Genesis 30 - Marahay na Bareta Biblia

¹ Alagad mayo pa minsan sarong aki si Rachel kaya naara siya sa saiyang tugang. Sinabihan niya si Jacob, “Tawe ako nin mga aki ta kun dai, magagadan ako.”

² Naanggot si Jacob saiya asin nagsabi, “Ano ako, Dios? Siya an habo na magkaigwa ka nin mga aki.”

³ Nagsabi si Rachel, “Uya an katabang kong si Bilha; dorogan mo siya tanganing magkaigwa siya nin aki para sako. Sa paagi niya, ako magigin sarong ina.”

⁴ Kaya itinao niya si Bilha ki Jacob asin dinorogan kaini an katabang.

⁵ Nagbados si Bilha asin nag-aki nin lalaki.

⁶ Olay ni Rachel, “Hinukoman ako nin Dios. Dinangog niya an sakong mga pamibi asin tinawan niya ako nin aki;” kaya an aki nginaranan niyang Dan.

⁷ Nagbados giraray si Bilha asin namundag an ikaduwang aking lalaki.

⁸ Nagsabi si Rachel, “Nakilaban ako nin marahay sa sakong tugang asin ako an nanggana;” kaya an aki nginaranan niyang Neftali.

⁹ Kan dai na nangangaki si Lea, itinao niya ki Jacob an katabang niyang si Zilpa bilang agom,

¹⁰ asin nangaki ining lalaki.

¹¹ Olay ni Lea, “Maswerte ako;” kaya an aki nginaranan niyang Gad.

¹² Nangaki giraray nin lalaki an katabang ni Lea na si Zilpa.

¹³ Nagsabi si Lea, “Maogma ako! Poon ngunyan, aapodon akong maogma kan kababaehan,” kaya an aki nginaranan niyang Aser.

¹⁴ Kan tig-anihan nin trigo, nagduman si Ruben sa oma asin nakakua nin mga mandragora; dinara niya an mga ini ki Lea na saiyang ina. Olay ni Rachel ki Lea, “Tawe man ako kan mga mandragora kan saimong aki.”

¹⁵ Nagsimbag si Lea, “Dai ka pa nakontento sa pag-agaw kan sakong agom? Ngunyan gusto mo pang kuahon an mga mandragora kan sakong aki?” Nagsimbag si Rachel, “Kun itao mo sako an mga mandragora kan saimong aki, pwede mong dorogan si Jacob ngunyan na banggi.”

¹⁶ Pagkabanggi, pag-abot ni Jacob hale sa oma, sinabat siya ni Lea asin sinabihan, “Ako an dorogan mo ngunyan na banggi, huli ta itinao ko ki Rachel an mga mandragora kan sakong aki bilang bayad para saimo.” Kaya kan bangging idto, si Lea an dinorogan ni Jacob.

¹⁷ Sinimbag nin Dios an pamibi ni Lea; nagbados siya asin nangaki kan ikalimang lalaki.

¹⁸ Olay ni Lea, “Tinandaan ako nin Dios huli ta itinao ko an sakong oripon sa sakong agom;” kaya an aki nginaranan niyang Issakar.

¹⁹ Nagbados giraray si Lea asin nangaki kan ikaanom na lalaki.

²⁰ Olay niya, “Tinawan ako nin Dios nin magayon na regalo; ngunyan aakoon na ako ni Jacob bilang agom huli ta anom nang aking lalaki an ipinangaki ko”; kaya an aki nginaranan niyang Zabulon.

²¹ Pakatapos, nangaki siya nin sarong babae na nginaranan niyang Dina.

²² Dangan nagiromdoman nin Dios si Rachel; sinimbag niya an mga pamibi kaini asin pinapangyaring mag-aki.

²³ Nagbados si Rachel asin nangaki nin lalaki. Olay niya, “Hinale na nin Dios an sakong kasosopgan.

²⁴ Tawan pa logod ako nin Kagurangnan nin sarong aking lalaki”; kaya an aki nginaranan niyang Jose.

