Hukom 6 - Marahay na Bareta Biblia

Si Gideon

¹ Nagkasala na naman sa Kagurangnan an banwaan nin Israel, kaya ipinasakop niya sinda sa mga Midianita sa laog nin pitong taon.

² Mas makosog an mga Midianita ki sa mga Israelita, kaya nagtarago sinda sa mga lungib asin sa ibang ligtas na lugar sa kabubuldan.

³ Kun minatanom an mga Israelita, minaabot sa pagsalakay sainda an mga Midianita kaiba an mga Amalekita sagkod an mga tribung nag-eerok sa desyerto.

⁴ Minakampo sinda sa kaomahan asin rinaraot an mga tinanom, sagkod sa lugar na nasa palibot kan Gaza. Kinukua ninda an gabos na karnero, baka, saka asno; mayo sindang itinatadang pagkakan para sa mga Israelita.

⁵ Minasalakay sindang dara an saindang mga hayop saka tolda, asin huli ta kadakul sinda, nakakaarog sinda sa mahibog na doron. Sinda asin an saindang mga kamelyo dai mabilang. Minaabot sinda asin rinaraot an daga.

⁶ Mayo nin naginibo an mga Israelita laban sainda.

⁷ Kaya nag-agrangay sa Kagurangnan an banwaan nin Israel tanganing tabangan tumang sa mga Midianita.

⁸ An Kagurangnan nagpadara sainda nin sarong propeta na nagdara kan baretang ini hale sa Kagurangnan na Dios nin Israel: “Kinua ko kamo hale sa kaoripnan sa Egipto;

⁹ ilinigtas ko kamo sa mga Egipcio asin sa mga tawong nakilaban saindo sa dagang ini. Pinaharale ko sinda sa pagdangadang nindo, asin itinao ko saindo an saindang daga.

¹⁰ Tinaraman ko kamo na ako an Kagurangnan na saindong Dios, asin na dai kamo magsamba sa mga dios-dios kan mga Amoreo na dating kagsadiri kan dagang pinag-eerokan nindo ngunyan. Alagad dai kamo nagdangog sako.”

¹¹ Dangan uminabot sa Ofra an anghel nin Kagurangnan asin tuminukaw sa lindong kan sarong kahoy na hamurawon na sadiri ni Joas, saro sa mga kamaganakan ni Abiezer. An saiyang aking lalaki na si Gideon hilom na naggiginik nin trigo duman sa pugaan nin ubas tanganing dai siya mahiling kan mga Midianita.

¹² Nagpahiling saiya an anghel nin Kagurangnan asin nagsabi, “Yaon saimo an Kagurangnan, maisog asin makosog na lalaki!”

¹³ Nagsabi si Gideon, “Kun pwedeng maghapot, kagurangnan, tano ta nangyayari sa samo an gabos na ini kun totoong yaon an Kagurangnan sa samo? Ano na an nangyari sa makangalas na mga bagay na inosip samo kan samong mga magurang manongod sa mga ginibo nin Kagurangnan—kun paano niya sinda ilinigtas sa Egipto? Ngunyan pinabayaan na kami nin Kagurangnan asin itinao sa kamot kan mga Midianita.”

¹⁴ Dangan pinagbotan siya nin Kagurangnan, “Lakaw sa bilog mong kosog asin ligtasan sa mga Midianita an banwaan nin Israel. Ako mismo an minasugo saimo.”

¹⁵ Nagsimbag si Gideon, “Paano ko ikakaligtas an Israel? An sakong kamaganakan iyo an pinakamaluya sa tribu ni Manases asin ako an pinakamaluya sa sakong pamilya.”

¹⁶ Nagtaram an Kagurangnan, “Magigibo mo iyan huli ta tatabangan taka. Roronoton mo an mga Midianita na garo saro sanang tawo.”

¹⁷ Nagsimbag si Gideon, “Kun talagang nawiwilihan mo ako, pahilingan mo ako nin tanda na ika mananggad an Kagurangnan.

¹⁸ Dai ka tabi maghale sagkod na madarahan taka nin pagkakan.” “Dai ako mahale sagkod na bumalik ka,” an simbag nin Kagurangnan.

¹⁹ Kaya nagpuli si Gideon sa saiyang harong asin nagluto nin sarong ogbon pang kanding. Nagkua siya nin sampolong kilong arina asin ginibo niyang tinapay na mayong lebadura. Pakatapos, ilinaog niya sa basket an linutong karne asin ibinugtak an sabaw sa koron dangan dinara idto sa anghel nin Kagurangnan na naghahalat sa poon kan kahoy na hamurawon, saka itinao idto.

²⁰ Sinabihan siya kan anghel, “Ibugtak mo an karne asin tinapay sa ibabaw kan gapong ini, dangan ulaan mo kan sabaw.” Sinunod siya ni Gideon.

