Ezekiel 5 - Marahay na Bareta Biblia

Inaris ni Ezekiel an Saiyang Buhok saka Barabas

¹ Nagtaram an Kagurangnan, “Aki nin tawo, kumua ka nin sarong matarom na espada asin gamita iyan sa pag-aris kan saimong buhok saka barabas. An pinutol na buhok timbangon mo dangan pagtolohon mong kabtang.

² An saro sa tolong kabtang suloon mo sa tahaw kan syudad kun tapos na an pagsalakay. An ikaduwang kabtang kan buhok purutolon mo kan saimong espada mantang naglilibot ka sa syudad, dangan an ikatolong kabtang kan buhok iwarak mo tanganing ipadpad kan doros asin lalamagon ko iyan kan sakong espada.

³ Magtada ka nin nagkapirang buhok asin patoson mo sa gayad kan saimong gubing.

⁴ Sa nagkapirang buhok na ini, kumua ka nin dikit, itapok mo sa kalayo tanganing matutong. Hale diyan magikan an kalayo na malakop sa bilog na nasyon nin Israel.”

⁵ Nagtaram an Kagurangnan Dios, “Hilinga an Jerusalem. Ibinugtak ko siya sa tahaw kan kinaban, asin nakapalibot saiya an mga nasyon.

⁶ Alagad nagrebelde an Jerusalem tumang sa sakong mga togon asin nagpahiling na orog siyang masombikal ki sa mga nasyon sa palibot niya. Isinikwal kan Jerusalem an sakuyang mga togon asin dai kinuyog an sakong mga pagboot.

⁷ Kaya dangoga, O Jerusalem, an itinataram ko, an Kagurangnan Dios: Huli ta isinikwal mo an sakong mga togon asin dai mo kinuyog an sakong mga pagboot, nagin mas maribok ka ki sa mga nasyon sa palibot mo. Sinunod mo an mga kaugalean kan ibang mga nasyon.

⁸ Kaya ako, an Kagurangnan Dios, minataram saimo na kaiwal mo ako. Huhukoman taka sa atubang kan mga nasyon.

⁹ Huli kan makauuyam mong mga gawe, gigibohon ko saimo an dai ko pa lamang ginibo kaidto o gigibohon pa ngapit.

¹⁰ Mangyayari na an mga aki sa Jerusalem kakakanon kan saindang mga magurang, asin an mga magurang kakakanon kan saindang mga aki. Papadusahan taka asin an mga matadang buhay iwawarak ko sa gabos na direksyon.

¹¹ “Kaya, mantang ako an Dios na buhay—iyo ini an tataramon nin Kagurangnan Dios—huli ta dinigtaan mo an sakong Templo sa paagi kan gabos na maraot saka makauuyam mong mga gibo, pupuhoon taka. Dai ako mapahiling nin anoman na pagkaherak.

¹² An ikatolong kabtang kan saimong banwaan magagadan sa helang saka sa makuring gutom; an saro pang kabtang magagadan sa espada sa luwas kan syudad; asin an saro pang kabtang iwawarak ko sa gabos na direksyon dangan lalamagon ko nin espada.

¹³ “An gabat kan sakong kaanggotan mamamatean mo sagkod na makontento ako. Kun mangyari na an gabos na ini, maaaraman mo na ako, an Kagurangnan, an nagtaram saimo huli ta anggot ako sa saimong bakong pagkamaimbod.

¹⁴ Tutuyatuyaon ka asin haharayoan kan lambang mag-agi na gikan sa ibang nasyon sa palibot mo.

¹⁵ “Sa panahon na naaanggot ako saimo dangan padusahan taka, matatakot an gabos na nasyon sa palibot mo; pagtutuyatuyaon ka saka pagngingisihan ninda.

¹⁶ Oontokon ko an pagtao nin pagkakan saimo asin gugutomon taka. An kulog nin gutom na mamamatean mo magigin arog sa kulog kan tama nin sarong matarom na bosog na magadan saimo.

¹⁷ Mapadara ako nin gutom saka mga lalaw na hayop na magadan kan saimong mga aki. Mapadara pa ako nin helang, kadahasan, saka gera na magadan saimo. Ako, an Kagurangnan, an nagtaram.”