Ezekiel 1 - Marahay na Bareta Biblia

AN ENOT NA BISYON NI EZEKIEL ( 1:1–7:27 ) An Trono nin Dios

¹ Sa ikalimang aldaw kan ikaapat na bulan kan ikatreyntang taon, kan ako, si Ezekiel na padi, na aking lalaki ni Buzi, nag-eerok duman sa may Salog nin Kebar sa Babilonia kaiba kan mga itinapok na Judio, nabuksan an kalangitan asin nahiling ko an sarong bisyon nin Dios. (

² Iyo idto an ikalimang taon kan pagkatapokan ki Hadeng Jehoiakin.)

³ Duman sa Babilonia, sa tampi kan Salog nin Kebar, nadangog kong nagtataram sako an Kagurangnan, asin namatean ko an saiyang kapangyarihan.

⁴ Nagtingkalag ako asin nahiling ko an sarong bagyo na nagdadangadang hale sa amihan. May kikilat na nagluluwas hale sa sarong dakulang panganoron, asin nagliliwanag nin marahay an palibot kaini. Sa tahaw kan kikilat, igwa nin nagkikintab na garo bronse.

⁵ Sa tahaw kan bagyo, nakahiling ako nin garo apat na buhay na linalang sa porma nin tawo,

⁶ alagad an lambang saro sainda igwa nin apat na lalawogon saka apat na pakpak.

⁷ Unat an saindang mga bitis asin an saindang mga kuku kabaing kan sa sarong torong baka. An mga ini nagkikintab siring sa pinakinang na bronse.

⁸ Laen pa kan apat nindang lalawogon saka apat nindang mga pakpak, igwa pa sinda nin apat na kamot nin tawo, saro sa irarom kan lambang pakpak.

⁹ An duwang pakpak kan lambang linalang nakaunat, kaya an apat na linalang minaporma nin sarong kwadro, huli kan nakaunat na mga pakpak na an mga poro nagdudutaan. Kun minahiro sinda, minahiro sinda bilang sarong grupo maski dai na ninda ibinibirik an saindang mga hawak.

¹⁰ An lambang linalang igwa nin apat na manlaen-laen na lalawogon: lalawogon nin tawo sa atubangan, lalawogon nin leon sa too, lalawogon nin torong baka sa wala, asin lalawogon nin agila sa likod.

¹¹ An duwang pakpak kan lambang linalang nakaunat paitaas asin nakaduta sa poro kan mga pakpak kan kataed na linalang mantang an duwa pang pakpak tiklop na nakakatahob kan saindang hawak.

¹² An lambang linalang nakaatubang sa apat na direksyon, kaya pwede sindang magduman maski saen na dai na kaipuhan pang magbirik.

¹³ Sa tahaw kan mga linalang igwa nin sarong bagay na danay na naghihiro, na garo naglalaad na karaba. An kalayo kaini minapaitaas, asin minapaluwas nin mga kikilat.

¹⁴ Pabalik-balik man na minahiro an mga linalang na arog karikas sa kikilat.

¹⁵ Mantang minamasdan ko an apat na linalang, nakahiling ako nin apat na rweda na nagduduta sa daga, sarong rweda an nasa kataed kan lambang linalang.

¹⁶ Parareho an apat na rweda; an lambang saro nagkikinang siring sa sarong mahalagang bato, asin an pagkagibo kaiyan garo sarong rweda sa laog nin sarong rweda,

¹⁷ kaya an apat na rwedang ini pwedeng magduman saen man na direksyon.

¹⁸ An rim kan mga rweda pano nin mga mata.

¹⁹ Kun minahiro an mga linalang, minahiro man an mga rweda kaiba ninda; kun minapaitaas an mga linalang, siring man an mga rweda.

²⁰ An mga linalang nakakaduman saen man ninda boot magduman, siring man an mga rweda, huli ta an mga ini nasa irarom kan kapangyarihan ninda.

²¹ Kaya kun minahiro an mga linalang, minahiro man an mga rweda; kun minaontok sinda, o minapasiring sa itaas, siring man an gibo kan mga rweda.

²² Sa itaas kan mga payo kan mga linalang, igwa nin sarong garo arko na gibo sa nagkikinang na kristal.

²³ Sa lindong kan arko nagtitindog an mga linalang, na an duwang pakpak kan lambang saro unat pasiring sa kataed niya, mantang an duwang pakpak nakatahob sa saiyang hawak.

²⁴ Nadangog ko an tanog kan saindang pakpak mantang sinda naglalayog; garo idto hagubohob kan dagat, garo ribok nin sarong dakulang hukbo, garo tingog kan Makakamhan na Dios. Kun minaontok sinda sa paglayog, tinitiklop ninda an saindang mga pakpak,

²⁵ alagad igwa pa nin tanog na nadadangog hale sa ibabaw kan arko, sa itaas kan saindang mga payo.

²⁶ Sa ibabaw kan arko igwa nin garo trono na gibo sa safiro; asin nagtutukaw sa trono an sarong garo tawo.

²⁷ Ini garo nagkikinang siring sa bronse sa tahaw nin kalayo. Igwa ini nin nagkikinang na liwanag,

²⁸ na igwa kan gabos na kolor kan bulalangaw. Iyo ini an nakakasulang liwanag na nagpapahiling kan kamurawayan nin Kagurangnan.