Hukom 1 - Marahay na Bareta Biblia

Nabihag si Adonibezek kan mga Tribu ni Juda asin ni Simeon

¹ Pakagadan ni Josue, hinapot an Kagurangnan kan banwaan nin Israel, “Arin sa mga tribu an enot na masalakay sa mga Cananeo?”

² Nagtaram an Kagurangnan, “Maeenot an tribu ni Juda; itatao ko an daga sa saindang mga kamot.”

³ Nagsabi an mga kaayon kan tribu ni Juda sa mga kaayon kan tribu ni Simeon, “Ibahan nindo kami sa pakilaban sa mga Cananeo na yaon sa lugar na ipinanongod para samo, asin iibahan mi man kamo sa lugar na ipinanongod para saindo.” Kaya boronyog na nakilaban an mga tribu ni Simeon

⁴ asin Juda. Pinapanggana sinda nin Kagurangnan laban sa mga Cananeo asin sa mga Perezeo; dinaog ninda an sampolong ribong kalalakihan duman sa Bezek.

⁵ Nanumpongan ninda duman si Adonibezek asin linabanan ninda.

⁶ Duminulag si Adonibezek, alagad linamag siya ninda, asin kan madakop ninda, pinurutol ninda an tanggurangan sa saiyang kamot sagkod bitis.

⁷ Nagsabi si Adonibezek, “Setentang mga hade na pinurutolan nin mga tanggurangan sa kamot sagkod bitis an nagpurot kan mga rakdag sa irarom kan sakong lamesa; ngunyan ginibo man sako nin Dios an ginibo ko sainda.” Dinara siya ninda sa Jerusalem asin duman siya nagadan.

Sinakop kan Tribu ni Juda an Jerusalem asin an Hebron

⁸ Sinalakay kan mga lalaki sa tribu ni Juda an Jerusalem dangan sinakop. Ginaradan ninda an mga tawo duman dangan sinulo an syudad.

⁹ Pakatapos, nakilaban sinda sa mga Cananeo na nag-erok sa mabulod na daga, sa kababan, asin sa habagat na parte kan Canaan.

¹⁰ Linabanan ninda an mga Cananeo na nag-erok sa syudad nin Hebron na dating inaapod Kiriat-arba. Dinaog ninda duman an mga kamaganakan ni Sesai, Ahiman, asin Talmai.

Sinakop ni Otniel an Syudad nin Debir

¹¹ Hale sa Hebron, nagmartsa an mga tawohan ni Juda pasiring sa syudad nin Debir na kaidto inapod Kiriat-sefer.

¹² Nagsabi an saro sainda na inapod Caleb, “Itatao ko bilang agom an daraga kong aki na si Acsa sa kiisay man na makasakop kan Kiriat-sefer.”

¹³ Si Otniel na aking lalaki ni Kenaz, na ngohod na tugang ni Caleb, an nakasakop kan syudad, kaya itinao saiya ni Caleb si Acsa bilang agom.

¹⁴ Sa aldaw kan kasal, sinabihan ni Otniel si Acsa na maghagad nin sarong oma sa ama niya. Nagbaba si Acsa sa asnong nalulunadan niya kaya hinapot siya ni Caleb kun ano an kaipuhan.

¹⁵ Nagsimbag si Acsa, “Boot kong magkaigwa nin mga burabod nin tubig. An dagang itinao mo sako yaon sa habagat na parte kan Canaan.” Kaya itinao saiya ni Caleb an mga burabod sa itaas asin sa ibaba.

Mga Kapangganahan kan mga Tribu ni Juda asin ni Benjamin

¹⁶ Hale sa Jerico, an syudad nin mga palma, nagpadagos sa paglakaw an tribu ni Juda kaiba an mga Cineo na kapagarakian kan panugangan ni Moises. Nagpasiring sinda sa kalangtadan nin Juda harani sa Arad. Dangan duman sinda nag-erok kaiba an mga Amalekita.