²¹ Dangan an karne saka tinapay dinutaan kan anghel nin Kagurangnan kan poro kan saiyang sugkod. Biglang luminuwas an kalayo hale sa gapo asin tinutong an karne sagkod an tinapay. Pakatapos kaini, nawara an anghel.

²² Dangan nagtubod si Gideon na an saiyang nahiling iyo an anghel nin Kagurangnan, kaya sa katakotan, nagsabi siya, “O Kagurangnan Dios! Hampangan na nahiling ko an saimong anghel!”

²³ Alagad nagtaram saiya an Kagurangnan, “An katoninongan mapasaimo. Dai ka matakot. Dai ka magagadan.”

²⁴ Pakatapos kaini, nagtugdok nin altar si Gideon para sa Kagurangnan asin nginaranan niyang, “An Kagurangnan iyo an katoninongan.” (Sagkod ngunyan nagtitindog pa ini duman sa Ofra na sadiri kan pamilya ni Abiezer.)

²⁵ Kan bangging idto, tinaraman nin Kagurangnan si Gideon, “Kuahon mo an toro kan saimong ama asin saro pang toro na pitong taon an edad dangan gabaon mo an altar na ginibo kan saimong ama para ki Baal asin palodon mo man an simbolo kan diosang si Asera na nasa kataed kaiyan.

²⁶ Pakatapos, magtugdok ka sa kagapoan na ini nin sarong matibay na altar para sa Kagurangnan na saimong Dios. Dangan tutongon mong bilog an ikaduwang toro bilang atang. An simbolo ni Asera na saimong pinalod iyo an gamiton mong igatong.”

²⁷ Kaya ipinag-iba ni Gideon an sampolo kan saiyang mga sorogoon asin ginibo niya an ipinagboot saiya nin Kagurangnan. Ginibo niya ini sa banggi huli ta takot siyang mahiling kan saiyang pamilya asin mga kahimanwa.

²⁸ Pagkaaga, pagkamatang amay kan mga tawo, nahiling ninda an gabang altar ni Baal asin an putol na simbolo kan diosang si Asera patin an ikaduwang toro na tinutong sa altar na itinugdok duman.

²⁹ Naghinarapotan sinda, “Siisay daw an guminibo kaini?” Sa pagsiyasat ninda, naaraman nindang si Gideon na aking lalaki ni Joas an kaggibo kaidto.

³⁰ Kaya sinabihan ninda si Joas, “Iluwas mo digdi an saimong aki tanganing samong gadanon! Ginaba niya an altar ni Baal asin pinalod an simbolo ni Asera sa kataed kaiyan.”

³¹ Alagad sinimbag ni Joas an gabos na nasa atubang niya, “Ano kamo, minatindog para ki Baal? Makikilaban kamo para saiya? Magagadan bago mag-aga an siisay man na mag-apil ki Baal. Kun si Baal sarong dios, bayaan nindong siya mismo an makilaban para saiya, huli ta altar niya an ginaba.”

³² Poon kaidto, namidbid si Gideon sa ngaran na Jerubaal, huli ta nagsabi si Joas, “Palabana daw si Baal, huli ta altar niya an ginaba.”

³³ Dangan nagtiripon an gabos na Midianita, Amalekita asin an mga tribung nag-eerok sa desyerto, nagbalyo sa Salog nin Jordan saka nagkampo sa Kapantayan nin Jezreel.

³⁴ Nagdatong ki Gideon an Espiritu nin Kagurangnan asin pinatanog niya an trompeta tanganing apodon an kalalakihan kan kamaganakan ni Abiezer na mag-iba saiya.

³⁵ Nagpadara siya nin mga sugo sa bilog na teritoryo ni Manases tanganing apodon man na mag-iba saiya. Nagpadara pa siya nin mga sugo sa mga tribu ni Aser, Zabulon, asin ni Neftali. An mga ini uminabot man tanganing mag-iba saiya.

³⁶ Dangan nagsabi si Gideon sa Dios, “Kun totoong ililigtas mo an Israel sa paagi ko,

³⁷ mabugtak ako nin mga barahibo kan karnero sa dagang ginikan kan trigo. Kun pagkaaga igwang ambon an mga barahibo alagad mayo nin ambon sa daga, mangangahulogan iyan na totoong ililigtas mo an Israel sa paagi ko.”

³⁸ Asin nangyari ini. Kan amay na nagbangon si Gideon pagkaaga, biniringan niya an barahibo asin nakakua siya nin ambon na pwedeng makapano sa sarong mangko.

³⁹ Dangan nagsabi si Gideon sa Dios, “Dai ka maanggot sako; tugotan mo akong maghagad pa nin tanda sa paagi kaining barahibo. Gibohang magin mamara ini asin an daga an magin dumog sa ambon.”

⁴⁰ Kan bangging idto, ginibo nin Dios an sinabi ni Gideon. Kaya pagkaaga, mamara an barahibo, alagad dumog an daga huli sa ambon.