Isaias 13 - Marahay na Bareta Biblia

Papadusahan nin Dios an Babilon

¹ Iyo ini an mensaheng hale sa Dios dapit sa Babilon, na inako ni Isaias na aking lalaki ni Amoz.

² Iitaas mo an tanda sa ibabaw kan sarong bulod na mayo nin anoman na nagtatalubo! Kurahawan mo an mga soldados dangan iitaas mo an saimong kamot bilang tanda sa sainda tanganing salakayon an mapaabaw-abaw na syudad.

³ Pinaluwas na nin Kagurangnan an saiyang mapaabaw-abaw saka makokosog na mga soldados tanganing makilaban sa sarong banal na gera asin padusahan an saiyang mga naaanggotan.

⁴ Dangoga an ribok sa kabukidan—an ribok nin kadakul na tawo, nin mga nasyon asin mga kahadean na nagtitiripon. Inaandam kan Kagurangnan nin mga hukbo an saiyang hukbo sa pakilaban.

⁵ Harale pa sinda sa harayong mga daga, sa poro kan kinaban. Maabot an Kagurangnan sa pagraot kan bilog na daga sa saiyang kaanggotan.

⁶ Pagkurahaw sa kulog, huli ta harani na an aldaw nin Kagurangnan, an aldaw na raraoton nin Kagurangnan an Babilon!

⁷ Kaya panruruluyahon an gabos na kamot asin mawawaraan nin kosog nin boot an gabos na tawo.

⁸ Gabos sinda matatakot asin makakamate nin kulog, arog kan kulog na namamatean nin sarong babaeng nangangaki. Hihilingon nin sarong tawo an saiyang kapwa sa takot, asin an saindang mga lalawogon mamumula sa sopog.

⁹ An aldaw kan Kagurangnan maabot—an makuring aldaw na idto kan saiyang naglalaad na kabangisan asin kaanggotan. An daga magigin sarong kalangtadan asin magagadan an gabos na makasalan.

¹⁰ An gabos na bitoon saka planeta mawawaraan nin liwanag, an aldaw magigin madiklom sa saiyang pagsirang, asin dai matao nin liwanag an bulan.

¹¹ Nagsasabi an Kagurangnan, “Papadusahan ko an kinaban asin an gabos na maraot huli kan saindang mga kasalan. Ibababa ko an gabos na mapaabaw-abaw asin papadusahan ko an gabos na mapalangkaw saka makuri.

¹² Kadikit sana an matatada; mas dikit pa ki sa bulawan.

¹³ Papatakigon ko an kalangitan, asin matatanyog an daga sa saiyang namumugtakan sa aldaw na ako, an Kagurangnan nin mga hukbo, magpahiling kan sakong kaanggotan.

¹⁴ “Madaralagan papuli sa saindang sadiring daga an mga dayuhan na nag-eerok sa Babilon. Magkakawararak sinda siring sa mga usa na nagdudurulag sa paraayam, garong mga karnero na mayo nin pastor.

¹⁵ An siisay man na madakop sasaksakon sagkod na magadan.

¹⁶ An saindang mga aki ipupusak sa atubangan ninda; sasamsaman an saindang mga harong asin lulupigan an saindang mga agom.”

¹⁷ Nagsasabi an Kagurangnan, “Sosotsotan ko an mga taga Media tanganing salakayon an Babilon. Dai ninda pinapahalagahan an plata asin dai sinda naoogma sa bulawan.

¹⁸ Gagadanon kan saindang mga pana saka bosog an mga hoben na lalaki; dai sinda maheherak sa mga omboy asin sa mga aki.

¹⁹ An Babilonia iyo an pinakamagayon sa gabos na kahadean; iyan an orgulyo kan saiyang mga namamanwaan. Alagad ako, an Kagurangnan, an marumpag sa Babilonia siring kan ginibo ko sa Sodoma asin sa Gomorra.

²⁰ Mayo na nin mag-eerok duman sagkod pa man. Mayong lagalag na Arab na mapatindog kan saiyang tolda duman, asin mayong pastor na mapasabsab kan saiyang mga hayop sa nasabing lugar.

²¹ Iyan an magigin lugar na pag-eerokan kan mga hayop sa kadlagan asin gigibohan nin salagan kan mga kuwaw. Duman mag-eerok an mga darakulang gamgam, asin magdadaralagan duman an mga lalaw na kanding.

²² Madadangog sa mga tore saka mga palasyo an kinurahaw kan mga lalaw na ayam. Nag-abot na an oras kan Babilonia! Madali nang matapos an saiyang mga aldaw.”