Hukom 3 - Marahay na Bareta Biblia

An Nagkataradang mga Nasyon sa Daga

¹ Kaya itinada nin Kagurangnan an nagkapirang nasyon sa daga tanganing baloon an mga Israelita na dai pa nakanamit nin gera sa Canaan.

² Ginibo niya ini tanganing tukdoan an lambang henerasyon kan mga Israelita manongod sa gera, orog na idtong dai pa nakilaban.

³ An mga natada iyo: an limang syudad kan mga Filisteo, an gabos na Cananeo, an mga Sidoneo, an mga Heveo na nag-erok sa Kabukidan nin Lebanon magpoon sa Bukid nin Baal-hermon sagkod sa agihan pasiring sa Hamat.

⁴ Sinda an mabalo sa Israel, tanganing maaraman kun baga masunod sinda sa ipinagboot nin Kagurangnan sa saindang mga ginikanan huli ki Moises.

⁵ Kaya nag-erok sa daga an mga Israelita sa kaibahan kan mga Cananeo, Heteo, Amoreo, Perezeo, Heveo, asin Jebuseo.

⁶ Nakipag-agoman sinda sa mga ini asin nagsamba kan saindang mga dios-dios.

Si Otniel

⁷ Nalingawan nin Israel an Kagurangnan na saindang Dios; nagkasala sinda saiya asin nagsamba sa mga Baal sagkod sa mga Asera.

⁸ Kaya naanggot sainda nin marahay an Kagurangnan asin pinabayaan niyang sakopon sinda kan hadeng si Cusan Risataim kan Mesopotamia; nagin oripon niya sinda sa laog nin walong taon.

⁹ Dangan nag-agrangay an mga Israelita sa Kagurangnan kaya nagsugo an Kagurangnan nin sarong lalaki na nagligtas sainda. Siya si Otniel na aking lalaki ni Kenaz na ngohod na tugang ni Caleb.

¹⁰ Uminabot saiya an Espiritu nin Kagurangnan, asin siya an nagin lider nin Israel. Nakigera siya asin pinapanggana nin Kagurangnan laban sa hade nin Mesopotamia.

¹¹ Pakatapos kaini, nagkaigwa nin katoninongan an daga sa laog nin kwarentang taon, dangan nagadan si Otniel.

Si Ehud

¹² Nagkasala giraray an Israel sa Kagurangnan, asin huli kaini an hadeng si Eglon kan Moab orog na pinakosog nin Kagurangnan ki sa Israel.

¹³ Nakisumaro si Eglon sa mga Ammonita asin sa mga Amalekita; sinalakay ninda dangan dinaog an Israel. Sinakop ninda an Jerico, an syudad nin mga palma.

¹⁴ Nagin mga oripon ni Eglon an mga Israelita sa laog nin dyes y otsong taon.

¹⁵ Dangan nag-agrangay an mga Israelita sa Kagurangnan kaya nagsugo an Kagurangnan nin sarong lalaki na maligtas sainda. Siya si Ehud, sarong walahon na lalaki na aki ni Gera, na gikan sa tribu ni Benjamin. Sinugo si Ehud kan banwaan nin Israel pasiring ki Hadeng Eglon kan Moab dara an mga regalo para sa hade.

¹⁶ Guminibo si Ehud nin sarong espadang duwa an tarom na mga singkwenta sentimetro an laba, asin iginakod niya iyan sa too niyang tabay, sa irarom kan saiyang gubing.

¹⁷ Dangan dinara niya an mga regalo ki Hadeng Eglon, na sarong lalaking sobra an taba.

¹⁸ Kan ikinatao na ni Ehud an dara niyang mga regalo, pinapuli niya an mga lalaking nagdara kaini.

¹⁹ Alagad pag-abot niya sa mga inukitan na gapo sa Gilgal, nagbalik siya ki Eglon asin nagsabi, “Mahal na hade, igwa akong sekretong mensahe para saimo.” Kaya nagboot an hade sa saiyang mga oripon, “Hale kamo digdi!” Nagharale an mga oripon.

²⁰ Dangan mantang solong nagtutukaw an hade duman sa saiyang mahayahay na kwarto sa atop kan harong, duminolok si Ehud saiya asin nagsabi, “Igwa akong mensahe para saimo hale sa Dios.” Nagbuhat an hade.

²¹ Binulnot ni Ehud kan wala niyang kamot an espadang iginakod niya sa too niyang tabay dangan sinaksak an hade sa tulak.

²² Nakalaog sa tulak kan hade an bilog na espada, tarom sagkod pulo, asin natahoban iyan kan taba kan hade. Dai na hinugot ni Ehud an espada na an poro luminagbas sa likod kan hade, sa pagultanan kan saiyang mga bitis.

²³ Pakatapos kaini, luminuwas si Ehud sa kwarto, isinera an pinto,

²⁴ dangan naghale. Pagbalik kan mga oripon, nahiling nindang serado an pinto kaya naghona sinda na nagkakasilyas sana an hade.

²⁵ Naghalat sinda, alagad kan malangkag na, ta dai pa nagluluwas an hade, kinua ninda an lyabe asin binukasan an pinto; nakua nindang gadan na an saindang hade, nakatihaya sa salog.

²⁶ Nakadulag si Ehud mantang naghahalat an mga oripon. Inagihan niya an mga inukitan na gapo asin duminulag siya pasiring sa Seira.

²⁷ Pag-abot niya duman sa mabulod na daga nin Efraim, pinatanog niya an trompeta tanganing apodon para sa pakilaban an kalalakihan nin Israel. Hale sa kabubuldan, pinangenotan niya sinda.

²⁸ Nagsabi siya, “Sumunod kamo sako, huli ta itinao na saindo nin Kagurangnan an kapangganahan laban sa mga kaiwal nindong mga Moabita.” Kaya nagsurunod sinda ki Ehud, asin nasakop ninda an lugar sa Jordan na pinagbabalyohan kan mga Moabita; dai ninda tinugotan na makabalyo sa ibong an siisay man.

²⁹ Kan aldaw na idto, ginadan ninda an may mga sampolong ribo kan pinakamarahay na soldados kan mga Moabita asin mayo nin nakadulag sainda maski saro.

³⁰ Kan aldaw na idto, dinaog kan mga Israelita an Moab, asin nagkaigwa nin katoninongan sa daga sa laog nin otsentang taon.

Si Samgar

³¹ An suminunod saiya iyo si Samgar na aking lalaki ni Anat. Ilinigtas man niya an Israel kan gadanon niya an seis syentos na Filisteo sa paagi kan saiyang sugkod na pang-alaw sa mga baka.