Genesis 21 - Marahay na Bareta Biblia

An Pagkamundag ni Isaac

¹ Benendisyonan nin Kagurangnan si Sara siring sa pangako niya,

² asin nagbados si Sara dangan nangaki nin sarong lalaki ki Abraham kan gurang na ini. Namundag an aki sa itinalaan na panahon nin Dios.

³ Isaac an inginaran saiya ni Abraham,

⁴ asin kan walong aldaw na an aki, sinerkomsisyon siya ni Abraham sosog sa pagboot nin Dios.

⁵ Sanggatos na an edad ni Abraham kan mamundag si Isaac.

⁶ Nagsabi si Sara, “An Dios nagdara sako nin ngingisihan saka kaogmahan; asin an siisay man na makadangog kaini mangisi kaiba ko.”

⁷ Nagsabi pa siya, “Siisay an makapagsabi ki Abraham na si Sara magpapadodo nin mga aki? Alagad uya, nagkaaki ako nin lalaki sa saiyang pagkagurang.”

⁸ Nagtalubo si Isaac, asin sa aldaw na binutas siya, nagtao si Abraham nin dakulang bangkete.

Pinalayas si Hagar asin si Ismael

⁹ Sarong aldaw, si Ismael na aki ni Hagar ki Abraham, nakikikawat ki Isaac na aki ni Sara.

¹⁰ Nahiling sinda ni Sara kaya sinabihan niya si Abraham, “Palayasa an babaeng oripon na ini asin an saiyang aki. Habo kong mahirasan an aki kan babaeng ini kan kayamanan mo na dapat manahon kan aki ko.”

¹¹ Napurisaw nin marahay si Abraham huli ta aki man niya si Ismael.

¹² Alagad tinaraman nin Dios si Abraham, “Dai ka maghadit sa aki asin sa oripon mong si Hagar. Gibohon mo sana an ano man na sabihon saimo ni Sara, huli ta ki Isaac ka magkakaigwa kan ipinangako kong mga kapagarakian.

¹³ Gigibohon ko man na sarong nasyon an aki kan babaeng oripon huli ta aki mo siya.”

¹⁴ Kaya amay pa kan sunod na aldaw, tinawan si Hagar ni Abraham nin pagkakan asin nin sarong laogan na anit na pano nin tubig. Dangan ibinugtak ni Abraham an aki sa likod kan ina asin pinahale na ini. Naghale si Hagar asin nagparalakaw sa kalangtadan nin Beer-sheba.

¹⁵ Kan maubos an tubig, binayaan kan ina an saiyang aki sa lindong nin sarong marambong na tinanom

¹⁶ dangan tuminukaw sa sarong lugar na may sanggatos metros an rayo. Nagsaboot siya, “Dai ko kayang hilingon an pagkagadan kan sakong aki.” Mantang nagtutukaw siya duman, nagpoon siyang maghibi.

¹⁷ Nadangog nin Dios na naghihibi an aki, asin hale sa kalangitan tinaraman si Hagar kan anghel nin Dios, “Ano an problema mo, Hagar? Dai ka matakot; huli ta nadangog nin Dios an tingog kan saimong aki.

¹⁸ Tumindog ka, lakaw, asin buhaton mo siya dangan lingaon mo. Gigibohon kong sarong dakulang nasyon an saiyang mga kapagarakian.”

¹⁹ Dangan binukasan nin Dios an mga mata ni Hagar asin nahiling niya an sarong bubon; kaya nagduman siya asin pinano nin tubig an laogan na anit asin pinainom an saiyang aki.

²⁰ Dai pinabayaan nin Dios an aki asin nagdakula ini. Nag-erok siya sa kalangtadan nin Paran asin nagin sarong ekspertong paraayam.

²¹ Ikinua siya kan saiyang ina nin sarong babaeng taga Egipto na magin saiyang agom.

An Kontrata ni Abraham asin ni Abimelek

²² Kaidtong panahon, si Abimelek asin an pamayo kan saiyang hukbo na si Ficol nagsabi ki Abraham, “Kaiba mo an Dios sa gabos mong gibo.

²³ Kaya ngunyan magsumpa ka sa atubang nin Dios na dai mo ako lolokohon, ni an sakong mga aki o an sakong mga kapagarakian. Nagin marahay ako saimo kaya mangako kang siring man an ibabalos mo sako asin sa dagang ini na saimong pinag-eerokan.”

²⁴ Nagsimbag si Abraham, “Minasumpa ako.”

²⁵ Dangan nagreklamo si Abraham ki Abimelek manongod sa sarong bubon na sinadiri kan mga oripon ni Abimelek.

²⁶ Nagsimbag si Abimelek, “Dai ko aram kun siisay an naggibo kaini; dai mo man ini sinabi sako asin ngunyan ko pa sana ini naaraman.”

²⁷ Kaya tinawan ni Abraham si Abimelek nin mga karnero asin mga baka, dangan naggibo sinda nin kontrata.

²⁸ Isinuhay ni Abraham sa kadaklan an pitong babaeng kordero

²⁹ kaya naghapot si Abimelek, “Tano ta isinuhay mo an pitong kordero?”

³⁰ Nagsimbag si Abraham, “Akoa an pitong korderong ini bilang patotoo na ako an nagkalot kaining bubon.”

³¹ Kaya an lugar inapod na Beer-sheba, huli ta duman ninda ginibo an kontrata.

³² Pakatapos na gibohon ninda an kontrata sa Beer-sheba, nagpuli si Abimelek asin si Ficol sa daga kan mga Filistio.

³³ Nagtanom si Abraham nin kahoy na sampalok sa Beer-sheba asin nag-omaw sa Kagurangnan, an Daing Kataposan na Dios.

³⁴ Nag-erok si Abraham sa daga kan mga Filistio sa haloy na panahon.