Genesis 6 - Marahay na Bareta Biblia

An Karatan kan Katawohan

¹ Kan magpoon nang magdakul an katawohan sa bilog na kinaban, asin kan nag-araki na sinda nin mga babae,

² nahiling kan mga aki nin Dios na magagayon an mga aking babae kan mga tawo, kaya inagom ninda an saindang nagustohan.

³ Dangan nagtaram an Kagurangnan, “Dai ko tutugotan na mabuhay sagkod lamang an tawo; siya may kagadanan. Poon ngunyan, sagkod sana sa syento beynteng taon an magigin buhay niya.”

⁴ Sa mga aldaw na idto asin sa mga nagsunod pang panahon, nagkaigwa nin mga higante sa kinaban. An mga ini an nagin aki kan mga aking babae kan mga tawo asin kan mga aki nin Dios; sinda an mga bantog saka makokosog na mga tawo kan enot na panahon.

⁵ Kan nahiling nin Kagurangnan an kadakulaan kan karatan kan mga tawo sa kinaban asin an karigsokan kan saindang kaisipan sa gabos na panahon,

⁶ nagmondo siya saka nagbasol kun tadaw ta ginibo pa niya an mga tawo dangan ibinugtak sa daga.

⁷ Kaya nagtaram siya, “Paparaon ko ining mga tawo na sakong linalang asin an mga hayop patin an mga gamgam, huli ta nagbabasol ako kun tadaw ta ginibo ko pa sinda.”

⁸ Alagad nawilihan nin Kagurangnan si Noe.

Si Noe

^9-10 Iyo ini an istorya ni Noe. Nagkaigwa siya nin tolong aking lalaki: si Sem, si Ham asin si Jafet. Si Noe iyo sana an matanos na tawo kan panahon niya. Naglakaw siya sa kaibahan nin Dios;

¹¹ alagad an ibang tawo maraot sa atubang nin Dios asin an daga napano kan saindang kadahasan.

¹² Nahiling nin Dios na an daga pano nin karatan huli sa maraot na pamumuhay kan mga tawo.

¹³ Nagtaram an Dios ki Noe, “Nagdesider na akong paraon an katawohan huli ta an daga pano na nin kadahasan huli sainda.

^14-15 Gumibo ka nin arka sa kahoy na goper na igwa nin sukol na syento treynta y tres metros an laba, beynte y dos metros an lakbang asin trese metros an langkaw. Gibohan mo nin mga kwarto saka lahidan mo nin aspalto an laog asin an luwas kan arka.

¹⁶ Bugtakan mo nin atop an arka asin gibohan mo nin laogan nin saldang na kwarenta y kwatro sentimetros sa pagultanan kan atop asin kan lanob. Gibohon mong tolong eskalon an arka asin bugtakan mo nin pintoan sa gilid.

¹⁷ Papadarahan ko nin baha an bilog na kinaban tanganing gadanon an gabos na may buhay. Magagadan an gabos na yaon sa daga,

¹⁸ alagad makikipagtipan ako saimo. Lumaog ka sa arka kaiba an saimong agom, an mga aki mong lalaki asin an saindang mga agom.

^19-20 Ilaog mo diyan an gabos na igwa nin buhay, sarong lalaki asin sarong babae kan lambang klase nin hayop asin gamgam tanganing magkaburuhay sinda.

²¹ Magdara ka nin manlaen-laen na kakanon para saindo asin para sa mga hayop.”

²² Ginibo ni Noe an gabos na ipinagboot saiya nin Dios.