Hukom 20 - Marahay na Bareta Biblia

Nag-andam an Israel sa Pakigera

¹ Nagtiripon sa Mizpa sa atubang nin Kagurangnan an gabos na Israelita magpoon sa Dan sagkod sa Beer-sheba, sagkod kan mga taga Gilead.

² An gabos na namamayo kan mga tribu nin Israel yaon duman sa pagtiripon kan banwaan nin Dios siring man an apat na gatos na ribong soldados.

³ An pangyayaring ini, na nagtiripon an ibang mga Israelita sa Mizpa, naaraman kan mga Benjaminita. Naghapot an mga Israelita, “Sabihan samo kun paano nangyari an karatan na ini?”

⁴ Nagsimbag an Levita na agom kan babaeng ginadan, “An sakong kasaroan asin ako nagduman sa Gibea na nasa teritoryo ni Benjamin tanganing magpalihis kan banggi.

⁵ Kan bangging idto boot akong salakayon kan kalalakihan sa Gibea kaya pinalibotan ninda an harong. Boot ninda akong gadanon; alagad embes na ako, an sakong kasaroan an saindang inabuso na ikinagadan niya.

⁶ Ipinuli ko an saiyang bangkay asin sakong pinedaso dangan ipinadara sa doseng tribu nin Israel. Nakagibo nin dakulang karigsokan sa bilog na Israel an mga Benjaminita.

⁷ Mga Israelita kamo gabos na uya digdi. Ano an satong gigibohon manongod sa bagay na ini?”

⁸ Sarabay na nagtirindog an gabos na Israelita dangan nagsabi, “Mayo nin siisay man na mapuli samo, nag-eerok man siya sa tolda o sa harong.

⁹ Arog kaini an satong gigibohon: sa paagi nin pagripa, mapili kita kun siisay an masalakay sa Gibea.

¹⁰ An ikasampolong parte kan Israel iyo an mamamahala kan pagpakakan kan hukbo, asin an iba iyo an maduman sa Gibea tanganing padusahan sa ginibong karigsokan sa Israel.”

¹¹ Kaya nagtiripon an bilog na kalalakihan nin Israel na igwa nin saro sanang katuyohan—tanganing salakayon an banwa nin Gibea.

¹² Nagpadara nin mga sugo an mga Israelita sa bilog na teritoryo ni Benjamin asin nagsabi, “Anong karatan ini na saindong ginibo?

¹³ Kaipuhan isuko nindo an mga marigsok na lalaki kan Gibea tanganing gadanon mi asin tanganing mahale an karatan sa Israel.” Alagad dai sinda dinangog kan mga Benjaminita.

¹⁴ Nagtiripon sa Gibea an mga Benjaminita hale sa manlaen-laen na syudad tanganing labanan an ibang mga Israelita.

^15-16 Sa aldaw na idto, nakatipon sinda nin beynte y seis mil na kalalakihan hale sa mga syudad. Laen pa kaiyan, an mga taga Gibea nakatipon nin pitong gatos na piling mga lalaki na anas walahon; an lambang saro sainda pwedeng patamaan an sarong buhok kan lagpitaw asin dai nanggad magpaltos.

¹⁷ An ibang mga Israelita na bakong kabilang sa mga Benjaminita, nakatipon nin apat na gatos na ribong soldados; an lambang saro tood sa pakilaban.

An Gera Laban sa mga Benjaminita

¹⁸ Nagduman an mga Israelita sa lugar na pinagsasambahan sa Betel asin naghapot sinda sa Dios, “Arin sa mga tribu an enot na masalakay sa mga Benjaminita?” Nagsimbag an Kagurangnan, “An tribu ni Juda.”

¹⁹ Kaya kan sunod na aldaw, nagkampo an mga Israelita sa may syudad nin Gibea.

²⁰ Pinaatubang ninda sa syudad an saindang mga soldados tanganing salakayon an hukbo ni Benjamin.

²¹ Dangan nagluwas sa syudad an hukbo ni Benjamin, asin bago natapos an aldaw, beynte y dos mil na Israelita an saindang nagadan.

^22-23 Dangan nagduman an mga Israelita sa lugar na pinagsasambahan asin nagmondo sa atubang nin Kagurangnan sagkod magbanggi. Pakatapos, naghapot sinda saiya, “Makikilaban pa daw kami sa samong mga tugang na Benjaminita?” Sinimbag sinda nin Kagurangnan, “Labanan nindo sinda.”

²⁴ Kaya sa ikaduwang beses nakilaban an mga Israelita sa mga Benjaminita.

²⁵ Dangan nagluwas hale sa Gibea an mga Benjaminita asin nakilaban sainda sa ikaduwang beses; nakagadan sinda nin dyes y otso mil na Israelitang mga tood sa pakilaban.

²⁶ Dangan nagduman sa Betel an gabos na Israelita asin nagmondo. Nagturukaw sinda sa atubang nin Kagurangnan asin dai nagkakan sagkod sa banggi. Nagdolot sinda nin mga tinutong na atang asin mga dolot para sa katoninongan sa atubang nin Kagurangnan.

