Filemon 1 - Marahay na Bareta Biblia

¹ Surat na hale ki Pablo na sarong bilanggo dahel ki Cristo Jesus; hale man ki Timoteo na satong tugang. Para ki Filemon, na katood mi saka kapwa paralingkod,

² sa mga paratubod na nagtitipon sa saimong harong, asin ki Apia na satong tugang na babae, patin ki Arquipo na kapwa nyamo soldados:

³ Mapasaindo logod an biyaya asin an katoninongan nin Dios na satong Ama asin ni Jesu-Cristo na Kagurangnan.

An Pagkamoot saka Pagtubod ni Filemon

⁴ Danay akong nagpapasalamat sa sakong Dios, kun ginigiromdom taka sa sakong pamibi,

⁵ huli ta nababaretaan ko an dapit sa pagkamoot mo sa gabos na banal asin kan pagtubod mo ki Jesus na Kagurangnan.

⁶ Namimibi ako sa Dios na an satong pagkasaro sa pagtubod makatabang sato nganing orog na masabotan an mga biyaya na yaon sato diyan ki Cristo.

⁷ An saimong pagkamoot, namomotan na tugang, nagtao sako nin dakulang kaogmahan saka karangahan, huli ta pinaogma mo an puso kan mga banal.

Kahagadan para ki Onesimo

⁸ Kaya bilang tugang mo ki Cristo, makosog an boot kong pagbotan ka kan dapat mong gibohon,

⁹ alagad huli sa pagkamoot, nakikimaherak ako saimo—ako, si Pablo, na sarong sugo ni Cristo Jesus asin ngunyan nabibilanggo dahel saiya.

¹⁰ Kaya nakikimaherak ako saimo para ki Onesimo na nagin espiritwal kong aki digdi sa bilanggoan.

¹¹ Kaidto dai mo siya napapakinabangan, alagad ngunyan makakatabang na siya sa satong duwa.

¹² Pinababalik ko siya saimo ngunyan na garo man sanang dara niya an sakong puso.

¹³ Boot ko kutana na digdi na sana siya sa kaibahan ko, mantang nabibilanggo pa ako dahel kan Marahay na Bareta, tanganing mapaglingkodan niya ako embes na ika an maglingkod sako.

¹⁴ Alagad habo kong piriton kang tabangan ako; kundi mawot kong gibohon mo iyan sa sadiring boot. Kaya dai ako magibo nin anoman kun dai mo oyon.

¹⁵ Tibaad napasiblag saimo si Onesimo sa halipot na panahon tanganing makabalik siya saimo sagkod lamang,

¹⁶ bako bilang sarong oripon kundi orog pa ki sa oripon—bilang namomotan na tugang ki Cristo. Mahalaga siya sako! Orog siyang magigin mahalaga saimo bilang oripon asin bilang tugang sa Kagurangnan!

¹⁷ Kaya kun ibinibilang mo akong katrabaho mo, akoon mo siya giraray na garong ako an inaako.

¹⁸ Kun siya nakaginibo saimo nin anoman na sala o nakautang saimo nin anoman, ako an singilon mo.

¹⁹ Ako mismo an nagsurat kan mga tataramon na ini: Ako, si Pablo, an mabayad saimo. (Dai na kutana kaipuhan na pagiromdomon taka na utang mo sako an saimo mismong buhay.)

²⁰ Kaya, tugang ko, giboha ini para sako huli sa Kagurangnan; paogmaha an puso ko, bilang sarong tugang ki Cristo!

²¹ Sinusuratan taka huli ta aram ko na gigibohon mo an sakong hinahagad—asin orog pa kan sakong hinahagad.

²² Siring man, andaman mo ako nin sarong kwarto, huli ta naglalaom ako na sisimbagon nin Dios an mga pamibi nindo gabos, saka ibabalik niya ako saindo.

Huring mga Pangongomusta

²³ Nangongomusta saimo si Epafras, na nabibilanggo man kaiba ko dahel ki Cristo Jesus.

²⁴ Siring man nangongomusta saimo si Markos, si Aristarco, si Demas, saka si Lukas na mga katrabaho ko.

²⁵ Mapasaindo logod gabos an biyaya ni Jesu-Cristo na Kagurangnan.