Hageo 1 - Marahay na Bareta Biblia

An Pagboot nin Kagurangnan na Hirahayon an Templo

¹ Kan ikaduwang taon kan pagigin emperador sa Persia ni Dario, kan enot na aldaw kan ikaanom na bulan, nagtaram an Kagurangnan sa paagi ni propeta Hageo. An mensahe ipinapanongod niya sa gobernador nin Juda, ki Zerubabel na aking lalaki ni Sealtiel, asin para sa Halangkaw na Padi, ki Josue na aking lalaki ni Jehozadak.

² An Kagurangnan nin mga hukbo nagsabi ki Hageo, “An mga tawong ini nagsasabi na bako pa ini an tamang panahon sa paghirahay kan Templo.”

³ Dangan itinao nin Kagurangnan an mensaheng ini para sa mga tawo sa paagi ni propeta Hageo:

⁴ “Banwaan ko, tano ta nag-eerok kamo sa marahay na pagkatugdok na mga harong mantang raot an sakong Templo?

⁵ Dai nindo nahihiling kun ano an nangyayari saindo?

⁶ Dakul na trigo an saindong itinanom, alagad dikit sana an saindong inani. May pagkakan kamo, alagad kulang pa tanganing mabasog kamo. May arak kamong inomon, alagad kulang man tanganing maburat kamo! Igwa kamo nin gubing, alagad kulang man giraray tanganing mahimbongan kamo. An trabahador kulang man an inaakong tandan tanganing mabuhay.

⁷ Dai nanggad nindo nahihiling kun tano ta nangyari ini?

⁸ Kaya magtukad kamo sa mga bulod, magkua nin kahoy asin hirahayon nindo an Templo; dangan mawiwili ako asin sasambahon ako siring sa dapat mangyari.

⁹ “Naglaom kamo nin dakul na aanihon, alagad dikit sana an nakua nindo. Dangan kan darahon na nindo iyan sa saindong harong, hinuyop ko iyan. Tano ta ginibo ko ini? Huli ta raot pa an sakong Templo mantang an lambang saro saindo nasisibot sa pagtrabaho kan saiyang harong.

¹⁰ Kaya dai nag-uuran asin mayo nin anoman na nagtatalubo sa daga.

¹¹ Nagpadara ako nin labi-labing init sa daga—sa kabubuldan, sa mga oma nin trigo, sa mga ubasan saka olibahan—sa lambang tinanom, sa mga tawo saka mga hayop, asin sa gabos na pinagpapagalan nindo.”

Kinuyog kan mga Tawo an Pagboot nin Kagurangnan

¹² Dangan si Zerubabel asin si Josue patin an gabos na tawo na nagbalik hale sa pagkatapokan sa Babilonia nagkuyog kan tataramon nin Kagurangnan na saindang Dios. Natakot sinda asin sinunod si propeta Hageo, an sinugo nin Kagurangnan.

¹³ Dangan an mensaheng ini nin Kagurangnan sinabi ni Hageo sa mga tawo: “Kaibahan nindo ako—iyan an panuga ko.”

¹⁴ Pinasabongan nin Kagurangnan an lambang saro na magtrabaho sa Templo: si Zerubabel na gobernador nin Juda; si Josue na Halangkaw na Padi, asin an gabos na tawong nagbalik hale sa pagkatapokan. Nagpoon sindang magtrabaho sa Templo kan Kagurangnan nin mga hukbo, na saindang Dios,

¹⁵ kan ikabeynte y kwatrong aldaw kan ikaanom na bulan kan ikaduwang taon kan pagigin emperador ni Dario.