^27-28 An Kaban nin Tipan nin Dios yaon kaidto sa Betel asin si Finehas na aking lalaki ni Eleazar asin makoapo ni Aaron iyo an nangangataman kaiyan. Naghapot sa Kagurangnan an mga tawo, “Makikilaban pa daw kami sa samong mga tugang na Benjaminita o dai na?” Nagsimbag an Kagurangnan, “Labanan nindo. Itatao ko saindo an kapangganahan sa aga.”

²⁹ Kaya nagkapirang soldados an pinatago kan mga Israelita sa palibot nin Gibea.

³⁰ Dangan sa ikatolong beses nagmartsa sinda laban sa hukbo ni Benjamin asin nagbugtak nin mga soldados sa atubang nin Gibea arog kan mga naenot na aldaw.

³¹ Nagluwas an mga Benjaminita asin napaharayo sa syudad. Siring sa dati, pinoonan nindang gadanon an mga Israelita duman sa kahiwasan sa dalan pasiring sa Betel asin sa dalan pasiring sa Gibea. Nakagadan sinda nin mga treyntang Israelita.

³² Dangan nagsarabi sinda, “Daog ta na naman an mga Israelita arog kan mga naenot na laban.” Alagad nasa plano na kan mga Israelita na sinda magdulag ngona tanganing mapaharayo an mga kaiwal asin makaduman sa kahiwasan.

³³ Kaya kan an kabilogan kan hukbo nin Israel makadulag asin magkatiripon giraray sa Baal-tamar, biglang nagruluwas an mga soldados na nagtarago sa magapong mga lugar sa palibot kan syudad.

³⁴ Mga dyes mil na piling kalalakihan hale sa Israel an nagsalakay sa Gibea; nagin mangirhat an ralaban. Dai naaaraman kan mga Benjaminita na magkakagaradan sinda.

³⁵ Itinao nin Kagurangnan sa Israel an kapangganahan laban sa hukbo kan mga Benjaminita. Beynte y singko mil may sanggatos na kaiwal an nagadan kan mga Israelita kan aldaw na idto.

³⁶ Dangan naaraman kan mga Benjaminita na daog na sinda. An kadaklan kan hukbo nin Israel nagdulag sa atubang kan mga Benjaminita huli ta naglaom sinda sa mga soldados na nagtarago sa palibot kan Gibea.

Kun Paano Nanggana an mga Israelita

³⁷ An mga soldados na ini biglang nagdaralagan pasiring sa Gibea asin nagralaog sa syudad dangan ginadan an gabos na yaon duman.

³⁸ Nagkasinabotan an kadaklan kan hukbo nin Israel asin an mga nagtaragong soldados. Sa oras na nahiling kan mga Israelita na yaon duman sa kahiwasan an mahibog na aso na nag-iitaas sa syudad,

³⁹ mabaralik sinda. Sa panahon na idto, ginadan na kan mga Benjaminita an treyntang Israelita asin nagsarabi sinda, “Daog ta na naman sinda arog kan naenot na laban.”

⁴⁰ Dangan nagtunga an tanda; nagpoon mag-itaas an aso hale sa syudad. Nagsalingoy an mga Benjaminita asin nagngalas sinda pakahiling na nagkakalayo an bilog na syudad.

⁴¹ Dangan nagbalik an mga Israelita asin nataranta an mga Benjaminita huli ta naaraman ninda na madali na sindang magkagaradan.

⁴² Kaya nagdulag sinda sa mga Israelita dangan nagdalagan pasiring sa kahiwasan, alagad dai sinda nakadulag. Nakulong sinda kan kadaklan kan hukbo nin Israel saka kan mga lalaking nagruluwas hale sa syudad, asin nagkagaradan sinda.

⁴³ Napalibotan kan mga Israelita an saindang mga kaiwal asin daing ontok nindang linamag an nagdurulag sagkod sa sirangan na parte kan Gibea, dangan duman ninda ini ginaradan.

⁴⁴ Mga dyes y otso mil kan pinakamarahay na soldados kan mga Benjaminita an nagkagaradan.

⁴⁵ An iba nagbalik asin nagdalagan pasiring sa kahiwasan sa may Gapo nin Rimmon. Limang ribo sainda an nagadan sa mga dalan. Dai nag-ontok an mga Israelita sa paglamag sa mga nagdurulag pasiring sa Gidom, asin nakagadan pa sinda nin duwang ribong kaiwal.

⁴⁶ An kagabsan kan mga nagadan kan aldaw na idto sa mga Benjaminita uminabot sa beynte y singko mil; gabos sinda mga maiisog na soldados.

⁴⁷ Alagad anom na gatos na kalalakihan an nakadulag pasiring sa kahiwasan, sa Gapo nin Rimmon, asin duman sinda nag-erok sa laog nin apat na bulan.

⁴⁸ Nagbalik an mga Israelita asin ginadan ninda an mga natadang Benjaminita—lalaki, babae, aki sagkod hayop. Dangan sinulo ninda an lambang banwa sa lugar na idto.