Genesis 31 - Marahay na Bareta Biblia

Dinulagan ni Jacob si Laban

¹ Nadangog ni Jacob na ipinapamareta kan mga aking lalaki ni Laban na, “Kinua ni Jacob an gabos na sadiri kan samong ama. An gabos niyang yaman gikan sa sadiri kan samong ama.”

² Nahiling man ni Jacob na malaen na an pagtratar saiya ni Laban.

³ Dangan tinaraman nin Kagurangnan si Jacob, “Bumalik ka sa daga nin saimong mga magurang asin nin saimong mga kadugo; iibahan taka.”

⁴ Kaya pinasugoan ni Jacob si Rachel asin si Lea na sabaton siya duman sa oma na namumugtakan kan saiyang mga hayop,

⁵ asin sinabihan niya sinda, “Namasdan ko na iba na an pagtratar sako kan saindong ama; alagad an Dios kan sakong ama iniibahan ako.

⁶ Aram nindong duwa na pinaglingkodan ko an saindong ama sa bilog kong kosog;

⁷ dinaya niya ako asin sampolong beses niyang liniwat an sakong sweldo. Alagad dai itinugot nin Dios na kulogon niya ako.

⁸ Kan magsabi si Laban, ‘Saimo an mga hayop na may patak-patak,’ an gabos na hayop nag-orogbon nin may patak-patak, asin kan magsabi siyang, ‘Saimo an may raya-raya,’ an gabos na hayop nag-orogbon nin may raya-raya.

⁹ Sa paaging iyan, kinua nin Dios an mga hayop kan saindong ama asin itinao sako.

¹⁰ “Kan tig-maroan nin mga hayop, nagkaigwa ako nin pangatorogan asin nahiling ko na an mga lalaking kanding na nagmamaro anas may patak-patak asin may raya-raya.

¹¹ Dangan sinabihan ako kan anghel nin Dios sa sakong pangatorogan, ‘Jacob!’ ‘Uya ako!’ an simbag ko.

¹² Nagsabi siya, ‘Hilinga, an mga lalaking nagmamaro anas may patak-patak asin may raya-raya. Pinapangyari ko ini huli ta nahiling ko an gabos na ginigibo saimo ni Laban.

¹³ Ako an Dios na nagpahiling saimo sa Betel, saen nagpatindog ka nin hariging giromdoman na inulaan mo nin lana, asin saen nanumpa ka sako. Mag-andam ka asin magbalik ka sa dagang saimong namundagan.’”

¹⁴ Nagsimbag si Rachel asin si Lea ki Jacob, “Mayo na kaming mamanahon sa samong ama.

¹⁵ An pagtratar niya samo arog sa mga dayuhan. Ipinabakal niya kami dangan inubos an kwartang kabakalan.

¹⁶ An gabos na pagrogaring na ini na kinua nin Dios sa samong ama sadiri nyamo asin nin samong mga aki. Kaya giboha an ano man na itinaram saimo nin Dios.”

^17-18 Kaya nag-andam si Jacob tanganing magbalik sa Canaan, sa daga kan saiyang ama na si Isaac. Ilinunad niya sa mga kamelyo an gabos niyang aki asin agom dangan inalaw niya an gabos na hayop na napasaiya duman sa Mesopotamia.

¹⁹ Mayo duman si Laban huli ta ginuguntingan niya an saiyang mga karnero, kaya nahabon ni Rachel an saiyang mga dios-dios.

²⁰ Nadaya ni Jacob si Laban huli sa dai niya pagpaisi saiya na mahale na siya.

²¹ Nagdulag siyang dara an gabos niyang rogaring. Inibong ninda an Salog nin Eufrates dangan naglakaw sinda pasiring sa mabulod na daga nin Gilead.

Linamag ni Laban si Jacob

²² Pakalihis nin tolong aldaw, naosipan si Laban na duminulag si Jacob.

²³ Kaya ipinag-iba niya an saiyang mga tawohan asin linamag niya si Jacob sa laog nin pitong aldaw sagkod na maabotan niya ini sa mabulod na daga nin Gilead.

²⁴ Alagad sa sarong pangatorogan kan bangging idto, nagpahiling an Dios saiya asin nagtaram, “Laban, hare nanggad pagtakota si Jacob sa ano man na paagi.”

²⁵ Kan maabotan ni Laban si Jacob, nakapatindog na ini kan saiyang tolda sa sarong bukid, kaya duman si Laban nagkampo sa mabulod na daga nin Gilead.

²⁶ Sinabihan ni Laban si Jacob, “Tano ta dinaya mo ako, asin dinara mo an sakong mga aki na siring sa mga bihag sa gera?

²⁷ Tano ta dinaya mo ako asin naghale ka na daing paisi? Kun sinabihan mo ako, kutana dinespedir ko kamo na may kaogmahan asin karantahan, sa tanog nin tamborin saka arpa.

²⁸ Tano ta dai mo sako pinahadokan an sakong mga makoapo asin mga aki bago kamo naghale. Sala an ginibo mo.

²⁹ Pwede takang kulogan, alagad pinatanidan ako kan Dios nin saimong ama kasubanggi na dai taka nanggad pagtakoton sa ano man na paagi.

³⁰ Aram kong naghale ka huli ta gusto mong makapuli sa saindo, alagad tano ta hinabon mo an sakong mga dios-dios?”

³¹ Nagsimbag si Jacob, “Natakot ako huli ta paghona ko aagawon mo sako an saimong mga aking babae.

