Genesis 10 - Marahay na Bareta Biblia

An mga Kapagarakian kan mga aki ni Noe

¹ Iyo ini an mga kapagarakian kan mga aking lalaki ni Noe na si Sem, Ham, asin Jafet. Sindang tolo nagkaigwa nin mga aking lalaki pakatapos kan baha.

² An mga aking lalaki ni Jafet iyo si Gomer, Magog, Madai, Javan, Tubal, Mesek, asin Tiras.

³ An mga aking lalaki ni Gomer iyo si Askenaz, Rifat, asin Togarma.

⁴ An mga aking lalaki ni Javan iyo si Elisa, Espanya, Chipre asin Rodas.

⁵ Sinda an mga ginikanan kan mga tawong nag-eerok sa mga baybayon asin sa mga isla. Sinda an mga aking lalaki ni Jafet, na an lambang saro nagin dakulang nasyon na may sadiring daga saka lengwahe.

⁶ An mga aking lalaki ni Ham iyo si Cus, Egipto, Libya, asin Canaan.

⁷ An mga aking lalaki ni Cus iyo si Sheba, Havila, Sabta, Raama asin Sabteca. An mga aking lalaki ni Raama iyo si Sheba saka Dedan.

⁸ Si Cus iyo an ama ni Nimrod; iyo ini an enot na tawo sa kinaban na nabantog bilang sarong mapangyaring mananakop.

⁹ Sa atubang nin Kagurangnan, siya sarong dakulang paraayam, kun kaya nagkaigwa nin kasabihan, “Siring ki Nimrod na dakulang paraayam sa atubangan nin Kagurangnan!”

¹⁰ Kaayon sa kaenot-enoteng kahadean na sakop niya iyo an Babilon, an Erek, asin an Accad, na gabos yaon sa daga kan Babilonia.

¹¹ Hale sa dagang ini nagduman siya sa Asiria asin itinugdok an mga syudad nin Nineve, Rehobot-ir, Cala,

¹² asin Resen na nasa pagultanan kan Nineve asin Cala, an dakulang syudad.

¹³ An mga aking lalaki ni Egipto iyo si Lydia, Anam, Lehab, Naftu,

¹⁴ Patrus, Caslu, na ginikanan kan mga Filisteo, asin ni Caftor.

¹⁵ Si Canaan iyo an ama si Sidon, na matua niyang aking lalaki, asin ni Het.

¹⁶ Si Canaan iyo man an ginikanan kan mga Jebuseo, Amoreo, Gergeseo,

¹⁷ Heveo, Araceo, Sineo,

¹⁸ Arvadeo, Zemareo asin Hamateo. Dangan nakalakop an manlaen-laen na tribu kan mga Cananeo.

¹⁹ Hale sa Sidon, an saindang teritoryo nakaabot sa Gerar harani sa Gaza sa habagat asin sa Sodoma, Gomorra, Adma saka Zeboiim harani sa Lasa sa sirangan.

²⁰ Iyo ini an mga aki ni Ham, na an lambang saro nagin dakulang nasyon na may sadiring daga asin lengwahe.

²¹ Si Sem na matuang tugang ni Jafet, iyo an ginikanan kan gabos na Hebreyo.

²² An mga aking lalaki ni Sem iyo si Elam, Assur, Arpaksad, Lud asin Aram.

²³ An mga aking lalaki ni Aram iyo si Uz, Hul, Geter asin Mas.

²⁴ Si Arpaksad iyo an ama ni Sela na ama ni Eber.

²⁵ Duwa an nagin aking lalaki ni Eber—an saro inapod niyang Peleg, huli ta sa panahon kaini nabanga an mga tawo sa daga; asin an ikaduwa, nginaranan niyang Joktan.

²⁶ Si Joktan iyo an ama ninda Almodad, Selef, Hazarmavet, Jera,

²⁷ Hadoram, Uzal, Dikla,

²⁸ Obal, Abimael, Sheba,

²⁹ Ofir, Havila, asin Jobab. Gabos sinda gikan ki Joktan.

³⁰ An teritoryo na saindang pinag-erokan nagpoon sa Mesa pasiring sa Sefar sagkod sa kabubuldan sa sirangan.

³¹ Ini an mga aki ni Sem, na an lambang nasyon na may sadiring daga asin lengwahe.

³² Iyo ini an mga pamilya kan mga aking lalaki ni Noe, sosog sa saindang mga kapagarakian. Sa sainda nagpoon an gabos na nasyon sa kinaban na nakalakop sa daga pakatapos kan baha.