Isaias 1 - Marahay na Bareta Biblia

¹ Nasa librong ini an bisyon na nahiling ni Isaias, na aking lalaki ni Amoz, dapit sa Juda asin sa Jerusalem kan panahon kan paghahade sa Juda ni Uzzias, ni Jotam, ni Ahaz asin ni Ezekias.

Tinuyaw nin Dios an Saiyang Banwaan

² Pagdangog, O kalangitan, asin paghinanyog, O daga; huli ta nagtaram an Kagurangnan, “Nagpadakula ako nin mga aking lalaki, alagad nagrebelde sinda tumang sako.

³ Midbid kan baka an kagurangnan niya, asin aram kan asno an lugar na pinagbabahogan saiya, alagad an Israel dai nakakaaram; dai nakakasabot an sakong banwaan.”

⁴ Nasyon na makasalan! Banwaan na pano nin karatan! Aki nin mga paragibo nin maraot; mga aking lalaki na an gibo kabikoan! Isinikwal ninda an Kagurangnan. An banal nin Israel, saindong binasang-basang; siya saindong tinalikodan.

⁵ Tadaw ta padagos kang nagrerebelde? Boot mo pang madugangan an saimong padusa? Makulog an bilog mong payo, nanluluya an puso mo.

⁶ Magpoon sa bitis sagkod sa payo, mayo nin kaginhawahan, kundi mga bakros saka mga gatok asin nagdudugong mga lugad; dai nagkahurugasan o nabugkosan, o nalahidan nin lana.

⁷ Rinaot an saimong daga, sinurulo an saimong mga syudad; sa atubang mo sinamsam nin mga dayuhan an saimong daga; rinaot ninda an gabos.

⁸ An Jerusalem binayaan arog sa sarong harong-harong sa ubasan, siring sa sarong sirongan sa tatamnan nin melon, arog sa syudad na sinasalakay.

⁹ Kun an Kagurangnan nin mga hukbo dai nagwalat sato nin dikit na tawo, nakaarog kutana kita sa Sodoma, asin nagin siring sa Gomorra.

¹⁰ Jerusalem, an saimong mga pamayo asin banwaan nakakaarog sa taga Sodoma saka Gomorra. Dangoga an itinataram saimo nin Kagurangnan. Hinanyoga an itinutukdo saimo kan saimong Dios.

¹¹ “Anong halaga sako kan saimong mga sakripisyo?” an sabi nin Kagurangnan. “Uyam na ako sa mga tinutong na atang na mga karnero asin sa taba kan mga hayop; dai ako naoogma sa dugo nin mga baka o nin mga kordero, o nin mga lalaking kanding.

¹² “Kun minadolok kamo sa atubang ko, siisay an nagboot saindo na magtimaktimak sa sakong mga patyo?

¹³ Dai na kamo magdara nin mga dolot; nakakauyam para sako an insenso. An saimong mga pyesta: an bagong Bulan, an Sabbath, asin an banal mong mga pagtiripon— gabos iyan nadigtaan kan saimong mga kasalan.

¹⁴ Ikinakaongis ko an saimong mga pyesta kan Bagong Bulan saka itinalaan na mga pyesta; iyan sarong pagabat para sako; napapagal na ako sa pagpasan kaiyan.

¹⁵ Kun iniitaas mo an saimong mga kamot sa pagpamibi, dai taka hihilingon; maski dugangan mo an saimong pamibi, dai taka hihinanyogon; huli ta pano nin dugo an saimong mga kamot.

¹⁶ Maghanaw ka; maglinig ka kan saimong sadiri; halea an maraot mong mga gibo sa atubang ko; mag-ontok ka sa paggibo nin karatan,

¹⁷ mag-adal ka sa paggibo nin karahayan papaghadea an katanosan, ontoka an pang-aapi; suroga an mga ilo, asin an mga babaeng balo.

¹⁸ “Madya, mag-olay kita,” an sabi nin Kagurangnan. “Maski arog kapula sa dugo an saimong mga kasalan magigin maputi iyan siring sa nyebe; maski iyan arog kapula sa purpura, iyan magigin siring sa puting telang lana.

¹⁹ Kun magkuyog ka sana kuta sako, magkakakan ka kan marahay na mga bunga kan daga.

²⁰ Alagad kun maghabo ka asin magrebelde, an espada an magadan saimo, huli ta ako, an Kagurangnan, an nagtaram.”

An Makasalan na Syudad

²¹ Paano nagin arog sa maraot na babae an maimbod na syudad, na pano kaidto nin katanosan? Kaidto nag-erok saiya an mga matanos, alagad ngunyan mga paragadan an yaon diyan.

²² Jerusalem, kaidto arog ka sa plata alagad ngunyan mayo ka na nin halaga. Kaidto arog ka sa managom na arak, alagad ngunyan tubig ka na sana.

²³ An saimong mga lider mga rebelde asin kairiba nin mga parahabon. An gabos namomoot sa suhol asin nagmamawot nin mga regalo. Dai ninda sinusurog an mga ilo asin dai ninda dinadangog an kaso kan mga babaeng balo.

²⁴ Kaya nagsasabi an Kagurangnan, an Makakamhan nin Israel: “Pahuhugpaon ko an sakong kaanggotan sa sakong mga kaiwal, asin mabalos ako.

²⁵ Ibibikyaw ko tumang saimo an sakong kamot asin lilinigan taka kan saimong ati siring sa paglinig sa metal kan gabos na ati diyan.

²⁶ Dangan ibabalik ko an saimong mga hukom siring kaidto, asin man an saimong mga parahatol siring sa kapinonan. Dangan aapodon kang syudad nin katanosan, an maimbod na syudad.”

²⁷ Huli ta matanos an Kagurangnan ililigtas niya an Jerusalem asin an mga nag-eerok diyan na nagbabakle.

²⁸ Alagad sarabay na roronoton nin Kagurangnan an mga rebelde saka an mga makasalan asin an mga nagtalikod saiya magkakagaradan.

²⁹ Magbabasol kamo huli ta nagsamba kamo sa mga kahoy asin nag-ataman kamo nin banal na mga tatamnan.

³⁰ Makakaarog kamo sa hamurawon na naluluyos an dahon, asin siring sa tatamnan na mayo nin tubig.

³¹ Siring na an dagami nasusulo kan manok-manok nin kalayo, mapapahamak man an mga mapangyaring mga tawo huli kan saindang maraot na gibo asin mayo nin makakaontok kan saindong pagkaraot.