Nakikondisyon si Jacob ki Laban

²⁵ Pagkamundag ni Jose, sinabihan ni Jacob si Laban, “Tugote akong maghale tanganing makapuli ako sa sadiri kong harong asin daga.

²⁶ Tawan sako an sakong mga agom asin kaakian na napasako huli sa paglingkod ko saimo asin mahale na ako; aram mo kun anong paglingkod an ginibo ko saimo.”

²⁷ Alagad nagsimbag si Laban, “Ini an masasabi ko: sosog sa naaaraman ko sa panghuhula, benendisyonan ako nin Kagurangnan huli saimo.

²⁸ Magsabi ka kan sweldong gusto mo asin itatao ko iyan saimo.”

²⁹ Nagsimbag si Jacob, “Aram mo kun paano ako nagtrabaho para saimo asin kun paano nagdakul an saimong mga hayop sa pangataman ko.

³⁰ Dikit an sadiri mo bago ako mag-abot; ngunyan dakul nang marahay asin benendisyonan ka nin Kagurangnan huli sako. Bako daw panahon na tanganing mangnohon ko man an sakong sadiring pamilya?”

³¹ Naghapot giraray si Laban, “Ano an ibabayad ko saimo?” Nagsimbag si Jacob, “Dai ko kaipuhan an sweldo. Padagos kong aatamanon an saimong mga hayop, alagad sa sarong kondisyon:

³² tugotan mong pilion ko asin laenon sa mga hayop mo an mga karnero asin kanding na may patak-patak saka may raya-raya asin an gabos na itom an kolor; ini an magigin kabayadan ko.

³³ Sa maabot na aldaw madali mong maaaraman kun ako nagin onesto sa saimo; kun makahiling ka nin hayop na bakong may patak-patak saka may raya-raya o bakong itom an kolor sa mga hayop ko, ibilang mo iyan na hinabonan ko.”

³⁴ Nagsimbag si Laban, “Sige, gibohon ta an sinabi mo.”

³⁵ Alagad kan aldaw na iyan, hinale ni Laban an gabos na lalaki asin babaeng kanding na may patak-patak asin may raya-raya; hinale man niya an mga itom na karnero asin ipinaataman an mga ini sa mga aki niya.

³⁶ Dinara ni Laban an mga hayop sa sarong lugar na an rayo hale ki Jacob tolong aldaw kun lalakawon. Si Jacob an nag-ataman kan mga natadang hayop ni Laban.

³⁷ Kuminua si Jacob nin mga sanga nin mga kahoy na alamo, abellano asin kastanyo dangan binakbak niya an ibang kabtang kan mga ubak tanganing magkaigwa nin puting patak-patak.

³⁸ Ibinugtak niya an mga sanga sa atubang kan mga raraan kan hayop huli ta nagmamaroan an mga ini kun sinda minaduman sa pagrara.

³⁹ Kaya an mga hayop na nangidam sa atubang kan mga sanga, nag-ogbon nin may patak-patak asin may raya-raya.

⁴⁰ Linaen ni Jacob an mga karnero sa mga kanding. Pinaatubang niya an mga karnero sa may mga raya-raya asin mga itom na hayop ni Laban. Sa paaging ini, napadakul niya an saiyang mga hayop asin sinuhay niya an mga ini sa mga hayop ni Laban.

⁴¹ Kun an makokosog na hayop an nagmamaroan, ibinubugtak ni Jacob an mga sanga sa mga raraan, sa atubang kan mga hayop tanganing pangidaman ninda an mga sanga.

⁴² Alagad dai niya ibinubugtak an mga sanga sa atubang kan mga maniwang na hayop. Kaya an gabos na maniwang napaduman ki Laban, asin an gabos na makosog napaduman ki Jacob.

⁴³ Sa paaging ini, nagyaman nin marahay si Jacob. Nagkaigwa siya nin dakul na hayop, oripon, kamelyo asin asno.