³² Ngunyan, kun may makuahan ka digdi kan saimong mga dios-dios, gagadanon siya. Kaya sa atubang kan satong mga tawohan, hanapa an ano man na sadiri mo na yaon sako asin kuaha.” Dai aram ni Jacob na hinabon ni Rachel an mga dios-dios ni Laban.

³³ Linaog ni Laban an tolda ni Jacob asin naghanap duman; isinunod niya an tolda ni Lea asin an tolda kan duwang babaeng oripon, alagad dai niya nakua duman an saiyang mga dios-dios. Dangan linaog niya an tolda ni Rachel.

³⁴ Kinua na palan ni Rachel an mga dios-dios ni Laban, itinago sa kamadero kan kamelyo asin tinukawan an mga ini. Naghanap si Laban kan saiyang mga dios-dios sa bilog na tolda, alagad dai niya nakua duman.

³⁵ Olay ni Rachel sa saiyang ama, “Kagurangnan, dai ka logod maanggot sako. Dai ako pwedeng magtindog sa saimong atubang huli ta nareregla ako.” Nagpadagos sa paghanap si Laban alagad dai niya nakua an saiyang mga dios-dios.

³⁶ Dangan naanggot si Jacob asin hinapot si Laban, “Anong krimen an naginibo ko? Anong kasalan ko ta linamag mo ako?

³⁷ Ngunyan na nahalungkat mo na an gabos kong pagsadiri, ano an nakua mo na pagsadiri mo? Iluwas mo digdi sa atubang kan satong mga tawohan tanganing sinda an magsabi kun siisay sa sato an tama.

³⁸ Sa laog nin beynteng taon yaon ako sa kaibahan mo; mayong naghulos minsan saro kan saimong babaeng karnero o kanding; asin minsan saro kan saimong hayop dai ko kinakan.

³⁹ Kun igwang saro na ginadan kan mga maringis na hayop, dai ko na dinadara saimo tanganing ipahiling na mayo akong sala; binabayadan ko na sana huli ta pinapabayadan mo an arin man na hinabon sa aldaw o sa banggi.

⁴⁰ Tinios ko an init kan aldaw asin an lipot kan banggi; dai na ako nagkakatorog.

⁴¹ Iyan an nagin buhay ko sa laog nin beynteng taon na yaon ako saimo. Naglingkod ako saimo sa laog nin katorseng taon para sa duwang aki mo, asin anom na taon para sa saimong mga hayop. Alagad sampolong beses mo pang liniwat an sweldo ko.

⁴² Kun dai ako inibahan kan Dios nin sakong mga magurang, an Dios ni Abraham asin ni Isaac, tibaad haloy mo na akong pinalayas na mayo nin ano man na dara. Alagad nahiling nin Dios an sakong kasakitan asin an sakong kapagalan, kaya naanggotan ka niya kasubanggi.”

An Pinagkaoyonan ni Jacob asin ni Laban

⁴³ Sinimbag ni Laban si Jacob, “Mga aki ko an mga babaeng ini; sadiri ko an saindang mga aki asin rogaring ko an mga hayop na ini. An totoo, sadiri ko an gabos na nahihiling mo. Alagad huli ta dai na akong magigibo tanganing mapugol sinda,

⁴⁴ andam ako na makipagtipan sa saimo. Magtambak kita nin mga gapo na iyo an danay na magpapagiromdom sato kan satong tipan.”

⁴⁵ Kaya kuminua si Jacob nin gapo asin pinatindog ini bilang sarong hariging giromdom,

⁴⁶ dangan sinabihan an saiyang mga tawohan na magtambak nin mga gapo; duman na sinda nagkakan sa kataed kan tinambak na mga gapo.

⁴⁷ Nginaranan ini ni Laban nin Jegar-Sahaduta asin Galeed naman an inginaran kaini ni Jacob.

⁴⁸ Sinabihan ni Laban si Jacob, “An tambak na gapong ini iyo an magpapagiromdom sato.” Kaya an lugar na idto nginaranan Galeed.

⁴⁹ Nagsabi pa si Laban, “Bantayan logod kita nin Kagurangnan mantang harayo kita sa lambang saro.” Kaya an lugar inapod man Mizpa.

⁵⁰ Nagsabi pa si Laban, “Kun maglaen an saimong pagtratar sa mga aki kong babae, o kun mag-agom ka nin ibang mga babae, minsan dai ko maisihan, giromdoma na nagbabantay sato an Dios.

⁵¹ Uya an tinambak na gapo asin an hariging giromdom na ibinugtak ko sa pagultanan tang duwa.

⁵² Ini an mga saksi na dai ako malampas sa tambak na ini tanganing kalabanon ka asin dai ka man malampas digdi o sa hariging giromdom na ini tanganing kalabanon ako.

⁵³ Husgaran logod kita kan Dios ni Abraham, ni Nahor, asin nin saindang mga magurang.” Kaya nanumpa si Jacob sa ngaran kan Dios na sinamba ni Isaac na saiyang ama.

⁵⁴ Nagbuno siya nin hayop na saiyang idinolot duman sa bukid dangan inapod niya an saiyang mga tawohan tanganing magkakan. Duman na sinda naagahan sa bukid.

⁵⁵ Pagkaagang amay, hinadokan ni Laban an saiyang mga makoapo asin mga aki dangan benendisyonan niya sinda; pakatapos, nagpuli na siya sa saiyang harong.