Genesis 41 - Marahay na Bareta Biblia

Ipinaliwanag ni Jose an mga Pangatorogan kan Hade

¹ Pakalihis nin duwang taon, nangatorogan an hade nin Egipto na nakatindog siya sa pangpang kan Salog nin Nilo,

² kan maghawas hale sa salog an pitong matataba saka magagayon na baka, dangan nagpoon manabsab kan doot.

³ Dai nahaloy, pito pang baka na maniniwang asin makakanos an naghawas asin nagtindog sa kataed kan ibang mga baka na yaon duman sa pangpang kan salog.

⁴ Dangan kinakan kan mga maniniwang na baka an mga matatabang baka. Nagimata an hade.

⁵ Nagkatorog siya giraray asin nangatorogan na naman na sa sarong poon nin mais nagbuswak an pitong purosok asin matatagas na puso.

⁶ Dangan nagbuswak pa nin pitong puso na saradit asin tagiltilon huli sa init kan doros na hale sa desyerto.

⁷ Hinalon kan mga saradit na puso nin mais an mga purosok na puso. Nagimata an hade asin naaraman niyang nangatorogan siya.

⁸ Alagad pagkaaga nahadit siya nin marahay kaya ipinaapod niya an gabos na salamangkero asin mago sa Egipto. Isinaysay niya sainda an saiyang mga pangatorogan, alagad mayo nin siisay man na nakapaliwanag kaini saiya.

⁹ Dangan nagsabi sa hade an saiyang kopero, “Nagiromdoman ko ngunyan an kasalan ko.

¹⁰ Kan anggot ka sako asin sa panadero, ipinabilanggo mo kami sa harong kan kapitan kan mga bantay.

¹¹ Nangatorogan kami sa parehong banggi alagad magkaiba an kahulogan kan samong pangatorogan.

¹² Yaon duman an sarong hoben na Hebreyo, an oripon kan kapitan kan mga bantay. Kan isaysay mi saiya an samong mga pangatorogan, ipinaliwanag niya samo an kahulogan kan mga ini.

¹³ Nagkatotoo sa samo an saiyang sinabi: ibinalik mo ako sa dati kong katongdan alagad ipinagadan mo an panadero.”

¹⁴ Ipinaapod si Jose kan hade, asin pinaluwas siya tolos sa bilanggoan. Pakatapos niyang mag-ahit asin magsangle kan saiyang gubing, nag-atubang siya sa hade.

¹⁵ Sinabihan siya kan hade, “Nangatorogan ako alagad mayo nin siisay man na nakakapaliwanag kaiyan. Igwang nakasabi sako na nakakapaliwanag ka nin mga pangatorogan.”

¹⁶ Nagsimbag si Jose, “Mahal na hade, bakong ako, kundi an Dios an mapaliwanag saimo.”

¹⁷ Nagsabi an hade, “Nangatorogan ako na nakatindog ako sa pangpang kan Salog nin Nilo,

¹⁸ kan maghawas an pitong matataba saka magagayon na baka asin nagsabsab kan doot.

¹⁹ Dangan naghawas man an pitong maniniwang saka makakanos na baka na kaidto ko pa sana nahiling sa bilog na daga nin Egipto.

²⁰ Kinakan kan mga ini an mga matatabang baka,

²¹ alagad pakatapos nindang kakanon an mga idto, mayo nin siisay man na makasabing kinakan ninda an mga matatabang baka huli ta maniwang man giraray sinda siring kan dati. Dangan nagimata ako.

²² Nangatorogan pa akong nahiling ko an pitong puso nin mais na purosok asin matatagas na nagbuswak sa sarong poon.

²³ Dangan nagbuswak man an pitong saradit asin tagiltilon na puso nin mais huli sa init kan doros na hale sa desyerto,

²⁴ asin hinalon an mga purosok saka matatagas na puso. Inistorya ko an mga pangatorogan na ini sa mga salamangkero, alagad mayong nakapaliwanag sako.”

²⁵ Sinabihan ni Jose an hade, “Pareho an kahulogan kan duwang pangatorogan; ipinahayag saimo nin Dios an saiyang gigibohon.

²⁶ An pitong matatabang baka, pitong taon; asin an pitong purosok na puso nin mais, pito man na taon; saro an kahulogan ninda.

²⁷ An nagsunod na pitong maniniwang na baka asin an pitong tagiltilon na puso nin mais huli sa init kan doros na hale sa desyerto, pitong taon nin gutom.

²⁸ Siring sa sinabi ko, ipinahayag saimo nin Dios an saiyang gigibohon.

²⁹ Magigin abunda sa bilog na Egipto sa maabot na pitong taon,

³⁰ alagad pakatapos kaini maabot an pitong taon nin gutom, asin an mga abundang taon malilingawan huli ta an bilog na daga papasakitan kan gutom.

