Genesis 12 - Marahay na Bareta Biblia

Inapod nin Dios si Abram

¹ Tinaraman nin Kagurangnan si Abram, “Bayaan mo an saimong daga, an saimong mga kadugo asin an harong kan saimong ama dangan magduman ka sa dagang ipapahiling ko saimo.

² Gigibohon takang sarong dakulang nasyon, bebendisyonan taka asin gigibohon kong bantog an saimong ngaran tanganing ika magin sarong bendisyon.

³ Bebendisyonan ko an mga mabendisyon saimo, Asin isusumpa ko an mga masumpa saimo; Sa paagi mo, bebendisyonan ko man an gabos na nasyon sa daga.

⁴ Kaya kan setenta y singko na an edad ni Abram, binayaan niya an Haran sosog sa itinaram saiya nin Kagurangnan; nag-iba saiya si Lot.

⁵ Ipinag-iba ni Abram si Sarai na saiyang agom, asin an sobrino niyang si Lot patin an mga oripon na napasainda sa Haran; dara man ninda an gabos nindang pagsadiri. Dangan naglakaw sinda pasiring sa daga nin Canaan. Pag-abot ninda duman,

⁶ nagpadagos pa sa paglakaw si Abram sagkod na makaabot siya sa sagradong kahoy nin More, an banal na lugar sa Shekem. (Kaidtong panahon duman pa nag-eerok an mga Cananeo.)

⁷ Nagpahiling an Kagurangnan ki Abram asin nagtaram saiya, “Iyo ini an daga na itatao ko sa saimong mga kapagarakian.” Kaya naggibo siya duman nin altar para sa Kagurangnan na nagpahiling saiya.

⁸ Dangan nagpasiring siya sa mabulod na lugar sa sirangan kan Betel asin itinugdok an saiyang tolda sa pagultanan kan Betel na nasa solnopan asin kan Ai na nasa sirangan. Guminibo siya duman nin altar asin nagsamba sa Kagurangnan.

⁹ Dangan nagpadagos sa paglakaw si Abram pasiring sa habagat na parte kan Canaan.

Si Abram sa Egipto

¹⁰ Nagkaigwa nin gutom sa Canaan, asin makuring gayo an gutom duman, kaya nagpasiring sa Egipto si Abram tanganing duman ngona mag-erok.

¹¹ Kan malaog na siya sa Egipto, sinabihan niya si Sarai na saiyang agom, “Saro kang magayon na babae.

¹² Kun mahiling ka kan mga Egipcio, sasabihon nindang agom taka kaya gagadanon ninda ako alagad bubuhayon ka.

¹³ Sabihan mo sindang tugang taka tanganing huli saimo magin marahay an pag-ako ninda sako asin dai ninda ako paggadanon.”

¹⁴ Kan maglaog na si Abram sa Egipto, nahiling kan mga Egipcio na talagang magayon an saiyang agom.

¹⁵ Nahiling man siya kan mga opisyal kan hade nin Egipto asin inosip ninda saiya na talagang magayon si Sarai, kaya dinara ninda ini sa palasyo.

¹⁶ Huli ki Sarai, nagin marahay an pag-ako ki Abram kan hade. Tinawan siya kaini nin mga karnero, kanding, baka, asno, oripon asin kamelyo.

¹⁷ Alagad huli ta kinua kan hade si Sarai, siya asin an mga yaon sa saiyang palasyo pinadarahan nin Kagurangnan nin mga makangirhat na helang.

¹⁸ Kaya ipinaapod kan hade si Abram asin hinapot, “Ano ining ginibo mo sako? Tano ta dai ka nagtaram na agom mo an babaeng ini?

¹⁹ Tano ta nagsabi kang tugang mo siya, kun kaya kinua ko siya na magin agom ko? Uya an agom mo; kuaha siya asin hale na kamo!”

²⁰ Nagboot an hade sa mga tawohan niya manongod ki Abram, kaya pinahale ninda ini sa Egipto kaiba an saiyang agom asin an gabos niyang rogaring.