Exodo 31 - Marahay na Bareta Biblia

An Magiribo kan Tabernakulo

¹ Nagtaram an Kagurangnan ki Moises,

² “Pinili ko si Bezalel, na aking lalaki ni Uri saka makoapo ni Hur na gikan sa tribu ni Juda,

³ asin pinano ko siya kan sakong kapangyarihan. Itinao ko saiya an kakayahan, an pakasabot asin kadonongan sa manlaen-laen na gibo sa arte—

⁴ sa pagdibuho sa bulawan, plata asin sa bronse;

⁵ sa pagtabas nin mga batong pantampok, sa pagdibuho sa kahoy, asin sa iba pang mga gibo sa arte.

⁶ Pinili ko man bilang katabang niya si Oholiab na aking lalaki ni Ahisamak na gikan sa tribu ni Dan. An ibang katabang ninda tinawan ko man nin kakayahan tanganing magibo ninda an gabos na ipinagboot ko saimo:

⁷ an Tabernakulo, an Kaban nin Tipan asin an takop kaini, an gabos na gamit sa Tabernakulo,

⁸ an lamesa dangan an kasangkapan kaiyan, an bulawan na kandelero asin an kasangkapan kaiyan, an altar nin insenso,

⁹ an altar para sa tinutong na atang saka an kasangkapan kaiyan, an palangganang hanawan asin an tumbawan kaini,

¹⁰ an magagayon na gubing kan pading si Aaron sagkod kan saiyang mga aki na gagamiton ninda sa paglingkod sako bilang mga padi,

¹¹ an panlahid na lana, dangan an mahamot na insenso para sa Banal na Lugar. Gigibohon ninda ini gabos siring nanggad sa ipinagboot ko saimo.”

Sabbath, an Aldaw nin Pahingalo

¹² Pinagbotan nin Kagurangnan si Moises

¹³ na sabihan an mga Israelita, “Otobon nindo an Sabbath, an sakong aldaw nin pahingalo, huli ta iyan an tanda para sa sako asin para saindo sagkod sa mga maabot na henerasyon na ako, an Kagurangnan, iyo an nagpili saindo na magin banwaan ko.

¹⁴ Otobon nanggad nindo an aldaw nin pahingalo, huli ta iyan banal. Gagadanon an siisay man na maglapas kaiyan asin magtrabaho sa aldaw na iyan.

¹⁵ Igwa kamong anom na aldaw sa pagtrabaho, alagad an ikapitong aldaw sarong aldaw nin solemning pahingalo, banal para sako. Gagadanon an siisay man na magtrabaho sa aldaw na iyan.

¹⁶ Kaya ootobon kan mga Israelita an Sabbath sa gabos na panahon bilang tanda kan daing kataposan na tipan.

¹⁷ Ini sarong danay na tanda para sako asin para sa banwaan nin Israel, huli ta ako, an Kagurangnan, an naggibo kan langit asin daga sa laog nin anom na aldaw, dangan sa ikapitong aldaw nag-ontok ako sa pagtrabaho asin nagpahingalo.”

¹⁸ Pakataram nin Dios ki Moises duman sa Bukid nin Sinai, itinao niya ki Moises an duwang tablang gapo na sinuratan niya mismo kan mga togon.