga plasa asin sa atop nin mga harong, naghihibi saka nagmomondo an mga tawo.

⁴ An mga taga Hesbon saka taga Eleale nagkukurahaw, asin an saindang kinurahaw nadadangog sagkod sa harayong lugar nin Jahaz. Maski an mga soldados tinatakigan; mayo na sindang kosog nin boot.

⁵ Tinatangisan kan sakong puso an Moab! Nagdudurulag na an mga tawo pasiring sa Zoar, asin sa Eglat-selisiya. An nagkapira nagtuturukad pasiring sa Luhit, nagtatangis mantang naglalakaw; an nagkapira nagdudurulag pasiring sa Horonaim, makosog na naghaharaya.

⁶ Mamara na an Sapa nin Nimrim; alang na an doot sa harani kaiyan, asin mayo nang berdeng natada.

⁷ An mga tawo nagbaralyo sa pagdulag pasiring sa Kapantayan nin mga Aguho; dara ninda an gabos nindang rogaring.

⁸ Saen man sa daga nin Moab nadadangog an pagtangis. Nadadangog iyan sa mga banwaan nin Eglaim asin Beer-elim.

⁹ An salog sa banwa nin Dibon mapula na sa dugo, asin an Dios igwa pa nin natatagamang mas maraot para sa mga tawo duman. Sarong makangirhat na kagadanan an natatagama sa mga nawalat sa Moab.