Genesis 16 - Marahay na Bareta Biblia

Si Hagar asin si Ismael

¹ Dai nagkaaki si Abram ki Sarai na saiyang agom. Alagad igwa si Sarai nin sarong babaeng oripon na taga Egipto na an ngaran Hagar.

² Kaya sinabihan ni Sarai si Abram, “Dai itinugot nin Kagurangnan na mag-aki ako, alagad uya an sakong babaeng oripon; dorogan mo siya asin tibaad magkaigwa ako nin aki huli saiya.” Nag-oyon si Abram sa sinabi ni Sarai.

³ Kaya itinao ni Sarai si Hagar ki Abram bilang kasaroan. (Sampolong taon nang nag-erok si Abram sa Canaan kan nangyari ini.)

⁴ Dinorogan ni Abram si Hagar asin nagbados ini. Kan maaraman niyang bados siya, ipinaghambog niya ini asin pinag-olog-olog niya si Sarai.

⁵ Huli kaini, sinabihan ni Sarai si Abram, “Sala mo kun tano ta pinag-oolog-olog ako ni Hagar. Itinao ko siya saimo, alagad poon kan maaraman niyang bados siya, pinag-olog-olog na niya ako. Hukoman logod nin Kagurangnan kun siisay sato an tama, ika o ako!”

⁶ Nagsimbag si Abram, “Sakop mo an saimong oripon; giboha saiya an gusto mo.” Dangan pinasakitan ni Sarai an saiyang oripon kaya nagdulag ini.

⁷ Sinabat si Hagar kan anghel nin Kagurangnan sa may burabod sa kalangtadan, sa dalan pasiring sa Sur.

⁸ Hinapot siya kan anghel, “Hagar, oripon ni Sarai, saen ka hale asin saen ka maduman?” Nagsimbag siya, “Nagdudulag ako ki Sarai na sakong kagurangnan.”

⁹ “Bumalik ka,” an sabi kan anghel, “asin paglingkodan mo siya.”

¹⁰ Nagsabi pa an anghel, “Papadakulon ko nin marahay an saimong mga kapagarakian kaya mayo nin makakabilang sainda.

¹¹ Bados ka, asin mangangaki nin lalaki; aapodon mo siyang Ismael, huli ta dinangog nin Kagurangnan an saimong agrangay.

¹² Alagad mamumuhay siya siring sa sarong lalaw na asno; magigin kalaban niya an gabos asin an gabos magigin kalaban siya. Mag-eerok siyang harayo sa saiyang mga kadugo.”

¹³ Nagsaboot si Hagar, “Totoo daw na nahiling ko an Dios asin nabuhay pa ako pakatapos?” Kaya an Kagurangnan na nagtaram saiya inapod niyang, “Sarong Dios na Naghihiling.”

¹⁴ Kaya poon kaidto, an bubon duman sa pagultanan kan Kades asin Bered inapod, “Beer-lahai-roi.”

¹⁵ Nangaki si Hagar nin sarong lalaki asin Ismael an inginaran saiya ni Abram na saiyang ama.

¹⁶ Otsenta y seis na an edad ni Abram kan ipangaki ni Hagar si Ismael.