Hukom 17 - Marahay na Bareta Biblia

An mga Dios-dios ni Micas

¹ Igwa kaidto nin lalaki na an ngaran Micas, na nag-erok sa mabulod na daga nin Efraim.

^2-3 Sinabihan niya an saiyang ina, “Kan habonon saimo an mil syen na pedasong plata, nadangog takang minaldisyon mo an naghabon. Uya an kwarta; ako an kuminua kaya ipinupuli ko na saimo.” Dangan itinao niya an kwarta sa saiyang ina. Nagsabi an saiyang ina, “Bendisyonan ka logod nin Kagurangnan, aki ko! Alagad tanganing dai mapasaimo an maldisyon, idinodolot ko sa Kagurangnan ining plata. Gagamiton ini sa paggibo nin sarong dios-dios na gibo sa kahoy asin napapatos nin plata. Kaya itatao ko giraray saimo an kwarta.”

⁴ Kan ibalik ni Micas an kwarta sa saiyang ina, nagkua ini nin duwang gatos na pedasong plata asin itinao sa sarong platero na guminibo nin dios-dios na inukit hale sa kahoy asin pinatos nin plata. An dios-dios ibinugtak sa harong ni Micas.

⁵ Igwa si Micas nin sadiring lugar na pagsasambahan. Guminibo siya nin iba pang dios-dios asin efod, dangan ginibo niyang padi an saro kan mga aki niyang lalaki.

⁶ Dai pa nin hade kaidto sa Israel, kaya an lambang saro naggigibo kan pinaghohona niyang tama.

⁷ Kan panahon na idto igwa nin sarong hoben na Levita na nag-eerok sa banwa nin Betlehem nin Juda.

⁸ Naghale siya sa Betlehem tanganing maghanap nin ibang lugar na maeerokan. Sa paglakaw niya, nakaabot siya sa harong ni Micas duman sa mabulod na daga nin Efraim.

⁹ Hinapot siya ni Micas, “Taga saen ka?” Nagsimbag siya, “Saro akong Levita na taga Betlehem sa Juda. Naghahanap ako nin lugar na maeerokan.”

¹⁰ Nagsabi si Micas, “Digdi ka sako. Gigibohon takang parahatol asin padi. Tatawan taka nin sampolong pedasong plata taon-taon, mga gubing asin saimong pagkakan.”

¹¹ Naoyonan kan hoben na Levita na mag-erok sa kaibahan ni Micas, asin siya nagin garo aki ni Micas.

¹² Ginibo siyang padi ni Micas asin duman na siya nag-erok.

¹³ Dangan nagsabi si Micas, “Ngunyan na igwa na ako nin sarong Levita bilang padi, aram kong papauswagon ako nin Kagurangnan.”