¹⁷ Nag-iba an tribu ni Juda sa tribu ni Simeon asin dinaog ninda an mga Cananeo na nag-erok sa syudad nin Zefat. Rinaot ninda an syudad asin nginaranan Horma.

^18-19 Tinabangan nin Kagurangnan an tribu ni Juda, asin nasakop kaini an mabulod na daga. Alagad dai ninda nasakop an Gaza, an Askelon, asin an Ekron, kaiba an mga kataraed na lugar. An mga tawong nag-eerok sa may baybayon igwa nin mga karwaheng lansang, kaya dai sinda napahale kan tribu ni Juda.

²⁰ Itinao ki Caleb an Hebron sosog sa pagboot ni Moises, huli ta napahale niya sa syudad an tolong aking lalaki ni Anak.

²¹ Alagad dai pinahale sa Jerusalem kan tribu ni Benjamin an mga Jebuseo kaya padagos na nag-erok sinda duman sa kaibahan kan banwaan ni Benjamin.

Sinakop kan Tribu ni Efraim asin ni Manases an Betel

^22-23 Sinalakay kan mga tribu ni Efraim asin ni Manases an syudad nin Betel na kaidto inapod Luz. Tinabangan sinda nin Kagurangnan. Nagpadara sinda nin mga espiya sa syudad

²⁴ na nakahiling nin sarong lalaki na nagluwas sa syudad, asin sinabihan ninda, “Itukdo mo samo kun paano kami makakalaog sa syudad asin dai mi ika kukulogan.”

²⁵ Kaya itinukdo niya sainda an dalan pasiring sa syudad. Dangan ginaradan kan mga tawohan ni Efraim asin ni Manases an gabos na yaon duman sa syudad, alagad dai ninda ginadan an lalaking nagtukdo sainda sagkod an saiyang pamilya.

²⁶ Nagduman an lalaking ini sa daga kan mga Heteo, asin nagmukna duman nin sarong syudad na nginaranan niyang Luz; sagkod ngunyan iyo pa iyan an ngaran kan syudad.

Mga Tawong Dai Pinahale kan mga Israelita

²⁷ Dai pinahale kan tribu ni Manases an mga tawong nag-eerok sa mga syudad nin Bet-sean, Taanac, Dor, Ibleam, Megido asin sa mga kataraed na banwa; padagos na nag-erok an mga Cananeo sa mga lugar na ini.

²⁸ Kan dakul nang marahay an mga Israelita, inoripon ninda an mga tawong ini alagad dai man giraray ninda pinahale gabos.

²⁹ Dai man pinahale kan tribu ni Efraim an mga Cananeo na nag-eerok sa syudad nin Gezer, kaya padagos na nag-erok sinda duman, kaiba kan mga Israelita.

³⁰ Dai man pinahale kan tribu ni Zabulon an mga tawong nag-eerok sa mga syudad nin Kitron asin Nahalal, kaya padagos na nag-erok sinda duman bilang mga oripon kan mga Israelita.

³¹ Dai man pinahale kan tribu ni Asher an mga tawong nag-eerok sa mga syudad nin Acco, Sidon, Alab, Aczib, Helba, Afek asin Rehob.

³² Padagos na nag-erok sinda duman kaiba kan tribu ni Asher.

³³ Dai man pinahale kan tribu ni Neftali an mga nag-eerok sa mga syudad nin Bet-semes asin Bet-anat. Padagos na nag-erok sinda duman, alagad inoripon sinda kan tribu ni Neftali.

³⁴ Alagad an mga kaayon sa tribu ni Dan napiritan na mag-erok sa kabubuldan huli ta dai sinda tinugotan kan mga Amoreo na magduman sa kapatagan.

³⁵ Kaya padagos na nag-erok an mga Amoreo sa Aijalon, Saalbim, asin sa Bukid nin Heres alagad sakop sinda kan mga tribu ni Efraim asin ni Manases asin inoripon sinda kan mga tribung ini.

³⁶ Hale sa amihan kan Sela, an pagdolonan kan mga Amoreo minaagi sa tukadon nin Akrabbim dangan minapaitaas.