Exodo 37 - Marahay na Bareta Biblia

An Paggibo kan Kaban nin Tipan

¹ An Kaban nin Tipan ginibo ni Bezalel sa kahoy na akasya na may sukol na syento dyes sentimetros an laba, sesenta y seis sentimetros an lakbang asin sesenta y seis sentimetros an langkaw.

² Pinatos niya an laog saka an luwas kaini nin purong bulawan asin binugtakan nin moldurang bulawan sa palibot.

³ Ginibohan niya ini nin apat na siningsing na bulawan asin itinakod sa apat na bitis kaini, duwang siningsing sa mag-ibong na gilid kan Kaban.

⁴ Ginibo niya an mga pasanan na akasya asin pinatos sa bulawan.

⁵ Dangan isinurok niya an mga pasanan sa mga siningsing na bulawan na nasa duwang gilid kan Kaban.

⁶ Ginibo niya an takop sa purong bulawan na may sukol na syento dyes sentimetros an laba asin sesenta y seis sentimetros an lakbang.

⁷ Ginibo niya an duwang kerubin sa pinulpog na bulawan,

⁸ saro sa mag-ibong na poro kan takop. Ginibo niya na magin saro sanang pedaso an duwang kerubin sagkod an takop.

⁹ Naghahampangan an duwang kerubin sa ibabaw kan takop na natatahoban kan nakaunat nindang mga pakpak.

An Paggibo kan Lamesa para sa Tinapay na Dolot sa Dios

¹⁰ Ginibo niya an lamesa sa kahoy na akasya na may sukol na otsenta y otso sentimetros an laba, kwarenta y kwatro sentimetros an lakbang asin sesenta y seis sentimetros an langkaw.

¹¹ Pinatos niya ini nin purong bulawan asin binugtakan nin moldurang bulawan sa palibot.

¹² Naggibo siya nin sanipa na pito may kabangang sentimetros an lakbang asin pinalibotan niya ini nin moldurang bulawan.

¹³ Ginibo niya an apat na siningsing na bulawan dangan ikinabit sa apat na kanto kan lamesa na namumugtakan kan mga bitis.

¹⁴ An mga siningsing na susurokan kan mga pasanan sa pagdara kan lamesa ikinabit niya harani sa sanipa.

¹⁵ Ginibo niya an mga pasanan sa akasya asin pinatos an mga ini nin bulawan.

¹⁶ Ginibo niya sa purong bulawan an mga kagamitan sa lamesa: an mga plato na para sa insenso, an kalis, dulay asin mangko na para sa dolot na arak.

An Paggibo kan Kandelero

¹⁷ Ginibo man niya an kandelero sa purong bulawan. An bitis saka an kahawakan kaini ginibo niya sa pinulpog na bulawan; an dekorasyon na mga burak kaiba an mga bukol asin an mga petalo ginibo niya na magin saro sanang pedaso sagkod an kandelero.

¹⁸ Igwa nin anom na sanga an mag-ibong na gilid kan kandelero, tolong sanga sa lambang gilid.

¹⁹ An lambang sanga igwa nin tolong dekorasyon na burak na arog sa mga bukad na burak nin almendras na may kaibang mga bukol asin mga petalo.

²⁰ An kahawakan kan kandelero igwa nin apat na burak na arog sa mga bukad na burak nin almendras na may kaibang mga bukol asin mga petalo.

²¹ Igwa nin sarong bukol sa irarom kan lambang pades kan anom na sanga.

²² An mga bukol, an mga sanga saka an kandelero ginibo niya sa saro sanang pedaso nin pinulpog na bulawan.

²³ Ginibo niya an pitong ilawan para sa kandelero. An mga pansipit sa mitsa asin an mga bandehado ginibo niya sa purong bulawan.

²⁴ Naggamit siya nin treynta y singko kilos na purong bulawan sa paggibo kan kandelero sagkod kan gabos na kagamitan kaini.

An Paggibo kan Altar nin Insenso

²⁵ Ginibo niya an akasyang altar nin insenso. Ini kwadrado, may sukol na kwarenta y singko sentimetros an laba, kwarenta y singko sentimetros an lakbang asin nubenta sentimetros an langkaw. An mga sungay sa apat na kanto sagkod an mismong altar ginibo niya na magin saro sanang pedaso.

²⁶ Pinatos niya nin purong bulawan an parteng ibabaw, an apat na gilid sagkod an mga sungay, dangan pinalibotan niya nin moldurang bulawan an altar.

²⁷ Ginibohan niya ini nin duwang siningsing na bulawan, na itinakod niya sa duwang gilid sa ibaba kan moldura, tanganing surokan kan mga pasanan na gagamiton sa pagdara kan altar.

²⁸ Ginibo niya an mga pasanan na akasya asin pinatos niya nin bulawan an mga ini.

An Paggibo kan Panlahid na Lana asin kan Insenso

²⁹ Ginibo man niya an banal na lanang panlahid, asin an puro saka mahamot na insenso na sinalak siring sa pahamot.