Habakkuk 1 - Marahay na Bareta Biblia

¹ Iyo ini an mensahe na ipinahayag nin Kagurangnan sa propetang si Habakkuk.

Nagreklamo si Habakkuk manongod sa Inhustisya

² O Kagurangnan, sagkod nuarin ako maghahagad nin tabang bago mo dangogon, bago mo kami ililigtas sa kadahasan?

³ Tano ta itinutugot mong mahiling ko an mga kasakitan na ini? Paano mo natatagalan an pagmasid sa mga salang gibong ini? Nasa palibot ko an karatan saka kadahasan; an pagralaban saka pag-iriwal yaon sa gabos na lugar.

⁴ Maluya saka mayong kamugtakan an katogonan, kaya dai nangyayari an hustisya. Napapalibotan kan mga tampalasan an mga matanos kaya nabibiko an hustisya.

An Simbag nin Kagurangnan

⁵ Dangan nagtaram an Kagurangnan sa saiyang banwaan, “Masdan nindo an mga nasyon sa palibot nindo, asin magngangalas kamo sa saindong mahihiling. Magibo ako nin ngangalasan na dai nindo tutubodan kun ioosip sana saindo.

⁶ Gigibohon kong magin mapangyari an mga taga Babilonia, an maringis saka dai napapamugtak na banwaan. Naglalakaw sinda sa kahiwasan kan daga tanganing sakopon an ibang nasyon.

⁷ Pinapalakop ninda an takot saka kadahasan, asin sa saindang kapalangkawan, sinda mismo an naggigibo nin pagboot.

⁸ “An saindang mga kabayo orog pang marikas ki sa mga leopardo, mas maringis pa ki sa gutom na mga lobo. An saindang mga parakabayo nag-aarabot hale sa harayong mga lugar; sa rikas kan saindang pangangabayo, garo sinda mga agilang naglalayog pasiring sa saindang biktima.

⁹ “An saindang mga hukbo nagpapadagos sa madahas nindang pananakop, asin natatakot an gabos mantang nagdadangadang sinda. An saindang mga bihag siring kadakul sa baybay.

¹⁰ Tinutuyatuya ninda an mga hade asin sinusubahan sana ninda an haralangkaw na opisyal. Pinagngingisihan sana ninda an mga bantayan huli ta tinatambakan ninda iyan nin daga dangan sinasakop iyan.

¹¹ Dangan minadagoso sinda siring sa doros asin nawawara, sinda na an kapangyarihan iyo an mismo nindang dios.”

Nagreklamo giraray si Habakkuk sa Kagurangnan

¹² Kagurangnan, poon sa kapinonan ika an Dios. Ika an sakong banal, na Dios asin mayo kang kapinonan saka kataposan. Kagurangnan, sakong Dios saka parasurog, pinili mo an mga taga Babilonia dangan pinakosog tanganing mapadusahan ninda kami.

¹³ Alagad paano mo natatagalan an mga mapasaluib saka maraot na lalaking ini? An saimong mga mata banal nin marahay kaya habo mong maghiling kan karatan, asin dai mo matatagalan na hilingon an mga tawong naggigibo nin maraot. Kaya tano ta mayo kang girong mantang ginagadan ninda an mga tawong orog pang matanos ki sa sainda?

¹⁴ Tadaw ta ibinabaing mo an tawo sa sira o sa mga insekto na mayo nin namamayo?

¹⁵ Dinadakop kan mga taga Babilonia an mga tawo sa paagi nin mga banwit, na garo mga sira, asin ginuguyod ninda an mga tawo na nasa laog nin mga hikot. Pakatapos, nagkukurahaw sinda sa kaogmahan huli kan saindang mga nadakop!

¹⁶ Kaya sinasamba ninda an saindang mga hikot saka dinodolotan nin mga sakripisyo, huli ta nagtatao iyan sa sainda kan pinakamarahay sa gabos na bagay.

¹⁷ Gagamiton daw ninda sagkod pa man an saindang mga espada asin magpapadagos sinda sa mayong herak na panraraot nin mga nasyon?