Isaias 10 - Marahay na Bareta Biblia

¹ Herak man saindo na nagpapaluwas nin bakong matanos na mga pagboot; mga pagboot na minaapi sa sakong banwaan.

² Siring kaiyan an pag-olang nindo sa mga dukha tanganing dai ninda makamtan an katanosan asin an hustisya. Iyan an paagi nindo sa pagkua kan mga rogaring kan mga balong babae saka mga ilo.

³ Ano an saindong gigibohon kun padusahan na kamo nin Dios? Kun ipadara na niya saindo an kapahamakan na hale sa harayong lugar? Sa kiisay kamo mahagad nin tabang? Saen nindo tatagoon an saindong kayamanan?

⁴ Magagadan kamo sa gera o guguyodon pasiring sa harayong lugar bilang mga bilanggo. Alagad dai pa matatapos an kaanggotan nin Kagurangnan; unat pa giraray an saiyang kamot sagkod ngunyan tanganing magpadusa.

An Emperador nin Asiria bilang Pamakol nin Dios

⁵ Nagtaram an Kagurangnan, “An Asiria ginagamit kong pamakol tanganing padusahan an sakong mga naaanggotan.

⁶ Isinusubol ko an Asiria sa pagsalakay kan mga bakong diosnon na nasyon, mga banwaan na nagpaanggot sakuya. Isinusubol ko sinda tanganing manamsam, manghabon, asin magtimaktimak sa mga banwaan na garo laboy sa mga tinampo.”

⁷ Alagad igwa man nin sadiring plano an emperador nin Asiria. Boot niyang puhoon an dakul na nasyon.

⁸ Nagsabi siya, “Gabos hade an sakong mga opisyal!

⁹ Sinakop ko an mga syudad nin Calno asin Carkemis, an Hamat saka an Arpad. Sinakop ko an Samaria asin an Damasco.

¹⁰ Inunat ko an sakong kamot sa pagpadusa kan mga kahadean na nagsasamba sa mga dios-dios, mga dios-dios na orog pa kadakul ki kan yaon sa Jerusalem asin sa Samaria.

¹¹ Narumpag ko an Samaria asin an gabos na dios-dios kaini; arog man kaiyan an sakong gigibohon sa Jerusalem asin sa mga ladawan na sinasamba duman.”

¹² Alagad nagtataram an Kagurangnan, “Kun matapos ko na an sakong ginigibo sa Bukid nin Sion asin sa Jerusalem, papadusahan ko an emperador nin Asiria huli kan saiyang kapaabaw-abawan saka kapalangkawan.”

¹³ Huli ta nagsasabi an emperador nin Asiria, “Nagibo ko iyan huli ta ako makosog, madonong asin tuso. Hinale ko an mga pagdolonan nin mga nasyon asin kinua ko an mga pagkakan na saindang sinaray. Arog sa sarong toro, tinimaktimakan ko an mga tawong nag-eerok duman.

¹⁴ An mga nasyon sa kinaban arog sa salagan nin gamgam; madali kong natipon an saindang kayamanan siring sa pagtipon nin mga sugok. Mayo nin sarong pakpak na naghiro tanganing takoton ako; mayo ni sarong tuka na nagbuka tanganing kurahawan ako!”

¹⁵ Alagad nagtataram an Kagurangnan, “Makasabi daw an patok na mas dakula siya ki sa tawong naggagamit kaiyan? Mas dakula daw an lagadi ki sa tawong naggagamit kaiyan? Dai man binubuhat kan pamakol an tawo; an tawo an minabuhat kan pamakol.”

¹⁶ Kaya an Kagurangnan nin mga hukbo mapadara nin helang tanganing padusahan an mga basog ngunyan. Magkakaigwa sa saindang mga hawak nin garo sarong kalayo na padagos na naglalaad.

¹⁷ An Dios, an ilaw nin Israel, magigin sarong kalayo. An banal na Dios nin Israel magigin sarong laad na mahalon kan gabos, maski kan mga binit saka mga tonok sa saro sanang aldaw.

¹⁸ Magkakawarara an matabang mga kadlagan asin kaomahan, siring na an sarong mangirhat na helang minagadan sa tawo.

¹⁹ Kadikit na sanang kahoy an matatada, kaya mabibilang iyan maski kan sadit na aki.

Kadikit sana an Makakabalik

²⁰ Maabot an panahon na an mga tawong natada sa Israel dai na mananarig sa nasyon na kadikit nang magpuho sainda, kundi sa Kagurangnan, an Banal nin Israel, sa bilog na katotoohan.

²¹ An kadikit na matatada kan mga taga Israel mabalik sa saindang makakamhan na Dios.

²² Huli ta maski siring sa baybay sa pangpang nin dagat an bilang kan mga tawo sa Israel ngunyan, kadikit sana sainda an makakabalik. Kagadanan an itinagama sa mga tawo, asin maninigo nanggad iyan.

²³ Huli ta an Kagurangnan nin mga hukbo, madara nin kagadanan sa bilog na daga, siring sa saiyang sinabi.

Papadusahan nin Kagurangnan an Asiria

²⁴ Kaya nagsabi an Kagurangnan nin mga hukbo sa saiyang banwaan na nag-eerok sa Sion, “Dai kamo matakot sa mga taga Asiria, maski inaapi ninda kamo siring sa pag-api saindo kaidto kan mga Egipcio.

²⁵ Huli ta kadikit na sanang panahon asin matatapos na an pagpadusa saindo, dangan sinda an gagadanon ko.

²⁶ Ako, an Kagurangnan nin mga hukbo, an mahampak sainda kan sakong pamakol arog kan paghampak ko sa mga taga Midian sa Gapo ni Oreb. Papadusahan ko an Asiria siring kan paghampak ko sa Egipto.

²⁷ Pag-abot kan aldaw na iyan, tatalingkasan ko kamo sa kapangyarihan nin Asiria, asin dai na kamo magagabatan kan sakal na ibinugtak ninda sa abaga nindo.”

Masalakay an Kaiwal

²⁸ Nasakop na kan hukbo kan kaiwal an syudad nin Ai! Nag-agi sinda sa Migron! Iwinalat ninda an saindang mga kagamitan sa Mikmas!

²⁹ Nakalampas na sinda sa hayakpit na dalan asin sa Geba sinda nagpapalihis nin banggi! Nagkakatarakot an mga tawo sa banwaan nin Rama; nagdurulag na an mga tawo sa banwaan ni Hadeng Saul na iyo an Gibea.

³⁰ Magkurahaw kamo, mga taga Gallim! Maghinanyog kamo, mga taga Laisa! Magsimbag kamo, mga taga Anatot!

³¹ An mga taga Madmena asin Gebim nagdudurulag tanganing iligtas an saindang buhay.

³² Ngunyan na aldaw, yaon na sa banwaan nin Nob an mga kaiwal, asin ibinibikyaw ninda duman an saindang gugom na mga kamot laban sa Bukid nin Sion, sa syudad nin Jerusalem.

³³ Ihuhulog sinda kan Kagurangnan nin mga hukbo siring sa mga sangang pinurutol sa sarong kahoy. An pinakamapaabaw-abaw saka pinakamapalangkaw sainda pupulakon asin sosopogon.

³⁴ Papalodon sinda nin Kagurangnan siring sa mga kahoy sa tahaw nin kadlagan, asin marampahog sinda siring sa magagayon na kahoy sa Lebanon!