Hukom 19 - Marahay na Bareta Biblia

An Levita asin an Saiyang Kasaroan

¹ Kan mga aldaw na idto, kan dai pa nin hade an Israel, igwa nin sarong Levita na nag-eerok sa mabulod na daga nin Efraim. Nagkua siya nin sarong babae na taga Betlehem sa Juda tanganing magin saiyang kasaroan.

² Alagad naanggot saiya an babae dangan nagpuli sa harong nin saiyang ama sa Betlehem sa Juda asin duman nag-erok sa laog nin apat na bulan.

³ Nagdesider an lalaki na sosogon siya asin pakiolayan na umiba giraray saiya. Kaya ipinag-iba niya an saiyang sorogoon asin an duwang asno. Pag-abot duman, pinadagos siya kan babae asin kan mahiling siya kan ama kaini, maogma siyang sinabat.

⁴ Pinugolan siya kan saiyang panugangan, kaya nag-erok siya duman sa laog nin tolong aldaw. Nagkakan sinda saka nag-inom asin nagkatorog duman.

⁵ Amay sindang nagbangon kan ikaapat na aldaw asin nag-andam nang maglakaw, alagad sinabihan an Levita kan saiyang panugangan, “Magkakan ka ngona bago maghale. Marahay iyan para saimo.”

⁶ Kaya nagtukaw an duwang lalaki asin nagkakan saka nag-inom. Dangan sinabihan siya kan ama kan babae, “Magpaaga ka na asin mag-ogma.”

⁷ Nagtindog an Levita tanganing maghale, alagad pinugolan siya kan saiyang panugangan kaya duman giraray siya nagkatorog.

⁸ Amay siyang nagbangon kan ikalimang aldaw asin nag-andam nang maglakaw alagad nagsabi an ama kan babae, “Magkakan ka ngona bago maghale. Magpahapon ka na sana.” Kaya nagkakan sindang duwa.

⁹ Kan magtindog na tanganing maglakaw an lalaki asin an saiyang kasaroan patin an saiyang sorogoon, nagsabi an ama kan babae, “Nagdidiklom na, kaya digdi na ngona kamo magpaaga. Mag-ogma ka asin sa agang amay ka na maghale.”

^10-11 Alagad habo nang magpapugol an lalaki, kaya naglakaw na siya kaiba an kasaroan, an sorogoon asin an duwang asnong igwa nin kamadero. Nagbabanggi na pag-abot ninda sa lugar na harani sa Jebus (o Jerusalem), kaya nagsabi an sorogoon sa saiyang amo, “Digdi na ngona kita magpaaga sa syudad na ini kan mga Jebuseo.”

^12-13 Nagsimbag an saiyang amo, “Dai kita maontok sa lugar na ini na bako man mga Israelita an nag-eerok kundi maderetso kita pasiring sa Gibea o sa Rama.”

¹⁴ Kaya inagihan ninda an Jebus asin nagpadagos sinda sa paglakaw. Solnop na an aldaw kan makaabot sinda sa Gibea sa teritoryo ni Benjamin.

¹⁵ Naglaog sinda sa syudad asin nagtukaw sa plasa kan banwa, alagad mayo nin siisay man na nag-alok sainda na magkatorog sa saiyang harong.

¹⁶ Dangan nag-agi duman an sarong gurang na lalaki na hale pa sana sa pagtrabaho sa oma. Dati siyang nag-eerok sa mabulod na daga nin Efraim, alagad nag-eerok na siya ngunyan sa Gibea. (An ibang mga nag-eerok sa Gibea gikan sa tribu ni Benjamin.)

¹⁷ Nahiling kan gurang na lalaki an parabaklay na yaon duman sa plasa kan banwa, kaya hinapot niya, “Saen ka hale? Saen ka maduman?”

¹⁸ Nagsimbag an Levita, “Hale kami sa Betlehem sa Juda asin ngunyan papuli na kami sa samong harong sa mabulod na daga nin Efraim. Mayo nin siisay man na nag-alok samo na magkatorog sa saiyang harong ngunyan na banggi

¹⁹ maski igwa man kami nin darang dagami para sa mga asno asin tinapay saka arak para sa kasaroan ko patin sa sakong sorogoon. Igwa kami kan gabos ming kaipuhan.”

²⁰ Nagsimbag an gurang na lalaki, “Duman na kamo magpaaga sa sakong harong. Aatamanon ko kamo; dai sana kamo magpaaga digdi sa plasa.”

²¹ Kaya ipinag-iba niya sinda sa saiyang harong dangan pinakakan niya an mga asno. Naghugas kan saindang bitis an mga bisita dangan nagkarakan.

²² Mantang nag-oogma sinda, biglang pinalibotan an harong kan gurang nin nagkapirang marigsok na kalalakihan kan banwa, dangan tinubtob an pinto. Sinabihan ninda an gurang, “Paluwasa an lalaking kaiba mo pagpuli sa saimong harong tanganing madorogan mi siya!”

²³ Alagad nagluwas sa harong an gurang asin nakiolay sainda, “Dai nindo paggibohon iyan. An lalaking ini sakong bisita. Dai kamo maggibo kan siring na karatan.

²⁴ Uya an saiyang kasaroan asin an sakong aking daraga; iluluwas ko sinda. Gibohon nindo sainda an boot nindo, alagad dai nindo paggibohon an siring na karatan sa lalaking ini.”

²⁵ Alagad habong magdangog saiya an kalalakihan kaya ilinuwas sainda kan Levita an saiyang kasaroan. Dinorogan ini kan kalalakihan asin inabuso sa bilog na banggi. Dai sinda nag-ontok sagkod na mag-aga.

²⁶ Kan nagliliwanag na, nag-abot an babae asin natumba sa may pintoan kan harong kan gurang na lalaki; duman na siya inabotan kan pagsirang kan aldaw.

²⁷ Kan bukasan kan Levita an pinto tanganing maghale na, nakua niya an saiyang kasaroan na nakahigda sa atubang kan harong na an mga kamot nakaunat sa pag-abot kan pintoan.

²⁸ Sinabihan niya an babae, “Bumangon ka; mahale na kita.” Alagad dai ini nagsimbag saiya. Kaya ilinunad niya an bangkay kan babae sa asno dangan naglakaw papuli sa saiyang harong.

²⁹ Pag-abot niya duman, kinua niya an sarong kutsilyo. Dangan kinua niya an bangkay kan saiyang kasaroan asin pinutol sa doseng pedaso. Pakatapos, ipinadara niya an lambang pedaso sa doseng tribu kan Israel.

³⁰ An lambang saro na nakahiling kaini nagsabi, “Mayo pa nin nangyaring arog kaini poon na maghale sa Egipto an mga Israelita. Dapat maghiro kita manongod sa bagay na ini, alagad ano?”