³¹ An panahon nin abunda malilingawan huli kan grabeng gutom na masunod.

³² An pagigin doble kan saimong pangatorogan nangangahulogan na itinalaga iyan nin Dios asin madali na niyang gibohon.

³³ “Kaya ngunyan magpili ka nin sarong madonong asin may kakayahan na lalaki dangan ibugtak mo siyang parapamahala kan bilog na Egipto.

³⁴ Magbugtak ka man nin mga enkargado kan daga, asin kuahon mo an ikalimang parte kan gabos na produkto kan daga sa laog kan pitong taon nin abunda.

³⁵ Pagbotan mo sinda na tiponon an gabos na pagkakan sa laog kan mga maabot na taon nin abunda asin tawan mo sinda nin kapangyarihan sa pagtipon saka sa pagbantay kan pagkakan sa mga syudad.

³⁶ Iaandam an pagkakan na iyan para sa daga sa laog kan pitong taon nin gutom na maabot sa Egipto. Sa siring na paagi dai magugutom an mga tawo.”

Ginibong Gobernador kan Egipto si Jose

³⁷ Naoyonan kan hade nin Egipto asin kan gabos niyang opisyal an planong ini,

³⁸ kaya sinabihan niya sinda, “Makakakua pa daw kita nin arog ki Jose, na igwa kan espiritu nin Dios?”

³⁹ Kaya sinabihan si Jose kan hade, “Ipinahiling nin Dios an gabos na ini saimo, kaya mayo nin siisay man na makakaarog saimo sa kadonongan asin sa kakayahan.

⁴⁰ Ika an sakong ibubugtak na parapamahala kan bilog na daga. An saimong pagboot ootobon kan gabos kong nasasakopan. Magigin ikaduwa ka sako sa kapangyarihan.

⁴¹ Poon ngunyan, ika na an gobernador kan bilog na Egipto.”

⁴² Dangan hinugkot kan hade sa saiyang muro an singsing na may selyo asin isiningsing ki Jose. Sinulotan niya ini nin gubing na pinong lino saka binugtakan nin kulintas na bulawan.

⁴³ Tinawan man si Jose kan hade kan ikaduwa niyang karwahe tanganing lunadan niya kaiba an mga bantay na maeenot sa saiya asin magkukurahaw, “Luhod kamo!” Sa siring na paagi nagin gobernador si Jose kan bilog na Egipto.

⁴⁴ Sinabihan siya kan hade, “Ako an hade nin Egipto, asin sinasabihan taka na mayo nin siisay man sa daga nin Egipto na makakaitaas kan saiyang kamot o bitis sagkod na dai mo itinutugot.”

^45-46 Dangan si Jose nginaranan Zafenat Panea kan hade, asin tinawan siya kaini nin agom, si Asenat, an aki ni Potifera na sarong padi sa On. Treynta na an edad ni Jose kan magpoon siyang maglingkod sa hade nin Egipto. Pakahale niya sa atubang kan hade, naglibot siya sa bilog na daga.

⁴⁷ Sa laog nin pitong taon, nagkaigwa nin dakul saka marahay na ani sa daga.

⁴⁸ Tinipon ni Jose an gabos na pagkakan dangan sinaray niya sa mga syudad. Sa lambang syudad, sinararay niya an pagkakan na naani sa kaomahan na nasa palibot.

⁴⁹ Dakul nin marahay an ani, kaya inontok ni Jose an pagtakad kaiyan—garo iyan baybay sa dagat.

⁵⁰ Bago nag-abot an mga taon nin gutom, igwa na nin duwang aking lalaki si Jose ki Asenat.

⁵¹ Olay ni Jose, “Pinalingawan sako nin Dios an gabos kong pagtios asin an pamilya nin sakong ama”; kaya nginaranan niyang Manases an matua niyang aki.

⁵² Nagsabi pa siya, “Tinawan ako nin Dios nin mga aki sa daga nin sakong kasakitan”; kaya nginaranan niyang Efraim an ikaduwa niyang aki.

⁵³ Natapos an pitong taon nin abunda sa daga nin Egipto,

⁵⁴ asin siring sa sinabi ni Jose, nagpoon an pitong taon nin gutom. Igwa nin gutom sa ibang lugar, alagad igwang pagkakan sa bilog na Egipto.

⁵⁵ Kan magpoon nang magutom an mga Egipcio, naghagad sinda nin pagkakan sa hade. Pinagbotan niya sinda na magduman ki Jose asin magsunod sa sasabihon kaini.

⁵⁶ Kan lakop na an grabeng gutom sa bilog na daga, binukasan ni Jose an gabos na sarayan nin pagkakan dangan pinabakalan niya nin mais an mga Egipcio.

⁵⁷ Nagduman sa Egipto an mga tawo hale sa gabos na lugar kan kinaban tanganing magbakal nin mais, huli ta grabe an gutom minsan saen.