Exodo 30 - Marahay na Bareta Biblia

An Altar nin Insenso

¹ “Gumibo kamo nin sarong altar na akasya na tututongan nin insenso.

² Gibohon nindong kwadrado iyan, kwarenta y singko sentimetros an laba, kwarenta y singko sentimetros an lakbang asin nubenta sentimetros an langkaw. An mga sungay sa apat na kanto saka an mismong altar gibohon nindo na magin saro sanang pedaso.

³ Patoson nindo nin purong bulawan an parteng ibabaw, an apat na gilid sagkod an mga sungay, dangan palibotan nindo nin mga moldurang bulawan.

⁴ Gumibo kamo nin duwang siningsing na bulawan na itatakod sa ibaba kan moldura, tanganing surokan kan mga pasanan na gagamiton sa pagdara kan altar.

⁵ Gumibo kamo nin mga pasanan na akasya asin patoson nindo nin bulawan.

⁶ Ibugtak nindo ining altar sa luwas kan kurtina na nasa atubangan kan Kaban nin Tipan, saen tatagboon taka.

⁷ Sa aga-agang pagmangno ni Aaron kan mga ilawan, tututongon niya sa altar an mahamot na insenso.

⁸ Iyo man an gigibohon niya kun banggi sa pagpalaad niya kan mga ilawan. Ining danay na pagdolot nin insenso gigibohon nindo sagkod sa mga maabot na henerasyon.

⁹ An altar na ini dai nindo pagtutongan nin bakong banal na insenso, o nin tinutong na atang, o nin dolot na pagkakan, asin dai nindo ini pag-ulaan nin dolot na arak.

¹⁰ Sarong beses sa taon gigibohon ni Aaron an seremonya nin paglinig kan altar; an mga sungay kaini lalahidan niya kan dugo kan inatang sa pagbayad nin kasalan. Gibohon nindo ini sa gabos na panahon. An altar na ini kaipuhan na magin banal, konsagrado sa sako. Ako an Kagurangnan.”

An Buhis para sa Tabernakulo

¹¹ Nagtaram an Kagurangnan ki Moises,

¹² “Pagsenso mo kan mga Israelita, an lambang saro sa sainda mabalukat kan saiyang buhay tanganing mayo nin maraot na mangyari sa sainda mantang ginigibo an pagsenso.

¹³ An gabos na mabilang sa senso mabayad nin kabangang siklo sosog sa kinaugalean na timbang kan Tabernakulo bilang dolot sako. (An sarong siklo katimbang nin onseng gramong plata.)

¹⁴ An gabos na mabilang sa senso, magpoon sa edad na beynte paitaas, matao kan dolot na ini sako.

¹⁵ An mayaman dai mabayad nin sobra asin an dukha dai man mabayad nin kulang sa kantidad para sa pantubos kan saindang buhay.

¹⁶ An kwartang ini kokolektahon mo sa mga tawo asin gagamiton para sa pag-ataman kan Tabernakulo. Ining buhis iyo an pantubos kan saindang buhay, asin magigiromdoman kong atamanon sinda.”

An Palangganang Hanawan

¹⁷ Nagtaram an Kagurangnan ki Moises,

¹⁸ “Gumibo ka nin bronseng palanggana na igwa nin tumbawan na bronse. Ibugtak mo iyan sa pagultanan kan Tabernakulo saka kan altar. Dangan laogan mo nin tubig

¹⁹ na gagamiton ni Aaron asin kan saiyang mga aki sa paghanaw kan saindang mga kamot saka mga bitis.

²⁰ Kaipuhan maghanaw ngona sinda bago maglaog sa Tabernakulo o bago magdolok sa altar tanganing magdolot nin atang; kun dai, magagadan sinda.

²¹ Kaipuhan nanggad na maghanaw sinda kan saindang mga kamot saka mga bitis tanganing dai sinda magadan. An pagboot na ini kukuyogon ninda asin kan saindang mga kapagarakian sagkod lamang.”

An Panlahid na Lana

²² Nagtaram pa an Kagurangnan ki Moises,

²³ “Kumua ka kan pinakamarahay na mga pahamot: anom na kilong likidong mira, tolong kilo kan mahamot na kanela, tolong kilo kan mahamot na kalamo

²⁴ asin anom na kilong kasia (ini gabos sosog sa kinaugalean na timbang kan Tabernakulo). Kumua ka man nin apat na litrong lana nin oliba,

²⁵ asin siring sa sarong paragibo nin pahamot, saralakon mo iyan tanganing magibong banal na lanang panlahid.

²⁶ Lahidan mo kaiyan an Tabernakulo, an Kaban nin Tipan,

²⁷ an lamesa asin an mga kasangkapan kaiyan, an kandelero sagkod an mga kasangkapan kaiyan, an altar nin insenso,

²⁸ an altar na tututongan kan mga dolot kaiba an mga kasangkapan kaiyan asin an palangganang hanawan patin an tumbawan kaiyan.

²⁹ Konsagrahon mo iyan gabos tanganing magin banal. An ano man na makaduta sa mga iyan, magigin banal man.

³⁰ Dangan lahidan mo kan lana si Aaron sagkod an saiyang mga aki asin konsagrahon mo sinda tanganing maglingkod sako bilang mga padi.

³¹ Sabihan mo an mga Israelita, ‘Ini an sakong magigin banal na lanang panlahid sa gabos na henerasyon.

³² Dai ini ilalahid sa mga ordinaryong tawo asin dai nindo pag-arogon an paggibo kaini. Banal an lanang ini asin kaipuhan na midbidon nindong banal.

³³ An siisay man na maggibo nin lanang arog kaini o maglahid kaini sa bako man padi, dai na ibibilang na kaayon sa sakong banwaan.’”

An Insenso

³⁴ Nagtaram an Kagurangnan ki Moises, “Kumua ka nin parareho kadakul na mga pahamot na estakte, onise, galbano asin purong kamangyan.

³⁵ Siring sa sarong paragibo nin pahamot, saralakon mo iyan tanganing magibong insenso. Asinan mo tanganing magin malinig saka banal.

³⁶ Pulboson mo an dikit kaiyan asin darahon mo sa Tabernakulo dangan ibugtak sa atubang kan Kaban nin Tipan, saen tatagboon taka. Midbidon nindo na orog kabanal an insensong ini.

³⁷ Dai kamo maggibo nin insenso na siring an mga sangkap para sa saindong sadiri. Midbidon nindo na ini banal para sa sako.

³⁸ An siisay man na gumibo nin insenso na arog kaini tanganing gamiton na pahamot, dai na ibibilang na kaayon sa sakong banwaan.”