Genesis 39 - Marahay na Bareta Biblia

Si Jose asin an Agom ni Potifar

¹ Dinara si Jose sa Egipto kan mga Ismaelita asin ipinabakal siya ninda ki Potifar, sarong opisyal na Egipcio, na kapitan kan mga bantay sa palasyo kan hade.

² Inibahan nin Kagurangnan si Jose kaya nag-uswag siya. Nag-erok si Jose sa harong kan Egipcio niyang kagurangnan,

³ na nakamasid na iniibahan nin Kagurangnan si Jose asin pinapauswag an gabos na gibo.

⁴ Nagustohan si Jose ni Potifar, asin ginibo siya kaining pinaniwalaan na sorogoon; siya an nagin parapamahala kan harong ni Potifar asin kan gabos na pagsadiri kaini.

⁵ Poon kaidto, huli ki Jose, benendisyonan nin Kagurangnan an harong kan Egipcio asin an gabos na pagsadiri kaini.

⁶ Itinao ni Potifar an gabos niyang pagsadiri sa pamamahala ni Jose. Mayo na siyang ibang minamangno kundi an saiyang kinakakan. Gwapo si Jose asin marahay an saiyang tindog,

⁷ kaya dai nahaloy, nagkaigwa nin pagmawot saiya an agom ni Potifar asin nagsabi saiya, “Dorogan mo ako.”

⁸ Nagsayuma si Jose asin nagsabi, “Dai na naghahadit an sakong kagurangnan kan manongod digdi sa harong huli ta uya ako. Ginibo niya akong parapamahala kan gabos niyang pagsadiri;

⁹ pareho an samong kapangyarihan digdi sa harong asin dai siya nin ipinapangalad sako kundi ika sana, huli ta agom ka niya. Tano ta magibo ako kan siring na karigsokan asin magkasala ako sa Dios?”

¹⁰ Minsan inoroaldaw kan agom ni Potifar an pag-alok ki Jose, nagsayuma siya.

¹¹ Sarong aldaw, naglaog sa harong si Jose tanganing mag-trabaho, asin mayo gabos sa harong an mga sorogoon.

¹² Kaya kinapotan kan agom ni Potifar an gubing ni Jose asin nagsabi, “Dorogan mo ako.” Nakadalagan si Jose paluwas kan harong alagad nawalat an saiyang alikboy sa kamot kan agom ni Potifar.

¹³ Kan mahiling kan babae na nawalat ni Jose an saiyang alikboy pagdulag saiya,

¹⁴ inapod niya an mga oripon niya sa harong asin nagsabi, “Hilinga nindo ini! Nagdara digdi sato an agom ko nin sarong Hebreyo na iyo man sana an masopog sato. Linaog niya ako sa sakong kwarto tanganing lupigan, alagad nagkurahaw ako.

¹⁵ Kan madangog niya an kurahaw ko, nagdalagan siya paluwas kan harong asin nawalat an alikboy niya.”

¹⁶ Sinaray niya an alikboy sagkod na magpuli an kagurangnan ni Jose

¹⁷ dangan inosipan niya kan parehong istorya: “An sorogoon mong Hebreyo na dinara mo digdi, naglaog sa sakong kwarto asin sinopog ako.

¹⁸ Alagad kan magkurahaw ako, nagdalagan siya paluwas kan harong asin nawalat an alikboy niya sa sako.”

¹⁹ Naanggot nin marahay si Potifar kan madangog an sumbong kan agom.

²⁰ Ipinadakop niya si Jose asin ipinabilanggo sa namumugtakan kan mga bilanggo kan hade.

²¹ Alagad inibahan si Jose nin Kagurangnan na nagpahiling saiya nin danay na pagkamoot, kaya naoyonan siya kan bantay kan bilanggoan.

²² Ginibo kaining parapamahala si Jose kan gabos na bilanggo asin kan gabos na trabaho sa bilanggoan.

²³ Kaya daing paghadit an bantay sa ano man na ipinapamahala niya ki Jose, huli ta kaibahan ni Jose an Kagurangnan asin pinauswag ini sa gabos na trabaho.