Ezekiel 10 - Marahay na Bareta Biblia

Naghale sa Templo an Kamurawayan kan Kagurangnan

¹ Dangan naghiling ako sa pamayohan kan mga kerubin asin nahiling ko an garo sarong trono na gibo sa safiro.

² Sinabihan nin Dios an lalaking nakagubing nin lino, “Magduman ka sa pagultanan kan mga rweda na nasa pamitisan kan mga kerubin asin panoon mo nin baga an saimong kamot. Dangan iwarak mo an mga iyan sa syudad.” Nahiling ko kan magduman siya.

³ Nagtitindog an mga kerubin sa parteng habagat kan Templo kan maglaog siya, asin an panlaog na patyo napano nin panganoron.

⁴ An kamurawayan kan Kagurangnan nag-itaas hale sa mga kerubin dangan nagpasiring sa may palaog kan Templo. An Templo napano nin panganoron asin an patyo nagsilyab huli kan liwanag kan kamurawayan nin Kagurangnan.

⁵ An ribok kan pakpak kan mga kerubin nadangog sagkod sa patyong nasa luwas. An tanog garo arog kan tingog kan Makakamhan na Dios.

⁶ Kan pagbotan nin Kagurangnan an lalaking nakagubing nin lino na magkua nin kalayo sa pagultanan kan mga rweda sa pamitisan kan mga kerubin, naglaog an lalaki asin nagtindog sa kataed kan sarong rweda.

⁷ Inunat kan saro sa mga kerubin an saiyang kamot asin nagkua nin mga baga sa tahaw ninda, dangan ibinugtak idto sa kamot kan lalaki. Kinua kaini an mga baga dangan naghale.

⁸ Nahiling ko na an lambang kerubin igwa nin kamot na garo sa tawo sa irarom kan saiyang mga pakpak.

^9-10 Nahiling ko man na igwa nin apat na rwedang gabos magkapareho an porma; an sarong rweda kataed nin sarong kerubin. An mga rweda nagkikintab siring sa mahalagang mga bato, asin an pakagibo kaiyan garo sarong rweda sa laog nin sarong rweda.

¹¹ Kun minahiro an mga kerubin, pwede sindang magduman sa arin man na direksyon maski dai na minabirik. Sarabay sindang minahiro sa direksyon na saindang mawoton na dai na kaipuhan pang magbirik.

¹² An saindang mga hawak, likod, kamot, pakpak, saka mga rweda gabos igwa nin mga mata.

¹³ An mga rwedang ini pareho kan nahiling ko sa enot na bisyon.

¹⁴ An lambang kerubin igwa nin apat na lalawogon: an enot lalawogon nin torong baka, an ikaduwa lalawogon nin tawo, an ikatolo lalawogon nin leon, asin an ikaapat lalawogon nin agila.

¹⁵ (An mga ini pareho kan mga buhay na linalang na nahiling ko sa tampi kan Salog nin Kebar.) Kun minaitaas an mga kerubin,

¹⁶ dangan minahiro, kaiba ninda an mga rweda. Kun minaunat sinda kan saindang mga pakpak sa paglayog, kaiba man ninda an mga rweda.

¹⁷ Pag-ontok kan mga kerubin, minaontok man an mga rweda, asin paglayog ninda, kaiba man ninda an mga rweda, huli ta nasa kapangyarihan ninda an mga ini.

¹⁸ Dangan an kamurawayan kan Kagurangnan naghale sa may palaog kan Templo asin nag-ontok sa ibabaw kan mga kerubin.

¹⁹ Inunat kan mga kerubin an saindang mga pakpak dangan naglayog kaiba an mga rweda, mantang ako naghihiling. Nag-ontok sinda sa may trangkahan sa sirangan kan Templo, asin nasa itaas ninda an kamurawayan kan Dios nin Israel.

²⁰ Namidbid ko na sinda an mga buhay na linalang na nahiling ko sa ibaba kan Dios nin Israel duman sa Salog nin Kebar.

²¹ An lambang kerubin igwa nin apat na lalawogon, apat na pakpak asin mga kamot na garo sa tawo sa irarom kan lambang pakpak.

²² An saindang lalawogon pareho man kan mga lalawogon na nahiling ko sa tampi kan Salog nin Kebar. An lambang saro nagderetso sa enotan.