Hukom 10 - Marahay na Bareta Biblia

Si Tola

¹ Pagkagadan ni Abimelec, uminabot si Tola na aking lalaki ni Pua asin makoapo ni Dodo, tanganing iligtas an Israel. Gikan si Tola sa tribu ni Issakar asin nag-erok sa Samir, sa mabulod na daga ni Efraim.

² Siya an nagin hukom sa Israel sa laog nin beynte y tres na taon, asin kan siya magadan, ilinubong siya sa Samir.

Si Jair

³ Sunod ki Tola, uminabot si Jair na taga Gilead. Siya an nagin hukom sa Israel sa laog nin beynte y dos na taon.

⁴ Igwa siya nin treyntang aking lalaki na nagsarakay sa treyntang asno. Igwa sinda nin treyntang syudad duman sa Gilead na sagkod ngunyan inaapod na mga baryo ni Jair.

⁵ Nagadan si Jair asin ilinubong sa Kamon.

Si Jefta

⁶ Nagkasala giraray sa Kagurangnan an mga Israelita. Nagsaramba sinda sa mga Baal asin sa mga Astarte, patin sa mga dios-dios kan Siria, Sidon, Moab, Ammon asin Filistia. Binayaan ninda an Kagurangnan asin dai na nagsamba saiya.

⁷ Huli kaini, naanggot sainda an Kagurangnan asin tinugotan niyang sakopon sinda kan mga Filisteo asin kan mga Ammonita.

⁸ Sa laog nin dyes y otsong taon, pinasakitan ninda asin inapi an mga Israelita na nag-erok sa daga kan mga Amoreo na nasa sirangan kan Salog nin Jordan duman sa Gilead.

⁹ Nagbalyo pa sa Jordan an mga Ammonita tanganing labanan an mga tribu ni Juda, Benjamin, sagkod Efraim. Huli kaini, nagtios nin makuri an bilog na Israel.

¹⁰ Dangan nag-agrangay an mga Israelita sa Kagurangnan asin nagsabi, “Nagkasala kami saimo huli ta nagtalikod kami saimo na samong Dios dangan nagsamba sa mga Baal.”

¹¹ Nagtaram an Kagurangnan sainda, “Kan nakaaging panahon inapi kamo kan mga Egipcio, mga Amoreo, mga Ammonita, mga Filisteo,

¹² mga taga Sidon, mga Amalekita, asin mga Maonita, dangan nag-agrangay kamo sako. Bakong ilinigtas ko kamo sainda?

¹³ Alagad binayaan nindo ako asin sinamba nindo an ibang dios, kaya dai ko na kamo ililigtas.

¹⁴ Lakaw kamo, asin duman pag-agrangay sa mga pinili nindong mga dios-dios. Sinda an magligtas saindo sa panahon kan saindong kasakitan.”

¹⁵ Alagad nagsimbag sa Kagurangnan an banwaan nin Israel, “Nagkasala kami asin andam na mag-ako kan ano man na saimong pagmarahayon na gibohon samo; alagad ligtasan man kami ngunyan na aldaw.”

¹⁶ Kaya hinarale ninda an saindang dayuhan na mga dios asin nagsamba sa Kagurangnan. Huli kaini, naherak giraray an Kagurangnan sa kamugtakan nin Israel.

¹⁷ Dangan nag-andam sa pakigera an hukbo kan mga Ammonita asin nagkampo sa Gilead. Nagtiripon man an kalalakihan kan Israel asin nagkampo sa Mizpa na nasa Gilead.

¹⁸ Naghinarapotan an mga lider kan mga tribu nin Israel asin an gabos na yaon duman, “Siisay an mangengenot sato sa pakilaban sa mga Ammonita? An makagibo kaiyan, iyo na an mimidbidon na lider kan gabos na uya digdi sa Gilead.”