Exodo 40 - Marahay na Bareta Biblia

An Pagpatindog asin Pagkonsagra kan Tabernakulo

¹ Nagtaram an Kagurangnan ki Moises,

² “Sa enot na aldaw kan primerong bulan patindogon mo an Tabernakulo.

³ Ilaog mo sa Tabernakulo an Kaban nin Tipan na sinarayan kan Sampolong Togon dangan lipodan mo nin kurtina sa atubangan.

⁴ Ilaog mo an lamesa dangan ibugtak mo an mga kagamitan sa ibabaw. Ilaog mo man an kandelero asin ibugtak mo an mga ilawan sa ibabaw.

⁵ An bulawan na altar na tututongan kan insenso ibugtak mo sa atubang kan Kaban nin Tipan, dangan lipodan mo nin kurtina an pintoan kan Tabernakulo.

⁶ An altar na tututongan kan mga atang ibugtak mo sa atubang kan pintoan kan Tabernakulo,

⁷ asin sa pagultanan kan Tabernakulo saka kan altar ibugtak mo an palangganang hanawan dangan laogan mo nin tubig.

⁸ Patindogon mo an patyo sa palibot, asin lipodan mo nin kurtina an pintoan.

⁹ “Dangan kuahon mo an panlahid na lana, lahidan mo asin konsagrahon an Tabernakulo patin an mga kagamitan kaini, asin ini magigin banal.

¹⁰ Lahidan mo man an altar na tututongan nin atang asin an mga kagamitan; konsagrahon mo an altar asin iyan magigin banal.

¹¹ Lahidan mo man dangan konsagrahon an palangganang hanawan asin an tumbawan.

¹² “Dangan darahon mo si Aaron sagkod an saiyang mga aki sa pintoan kan Tabernakulo, asin karigoson mo sinda.

¹³ Sulotan mo si Aaron kan mga banal na gubing, lahidan mo siya nin lana asin konsagrahon tanganing makapaglingkod siya sako bilang padi.

¹⁴ Darahon mo man an saiyang mga aki asin sulotan mo sinda kan tunika

¹⁵ dangan lahidan mo nin lana, arog kan ginibo mo sa saindang ama, tanganing maglingkod sinda sako bilang mga padi. An banal na paglahid na ini iyo an makonsagra sainda sa daing kataposan na pagpadi sa gabos na henerasyon.”

¹⁶ Ginibo ni Moises an gabos siring sa ipinagboot nin Kagurangnan.

¹⁷ Kaya, sa enot na aldaw kan primerong bulan kan ikaduwang taon pakahale ninda sa Egipto, napatindog an Tabernakulo.

¹⁸ Pinatindog ni Moises an Tabernakulo; ibinugtak niya an mga patungtongan, pinatindog an mga tabla, ikinabit an mga trabisanyo asin pinatindog an mga harigi.

¹⁹ Tinindi niya sa ibabaw kan Tabernakulo an toldang pantahob dangan ibinugtak sa ibabaw kan tolda an tahob kaini, siring sa ipinagboot nin Kagurangnan.

²⁰ Dangan kinua niya an duwang tablang gapo asin ilinaog sa Kaban nin Tipan. Isinurok niya an mga pasanan sa mga siningsing kan Kaban asin tinakopan ini.

²¹ Pakatapos, ilinaog niya ini sa Tabernakulo asin tinindihan kan panlipod na kurtina. Huli kaini nalipodan an Kaban nin Tipan, siring sa ipinagboot nin Kagurangnan.

²² Ilinaog niya sa Tabernakulo an lamesa dangan ibinugtak sa parteng amihan, sa luwas kan kurtina,

²³ asin ibinugtak sa lamesa an tinapay na dolot sa Kagurangnan siring sa ipinagboot nin Kagurangnan.

²⁴ Ilinaog niya sa Tabernakulo an kandelero dangan ibinugtak sa parteng habagat, kahampang kan lamesa,

²⁵ asin duman sa atubang nin Kagurangnan, pinagkotan niya an mga ilawan, siring sa ipinagboot nin Kagurangnan.

²⁶ Ilinaog niya sa Tabernakulo an bulawan na altar sa atubang kan panlipod na kurtina

²⁷ asin tinutong niya sa altar an mahamot na insenso, siring sa ipinagboot nin Kagurangnan.

²⁸ Linipodan niya nin kurtina an pintoan kan Tabernakulo,

²⁹ asin duman sa atubang kan kurtina ibinugtak niya an altar na tututongan nin mga atang. Dangan sa ibabaw kan altar nagdolot siya nin tinutong na atang asin nin dolot na pagkakan, siring sa ipinagboot nin Kagurangnan.

³⁰ Ibinugtak niya an palangganang hanawan sa pagultanan kan Tabernakulo asin kan altar, dangan pinano niya nin tubig an palangganang hanawan.

³¹ Digdi naghanaw kan saindang mga kamot saka mga bitis si Moises asin si Aaron patin an mga aki kaini,

³² kun sinda minalaog sa Tabernakulo o kun sinda minadolok sa altar, siring sa ipinagboot nin Kagurangnan.

³³ Pinatindog ni Moises an patyo sa palibot kan Tabernakulo asin kan altar dangan linipodan niya nin kurtina an pintoan kan patyo. Natapos ni Moises an gabos na trabaho.

An Panganoron sa Ibabaw kan Tabernakulo

³⁴ An Tabernakulo tinahoban kan panganoron asin napano iyan kan nakakasulang liwanag nin Kagurangnan.

³⁵ Huli kaini, dai nakalaog si Moises sa Tabernakulo.

³⁶ Sa bilog nindang pagbaklay, an mga Israelita minapadagos sana sa paglakaw kun minaitaas an panganoron sa ibabaw kan Tabernakulo.

³⁷ Alagad kun dai minaitaas an panganoron, dai sinda minapadagos sa paglakaw.

³⁸ Sa bilog nindang pagbaklay, nahiling kan mga Israelita na an panganoron nin Kagurangnan yaon sa ibabaw kan Tabernakulo kun aldaw, asin kun banggi, yaon an naglalaad na kalayo.