Hukom 16 - Marahay na Bareta Biblia

Si Samson sa Gaza

¹ Sarong aldaw, nagduman si Samson sa Gaza, sarong syudad kan mga Filisteo. Nakahiling siya duman nin sarong maraot na babae asin dinorogan niya.

² Naaraman kan mga taga Gaza na yaon duman si Samson, kaya pinalibotan ninda an lugar asin hinalat siya sa may trangkahan kan syudad sa bilog na banggi. Dai sana sinda naggirong kan bangging idto asin nagsaboot, “Mahalat kita digdi sagkod na magsirang an aldaw; dangan ta siya gadanon.”

³ Alagad naghigda sana si Samson sagkod sa kamatangaan kan banggi. Dangan nagbangon siya asin kinapotan an trangkahan kan syudad, binulnot ini kaiba an mga pinto, mga harigi asin barat; pinasan niya ini gabos asin dinara pasiring sa itaas kan bulod na nakadungaw sa Hebron.

Si Samson asin si Delila

⁴ Pakatapos kaini, namoot si Samson sa sarong babaeng an ngaran Delila duman sa Kapantayan nin Sorek.

⁵ Dinuman si Delila kan limang hade kan mga Filisteo asin sinabihan, “Dagkahon mo si Samson na sabihan ka kun ano an nagpapakosog saiya, asin aramon mo kun paano ta siya madadaog tanganing magapos ta siya asin dai na makalaban. Kun magibo mo iyan, an lambang saro samo matao saimo nin mil syen na pedaso nin plata.”

⁶ Kaya sinabihan ni Delila si Samson, “Sabihan daw sako kun saen naghahali an kosog mo, asin kun paano ka gagaposon tanganing dai ka na makalaban.”

⁷ Nagsimbag si Samson, “Kun gaposon ninda ako nin pitong bagong lubid kan pana na bako pang alang, magigin maluya ako siring sa ibang tawo.”

⁸ Kaya dinarahan si Delila kan mga hade kan mga Filisteo nin pitong bagong lubid kan pana na bako pang alang dangan ginapos ni Delila si Samson kaini.

⁹ Sa ibong na kwarto, igwang mga lalaking naghahalat, kaya nagkurahaw si Delila, “Samson, uya na an mga Filisteo!” Alagad pinatod ni Samson an mga lubid kan pana na garo sana mga torsidong nadutaan nin kalayo, kaya dai man giraray ninda naaraman an sekreto kan saiyang kosog.

¹⁰ Nagsabi si Delila ki Samson, “Tinutuyatuya mo ako asin nagputik ka sako. Sabihan na sako kun paano ka magagapos.”

¹¹ Sinabihan siya ni Samson, “Kun gaposon nindo ako nin mga bagong pisi na dai pa ginamit, magigin maluya ako siring sa ibang tawo.”

¹² Kaya kuminua si Delila nin bagong mga pisi dangan ginapos siya. Pakatapos nagkurahaw siya, “Samson, uya na an mga Filisteo!” Naghahalat sa ibong na kwarto an mga lalaki. Alagad pinatod ni Samson an mga pisi na garo sana mga torsido.

¹³ Kaya sinabihan ni Delila si Samson, “Sagkod ngunyan tinutuya-tuya mo ako, asin anas putik an sinabi mo sako. Sabihan na sako kun paano ka magagapos.” Sinabihan siya ni Samson, “Kun habolon mo an pitong sinalapid kong buhok asin ikaporopot mo iyan sa sarong taldok, magigin maluya ako siring sa ibang tawo.”

¹⁴ Kaya pinakatorog ni Delila si Samson dangan hinabol niya an pitong sinalapid na buhok ni Samson. Pakatapos, ipinoropot niya idto sa sarong taldok, dangan nagkurahaw siyang, “Samson, uya na an mga Filisteo!” Alagad nagmata si Samson asin binulnot an saiyang buhok sa habolan.

¹⁵ Kaya nagsabi si Delila saiya, “Paano mong nasasabi na namomoot ka sako mantang dai man sako an puso mo. Tolong beses mo na akong tinuya-tuya asin dai mo pa itinutuga sako kun ano an nakakapakosog saimo.”

