Hukom 12 - Marahay na Bareta Biblia

Si Jefta asin an mga taga Efraim

¹ Nag-andam an kalalakihan nin Efraim para sa pakigera. Binalyo ninda an Jordan dangan nagpasiring sa Zafon. Sinabihan ninda si Jefta, “Tano ta luminampas ka kan pagdolonan asin nakilaban sa mga Ammonita na dai mo kami ipinaapod tanganing mag-iba saimo? Susuloon mi an saimong harong kaiba ka!”

² Alagad nagsimbag si Jefta, “Ako asin an sakong banwaan igwa nin makuring iriwal saka an mga Ammonita. Ipinaapod ko kamo alagad habo kamong magtabang sako.

³ Kan mahiling kong habo kamong magtabang, ibinugtak ko sa pag-alaman an sakong buhay, lunampas ako sa pagdolonan tanganing makilaban sainda. Tinabangan ako nin Kagurangnan kaya nanggana ako. Tano ta ngunyan boot nindo akong kalabanon?”

⁴ Dangan tiniripon ni Jefta an gabos na kalalakihan sa Gilead asin linabanan ninda dangan dinaog an mga taga Efraim. (Nagsarabi an mga taga Efraim, “Kamong mga taga Gilead na yaon sa Efraim asin sa Manases, mga paradulag kamo sa Efraim!”)

⁵ Tanganing dai nin makadulag sa sainda, binantayan kan mga taga Gilead an mga lugar sa salog na pwedeng pagbalyohan. Kaya kun an sarong taga Efraim na naghihingowang makadulag minapaising magbalyo, hinahapot siya kan mga lalaking taga Gilead, “Taga Efraim ka ano?” Kun magsimbag siyang, “Bako,”

⁶ pinapasabi ninda ini nin “Shibbolet.” Alagad “Sibbolet” an nasasabi niya huli ta dai niya aram an tamang pagsabi kaiyan. Dangan dinadakop ninda siya asin ginagadan duman sa lugar na pwedeng pagbalyohan sa Jordan. Kan panahon na idto, kwarenta y dos mil an nagkagaradan sa mga taga Efraim.

⁷ Nagin hukom si Jefta sa Israel sa laog nin anom na taon. Dangan nagadan siya asin ilinubong sa sadiri niyang banwa sa Gilead.

Si Ibzan, Elon asin si Abdon

⁸ Pagkagadan ni Jefta, si Ibzan na taga Betlehem an nagin hukom sa Israel.

⁹ Igwa siya nin treyntang aking lalaki asin treyntang aking babae. Ipinaagom niya an mga aki niyang babae sa mga lalaking bako kabilang sa saiyang kamaganakan. Kuminua man siya sa luwas kan saiyang kamaganakan nin treyntang babae tanganing magin agom kan mga aki niyang lalaki. Nagin hukom siya sa Israel sa laog nin pitong taon,

¹⁰ dangan nagadan siya asin ilinubong sa Betlehem.

¹¹ Pakatapos ni Ibzan, si Elon na hale sa Zabulon an nagin hukom sa Israel sa laog nin sampolong taon.

¹² Dangan nagadan siya asin ilinubong sa Aijalon sa daga nin Zabulon.

¹³ Pakatapos ni Elon, si Abdon na aking lalaki ni Hillel na taga Piraton an nagin hukom sa Israel.

¹⁴ Igwa siyang kwarentang aking lalaki asin treyntang makoapong lalaki na gabos nagsarakay sa setentang asno. Nagin hukom si Abdon sa Israel sa laog nin walong taon.

¹⁵ Dangan nagadan siya asin ilinubong sa Piraton na nasa daga ni Efraim, sa mabulod na daga kan mga Amalekita.