Hukom 18 - Marahay na Bareta Biblia

Si Micas asin an Tribu ni Dan

¹ Dai pa kaidto nin hade sa Israel. Kan panahon na idto, an tribu ni Dan padagos na naghahanap nin lugar na saindang masasadirihan huli ta sa mga tribu nin Israel, sinda na sana an dai pa nakakakua nin daga.

² Kaya nagpili sinda nin limang maiisog na lalaki hale sa gabos na pamilya kan tribu, dangan saindang sinugo hale sa mga banwa nin Zora saka Estaol tanganing maghanap nin daga. Pag-abot ninda sa mabulod na daga nin Efraim, nagdagos sinda sa harong ni Micas.

³ Namidbidan ninda an punto kan pagtaram kan hoben na Levita kaya dinolok ninda siya asin hinapot, “Ano an ginigibo mo digdi? Siisay an nagdara saimo digdi?”

⁴ Nagsimbag an Levita, “Nagka-oyon kami ni Micas; binabayadan niya ako asin naglilingkod ako saiya bilang padi.”

⁵ Nagsabi sinda saiya, “Pakihapot man sa Dios kun magigin marahay an lakaw ming ini.”

⁶ Nagsimbag an padi, “Lakaw kamo sa katoninongan. Inaataman kamo nin Kagurangnan sa lakaw nindong ini.”

⁷ Kaya naghale an limang lalaki asin nagduman sa banwa nin Lais. Nahiling ninda an mauswag na pamumuhay kan mga tawo duman, arog kan mga taga Sidon. Mga matoninong sinda, trangkilo an isip asin dai nagkukulang nin ano man. An lugar ninda harayo sa Sidon asin dai sinda nin pakilabot sa ibang banwa.

⁸ Kan magbalik sinda sa Zora saka Estaol, hinapot sinda kan saindang mga kahimanwa kun ano an nangyari sa lakaw ninda.

⁹ Nagsabi sinda, “Magayon asin matubang an daga duman, kaya dai kita magparahaloy digdi na mayong gibo. Madya asin salakayon ta sinda tanganing masadirihan ta an daga.

¹⁰ Pag-abot nindo duman, mahihiling nindo na dai lamang nagsususpetsa an mga tawo. Mahiwas an daga asin yaon duman an gabos na kaipuhan nin siisay man. Itinatao idto nin Dios sa saindo.”

¹¹ Kaya naglakaw hale sa Zora saka Estaol an anom na gatos na armadong kalalakihan kan tribu ni Dan.

¹² Nagkampo sinda duman sa solnopan kan Kiriat-jearim sa Juda. Kaya sagkod ngunyan an lugar na idto inaapod Kampo ni Dan.

¹³ Hale duman, nagpasiring sinda sa harong ni Micas na nasa mabulod na daga nin Efraim.

¹⁴ Dangan an limang espiya na nagsiyasat kan daga sa palibot nin Lais, nagsabi sa saindang kairiba, “Aram nindo, an saro kan mga harong digdi igwa nin dios-dios na gibo sa kahoy na napapatos nin plata asin iba pang dios-dios patin sarong efod. Ano sa paghona nindo an dapat tang gibohon?”

¹⁵ Kaya nagduman sinda sa harong ni Micas saen nag-eerok an hoben na Levita asin kinomusta ninda siya.

¹⁶ Mantang an anom na gatos na armadong lalaki kan tribu ni Dan nagtirindog sa may trangkahan,

¹⁷ luminaog sa harong an limang espiya na nagsiyasat sa daga dangan kinua an dios-dios na gibo sa kahoy na napapatos nin plata, an iba pang dios-dios asin an efod. An padi yaon duman sa trangkahan kaiba an anom na gatos na armadong kalalakihan.

¹⁸ Kan maglaog sa harong an limang lalaki asin kuahon an mga sagradong bagay, hinapot sinda kan padi, “Ano an ginigibo nindo?”

¹⁹ Sinabihan ninda siya, “Dai ka magribok. Mag-alo ka sana. Umiba ka samo asin ika na an samong magigin padi saka parahatol. Ano an boot mo, an maglingkod sa saro sanang pamilya o sa sarong tribu nin Israel?”

²⁰ Ikinaogma ini kan padi, kaya kinua niya an sagradong mga bagay asin nag-iba sa sainda.

²¹ Nagpadagos sinda sa paglakaw. Pinaenot ninda an saindang mga aki, mga hayop, patin mga pagsadiri.

²² Kan harayo na sinda sa harong ni Micas, inapod ni Micas an saiyang mga kataraed dangan linamag ninda an kalalakihan ni Dan. Naabotan ninda sinda

²³ asin kinurahawan. Inatubang sinda kan tribu ni Dan dangan hinapot si Micas, “Ano an nangyari saimo ta dakul an saimong kairiba?”

²⁴ Nagsimbag si Micas, “Tano ta naghahapot kamo kun ano an nangyari sako? Kinua nindo an sakong padi asin mga dios-dios na ginibo ko dangan nagharale kamo! Ano pa an natada sako?”

²⁵ Sinabihan siya kan kalalakihan ni Dan, “Mas marahay pang mag-ontok ka tanganing dai maanggot saimo an mga lalaking ini. Tibaad magadan ka asin an saimong pamilya.”

²⁶ Dangan nagpadagos sa paglakaw an tribu ni Dan. Nahiling ni Micas na mas makosog sinda ki sa saiya kaya nagpuli na sana siya.

²⁷ Kaiba an padi asin dara an mga ginibo ni Micas, nagduman sa Lais an kalalakihan ni Dan. Sinalakay ninda asin ginaradan an matoninong na mga tawo sa Lais dangan sinulo ninda an banwa.

²⁸ Dai nin nakatabang sa mga taga Lais huli ta harayo sinda sa Sidon asin dai sinda nin pakilabot sa ibang banwa; an saindang lugar nasa kapantayan kan Bet-rehob. Pakatapos kaini, pinakarahay giraray kan kalalakihan ni Dan an syudad asin duman na sinda nag-erok.

²⁹ Embes na Lais, an lugar nginaranan nindang Dan, sunod sa ngaran kan saindang ginikanan na si Dan, na aki ni Jacob.

³⁰ Dangan ibinugtak ninda an mga dios-dios sa sarong lugar tanganing sambahon; si Jonatan na aking lalaki ni Gerson asin makoapo ni Moises iyo an naglingkod bilang padi kan mga taga Dan. An mga aking lalaki ni Jonatan iyo an padagos na naglingkod bilang padi bago nasakop an daga.

³¹ Dai man hinale an mga dios-dios ni Micas mantang nasa Shilo an Tabernakulo nin Dios.