¹⁶ Dangan inoro-aldaw ni Delila an paghapot asin pagpirit ki Samson. Nauyam si Samson sa kapipirit ni Delila,

¹⁷ kaya isinabi niya an katotoohan. “Dai pa nadutaan nin labaha an sakong buhok, huli ta nasa tulak pa sana ako kan sakong ina, idinusay na ako sa Dios bilang sarong Nazireo. Kaya kun maputol an sakong buhok, mawawara an sakong kosog asin magigin maluya ako siring sa ibang tawo.”

¹⁸ Kan mahiling ni Delila na itinuga na ni Samson an katotoohan, nagpadara siya tolos nin mensahe sa mga hade kan mga Filisteo na nagsabi, “Bumalik kamo giraray huli ta aram ko na an katotoohan.” Nagbalik sinda saiya, dara na an kwarta.

¹⁹ Pinakatorog ni Delila si Samson sa saiyang mga paa dangan inapod an sarong lalaki na nagputol kan pitong sinalapid na buhok ni Samson. Pakatapos, pinonan niya an pagpasakit ki Samson huli ta nawara na an dati kaining kosog.

²⁰ Dangan nagkurahaw si Delila, “Samson, uya na an mga Filisteo!” Nagmata si Samson dangan nagsaboot, “Makakaligtas ako siring kan mga enot na nangyari.” Dai pa niya naisihan na binayaan na siya nin Kagurangnan.

²¹ Dinakop siya kan mga Filisteo asin binuta. Dinara siya ninda sa Gaza saen kinadenahan siya nin bronseng kadena dangan pinatrabaho sa gilingan duman sa bilanggoan.

²² Alagad nagpoon na naman na magtalubo an saiyang buhok.

An Pagkagadan ni Samson

²³ Nagtiripon an mga hade kan mga Filisteo tanganing mag-orogma asin tanganing magdolot nin dakul na tinutong na atang sa saindang dios na si Dagon. Nag-arawit sindang, “Itinao sato kan satong dios an kapangganahan laban sa satong kaiwal na si Samson!”

^24-25 Kan maogma na sinda nin marahay, nagsabi sinda, “Padigdiha si Samson tanganing mapaogma niya kita! Kaya kinua ninda siya sa bilanggoan dangan pinag-olog-olog. Pinatindog siya ninda sa tahaw kan duwang harigi. Kan mahiling ninda si Samson, orog pa nindang inomaw an saindang dios: “Itinao sato kan satong dios an kapangganahan laban sa satong kaiwal, na nagraot kan satong daga, na guminadan kan dakul sa sato!”

²⁶ Nagsabi si Samson sa aking nag-antabay saiya, “Padutaa ako sa mga hariging nagpupugol kan edipisyong ini tanganing makahurandig ako.”

²⁷ Pano nin mga lalaki saka babae an edipisyo; yaon man duman an limang hade kan mga Filisteo, asin maabot sa tolong ribong lalaki saka babae an yaon duman sa atop, naghihiling kan ginigibo ni Samson.

²⁸ Dangan namibi si Samson, “O Kagurangnan Dios, giromdoma ako; maherak ka man sako, O Dios, asin pakosoga giraray ako, maski ngunyan na sana, tanganing makabalos ako sa mga Filisteo na nagbuta sako.”

²⁹ Dangan kinapotan ni Samson an duwang pantahaw na harigi na minapugol kan edipisyo, an lambang kamot niya sa sarong harigi, asin tinumba niya an mga ini.

³⁰ Nagkurahaw si Samson, “Tugoteng magadan na ako kaiba kan mga Filisteo.” Inubos niya an saiyang kosog, asin narumpag an edipisyo. Nagkadaratogan an limang hade asin an gabos na yaon duman. Mas dakul an nagadan ni Samson sa saiyang pagkagadan ki sa nagadan niya kan siya buhay pa.

³¹ An bangkay ni Samson kinua kan saiyang mga tugang na lalaki asin kan saiyang pamilya dangan ilinubong ninda sa pagultanan kan Zora asin Estaol, sa pantyon kan saiyang ama na si Manoa. Nagin hukom siya sa Israel sa laog nin beynteng taon.