Genesis 11 - Marahay na Bareta Biblia

An Tore nin Babilon

¹ Kaidto, saro sana an lengwahe kan mga tawo sa kinaban.

² Sa pagparalakaw kan mga tawo sa sirangan, nakaabot sinda sa sarong kapatagan sa daga kan Babilonia asin duman na sinda nag-erok.

³ Nag-orolay-olay sinda, “Gumibo kita nin mga ladrilyo asin lutoon ta nin marahay.” Kaya nagkaigwa sinda nin mga ladrilyo embes na gapo asin aspalto embes na semento.

⁴ Dangan nagsabi sinda, “Gumibo kita nin sarong syudad, na igwa nin tore na abot sa langit, tanganing mabantog kita asin dai magkasiriblag sa bilog na kinaban.”

⁵ Naghilig an Kagurangnan tanganing hilingon an syudad asin an tore na ginibo kan mga tawo.

⁶ Nagtaram siya, “An mga tawong ini nagkakasararo asin saro sana an saindang lengwahe; iyo ini an kapinonan kan saindang mga gigibohon. Dai mahahaloy magigibo na ninda an ano man na saindang mawoton.

⁷ Magduman kita asin ribongon ta an saindang lengwahe tanganing dai na sinda magkasinarabotan.”

⁸ Kaya iwinarak nin Kagurangnan an mga tawo sa bilog na kinaban asin binayaan kan mga ini an pagtugdok kan syudad.

⁹ An syudad nginaranan Babilon, huli ta duman rinibong nin Kagurangnan an lengwahe kan gabos na tawo, asin hale duman iwinarak niya sinda sa bilog na kinaban.

An mga Kapagarakian ni Sem

¹⁰ Iyo ini an mga kapagarakian ni Sem. Duwang taon pakatapos kan baha, kan sanggatos na an edad ni Sem, nagkaigwa siya nin aking lalaki na iyo si Arpaksad.

¹¹ Dangan nabuhay pa siya sa laog nin kinyentos na taon asin nagkaigwa pa nin ibang mga aki.

¹² Kan treynta y singkong taon na si Arpaksad, namundag an aki niyang si Sela.

¹³ Dangan nabuhay pa siya sa laog nin kwatro syentos tres na taon asin nagkaigwa pa nin ibang mga aki.

¹⁴ Kan treyntang taon na si Sela, namundag an aki niyang si Eber.

¹⁵ Dangan nabuhay pa siya sa laog nin kwatro syentos tres na taon asin nagkaigwa pa nin ibang mga aki.

¹⁶ Kan treynta y kwatrong taon na si Eber, namundag an aki niyang si Peleg.

¹⁷ Dangan nabuhay pa siya sa laog nin kwatro syentos treyntang taon asin nagkaigwa pa nin ibang mga aki.

¹⁸ Kan treyntang taon na an edad ni Peleg, namundag an aki niyang si Reu.

¹⁹ Dangan nabuhay pa siya sa laog nin dos syentos nwebeng taon asin nagkaigwa pa nin ibang mga aki.

²⁰ Kan treynta y dos na an edad ni Reu, namundag an aki niyang si Serug.

²¹ Dangan nabuhay pa siya sa laog nin dos syentos syeteng taon asin nagkaigwa pa nin ibang mga aki.

²² Kan treyntang taon na an edad ni Serug, namundag an aki niyang si Nahor.

²³ Dangan nabuhay pa siya sa laog nin dos syentos na taon asin nagkaigwa pa nin ibang mga aki.

²⁴ Kan beynte y nwebeng taon na an edad ni Nahor, namundag an aki niyang si Tera.

²⁵ Dangan nabuhay pa siya sa laog nin syento dyes y nwebeng taon asin nagkaigwa pa nin ibang mga aki.

²⁶ Kan setenta na an edad ni Tera, namundag an mga aki niya na iyo si Abram, si Nahor asin si Haran.

An mga Kapagarakian ni Tera

²⁷ Iyo ini an mga kapagarakian ni Tera, na ama ni Abram, Nahor asin Haran. Si Haran iyo an ama ni Lot.

²⁸ Naenot na nagadan si Haran ki sa ama niyang si Tera, duman sa dagang namundagan niya, sa Ur kan Babilonia.

²⁹ Naagom ni Abram si Sarai asin naagom ni Nahor si Milca na aki ni Haran asin tugang ni Isca.

³⁰ Alagad baog si Sarai kaya dai siya nagkaaki.

³¹ Kan maghale si Tera sa Ur kan Babilonia tanganing magduman sa Canaan, ipinag-iba niya si Abram na saiyang aki, an makoapo niyang si Lot na aki ni Haran asin an manugang niyang si Sarai; alagad kan makaabot sinda sa Haran, duman na sinda nag-erok.

³² Nagadan si Tera sa Haran sa edad na dos syentos singkong taon.