Genesis 35 - Marahay na Bareta Biblia

Benendisyonan nin Dios si Jacob sa Betel

¹ Nagtaram an Dios ki Jacob, “Magduman ka tolos sa Betel asin duman ka mag-erok. Gumibo ka nin sarong altar duman para sako, an Dios na nagpahiling saimo kan ika magdulag sa tugang mong si Esau.”

² Kaya sinabihan ni Jacob an saiyang pamilya asin an gabos na kaibahan niya, “Itapok nindo an mga dayuhan na dios na yaon saindo; maglinig kamo kan saindong sadiri asin magsangle kamo kan saindong gubing,

³ huli ta maduman kita gabos sa Betel tanganing ikatugdok ko nin altar an Dios na nagtabang sako sa panahon nin kasakitan asin nag-iba sako saen man ako magduman.”

⁴ Kaya itinao ninda ki Jacob an gabos nindang mga dayuhan na dios sagkod an mga hikaw na sulot ninda. Ilinubong ini gabos ni Jacob sa irarom kan poon nin sarong hamurawon na kahoy na harani sa Shekem.

⁵ Kan magpoon na sindang maglakaw, natakot nin marahay an mga tawong nag-eerok sa mga syudad sa palibot ninda, kaya dai sinda linamag kan mga ini.

⁶ Nakaabot si Jacob asin an gabos na kaiba niya sa Luz (o Betel) sa daga nin Canaan.

⁷ Itinugdok niya duman an sarong altar asin an lugar nginaranan niyang El-Betel, huli ta duman nagpahiling saiya an Dios kan nagdulag siya sa saiyang tugang.

⁸ Duman nagadan si Debora na paraaling ni Rebecca. Ilinubong siya sa tangod nin sarong hamurawon na kahoy sa habagat kan Betel, kaya an lugar na idto nginaranan Allon-bacut.

⁹ Nagpahiling giraray an Dios ki Jacob kan magbalik ini hale sa Mesopotamia. Benendisyonan siya nin Dios

¹⁰ asin tinaraman, “Jacob an ngaran mo, alagad poon ngunyan aapodon ka nang Israel.” Kaya nagin Israel an saiyang ngaran.

¹¹ Nagtaram saiya an Dios, “Ako an Makakamhan na Dios. Magkaigwa ka nin dakul na aki. Gigikanan ka nin dakul na nasyon asin sa saimo magikan an mga hade.

¹² Itatao ko saimo an daga na itinao ko ki Abraham saka ki Isaac, asin itatao ko man iyan sa saimong mga kapagarakian.”

¹³ Dangan binayaan siya nin Dios.

¹⁴ Sa lugar na idto, saen nagtaram saiya an Dios, nagpatindog si Jacob nin hariging giromdoman na an ibabaw inulaan niya nin arak saka lana nin oliba.

¹⁵ An lugar nginaranan niyang Betel.

An Pagkagadan ni Rachel

¹⁶ Naghale sa Betel si Jacob kaiba an saiyang pamilya, asin kan harani na sinda sa Efrat, nag-abot an oras kan pangaki ni Rachel; dipisil an saiyang pangaki.

¹⁷ Kan grabe na an kulog kan pagporos niya, sinabihan siya kan partera, “Dai ka matakot, Rachel; lalaki na naman an ipapangaki mo.”

¹⁸ Alagad naghihingagdan na si Rachel asin bago siya nautsan, nginaranan niyang Benoni an saiyang aki, alagad inapod ining Benjamin kan saiyang ama.

¹⁹ Nagadan si Rachel asin ilinubong sa may dalan pasiring sa Efrat (na ngunyan inaapod Betlehem).

²⁰ Nagbugtak si Jacob nin sarong hariging giromdoman sa linubongan ki Rachel asin sagkod ngunyan idtoon pa iyan duman.

²¹ Dangan nagpadagos sa paglakaw si Jacob asin nagkampo sa ibong kan tore nin Eder.

An Mga Aki ni Jacob

²² Kan nag-eerok na si Jacob sa dagang idto, dinorogan ni Ruben si Bilha na saro kan mga kasaroan nin saiyang ama; naanggot nin marahay si Jacob kan maisihan ini. Dose an mga aking lalaki ni Jacob.

²³ An mga aki ni Lea iyo si Ruben (an matuang aking lalaki ni Jacob), si Simeon, Levi, Juda, Issakar, asin Zabulon.

²⁴ An mga aki ni Rachel iyo si Jose asin si Benjamin.

²⁵ An mga aki ni Bilha na katabang ni Rachel iyo si Dan asin si Neftali.

²⁶ An mga aki ni Zilpa na katabang ni Lea iyo si Gad saka si Aser. An mga ini iyo an mga aki ni Jacob na namundag saiya sa Mesopotamia.

An Pagkagadan ni Isaac

²⁷ Dinalaw ni Jacob si Isaac na saiyang ama duman sa Mamre, harani sa Hebron, saen nakihimanwa si Abraham asin si Isaac.

²⁸ Nabuhay si Isaac sagkod sa edad na syento otsenta,

²⁹ asin nagadan sa pagkagurang; ilinubong siya kan mga aki niyang si Esau saka Jacob.