Genesis 9 - Marahay na Bareta Biblia

An Pakipagtipan nin Dios ki Noe

¹ Benendisyonan nin Dios si Noe asin an saiyang mga aking lalaki dangan tinaraman, “Magkaigwa kamo nin dakul na mga aki tanganing an saindong kapagarakian makalakop sa bilog na daga.

² An gabos na hayop, gamgam asin sira mabubuhay na igwa nin pagkatakot saindo. Gabos sinda mapapasairarom kan saindong kapangyarihan.

³ Itatao ko saindo bilang kakanon an lambang linalang na may buhay kaiba an mga berdeng tinanom. Itinatao ko saindo an gabos.

⁴ Alagad dai nanggad kamo magkakan nin karne na igwa pang dugo; ipinapangalad ko iyan huli ta an buhay yaon sa dugo.

⁵ Papadusahan ko an siisay man na maggadan nin tawo. Kagadanan an padusa sa hayop man o tawo na makagadan nin tawo.

⁶ An tawo ginibo sa ladawan nin Dios, kaya an siisay man na gumadan sa kapwa niya tawo, gagadanon man kan saiyang kapwa.

⁷ “Kaipuhan na magkaigwa kamo nin dakul na aki tanganing an saindang kapagarakian makalakop sa bilog na daga.”

⁸ Dangan nagtaram an Dios ki Noe asin sa mga aking lalaki kaini,

⁹ “Makikipagtipan ako ngunyan saindo, sa saindong kapagarakian,

¹⁰ asin sa gabos na may buhay—sa gabos na gamgam asin hayop—sa gabos na kaibahan nindo na nagruluwas sa arka.

¹¹ Sa mga tataramon na ini, nakikipagtipan ako sa saindo: nanunuga ako na dai na nanggad mapapara an gabos na may buhay sa paagi nin baha; dai na nanggad mararaot an kinaban huli sa baha.

¹² Bilang tanda kaining daing kataposan na tipan na sakong ginigibo saindo asin sa gabos na may buhay,

¹³ ibinubugtak ko an bulalangaw sa mga panganoron. Iyan an magigin tanda kan pakikipagtipan ko sa kinaban.

¹⁴ Kun tahoban ko nin panganoron an kalangitan dangan malataw an bulalangaw,

¹⁵ magigiromdoman ko an sakong panuga saindo asin sa gabos na hayop; asin dai ko na nanggad raraoton an gabos na may buhay sa paagi nin sarong baha.

¹⁶ Paglataw kan bulalangaw sa mga panganoron, mahihiling ko iyan asin magigiromdoman ko an daing kataposan na tipan ko sa gabos na may buhay sa kinaban.

¹⁷ Iyo iyan an tanda kan sakong pakikipagtipan sa gabos na may buhay.”

Si Noe asin an saiyang mga Aking Lalaki

¹⁸ Si Sem, si Ham asin si Jafet iyo an mga aking lalaki ni Noe na kaiba niyang nagluwas sa arka. (Si Ham iyo an ama ni Canaan.)

¹⁹ Sindang tolo an ginikanan kan gabos na tawo sa kinaban.

²⁰ Si Noe na sarong paraoma, iyo an kaenot-enoteng tawo na nagtanom nin ubas.

²¹ Nag-inom siya kan arak kaya naburat siya. Hinukas niya an saiyang gubing dangan nagtorog na huba sa saiyang tolda.

²² Nahiling ni Ham, an ama ni Canaan, na huba an saiyang ama asin binaretaan an duwa niyang tugang na nasa luwas.

²³ Nagkua nin alikboy si Sem asin si Jafet, isinablay sa saindang abaga dangan patalikod na luminaog sa tolda tanganing dai ninda mahiling an pagkanihuba kan saindang ama asin tinahoban an huba nindang ama.

²⁴ Kan mahale an pagkaburat ni Noe asin naaraman an ginibo saiya kan ngohod niyang aki,

²⁵ nagsabi siya, “Sumpaon si Canaan! Siya an magigin oripon kan saiyang mga tugang.

²⁶ Pag-omawon an Kagurangnan, an Dios ni Sem! Si Canaan magigin oripon ni Sem.

²⁷ Padakulaon logod nin Dios si Jafet! An saiyang kapagarakian mag-erok logod sa kaibahan kan banwaan ni Sem! Si Canaan magigin oripon ni Jafet!”

²⁸ Pakalihis kan baha, nabuhay pa si Noe sa laog nin tres syentos singkwentang taon

²⁹ bago siya nagadan sa edad na nwebe syentos singkwentang taon.