Exodo 28 - Marahay na Bareta Biblia

Mga Gubing para sa mga Padi

¹ “Ipaapod mo si Aaron na saimong tugang sagkod an saiyang mga aki na si Nadab, Abihu, Eleazar asin si Itamar. Laenon mo sinda sa gabos na Israelita tanganing maglingkod sako bilang mga padi.

² Ipagibo mo si Aaron nin banal na mga gubing tanganing magkaigwa siya nin dignidad asin gayon.

³ Ipaapod mo an gabos na tawong tinawan ko nin kakayahan, asin sabihan mo sinda na gibohon an mga gubing ni Aaron, tanganing konsagrahon siya bilang padi na malingkod sako.

⁴ Ini an mga gubing na gigibohon ninda: pantahob sa daghan, efod, abito, tunikang may burda, mitra asin habay. Ining mga banal na gubing gigibohon ninda para sa tugang mong si Aaron asin para sa saiyang mga aki tanganing maglingkod sinda sako bilang mga padi.

⁵ An mga magibo kan mga gubing magamit nin telang lana na kolor asul, purpura asin pula, nin torsidong bulawan, asin nin pinong lino.

⁶ “Gibohon ninda an efod sa telang lana na kolor asul, purpura asin pula, sa torsidong bulawan, asin sa pinong lino, na binurdahan.

⁷ Pabugtakan mo nin duwang tirante an duwang gilid kan efod tanganing masugpon iyan.

⁸ An efod kakabitan nin habay na gibo man sa telang lana na kolor asul, purpura asin pula, sa torsidong bulawan, asin sa pinong lino.

⁹ Kumua ka nin duwang batong oniks dangan diyan mo iukit an mga ngaran kan doseng aking lalaki ni Jacob,

¹⁰ sosog sa saindang pagkamundag, anom na ngaran sa lambang bato.

¹¹ Gibohon mo ini siring sa marahay na platero asin kalopkopan mo nin bulawan an mga bato.

¹² Dangan ikabit mo ini sa tirante kan efod bilang paggiromdom sa doseng tribu nin Israel. Sa siring na paagi, dadarahon ni Aaron an saindang mga ngaran sa saiyang mga abaga sa atubang ko tanganing ako, an Kagurangnan, danay na makagiromdom sa sakong banwaan.

¹³ Gumibo ka nin duwang kalopkop na bulawan

¹⁴ saka duwang kadena nin purong bulawan na sinalapid, asin ikabit mo an mga kadenang ini sa mga kalopkop.

An Pantahob sa Daghan

¹⁵ “Gumibo kamo nin pantahob sa daghan na gagamiton kan Halangkaw na Padi sa pagsabot kan kabotan nin Dios. Gibohon nindo iyan sa parehong materyales na ginamit sa paggibo kan efod asin burdahan arog kan efod.

¹⁶ Gibohon nindong kwadrado an tiniklop na pantahob sa daghan na may sukol na, beynte y dos sentimetros an laba asin beynte y dos sentimetros an lakbang.

¹⁷ Tampokan ini nin apat na raya nin mga bato: sa enot na raya, itampok nindo an mga batong rubi, topasyo asin karbungko;

¹⁸ sa ikaduwang raya, an mga batong esmeralda, sapiro asin brilyante;

¹⁹ sa ikatolong raya, an mga batong jacinto, agata asin ametista;

²⁰ dangan sa ikaapat na raya, an mga batong berilo, oniks asin haspe. Ini gabos itatampok sa mga kalopkop na bulawan.

²¹ Doseng bato an uukitan nindo kan mga ngaran kan mga aki ni Jacob. An lambang bato uukitan nin sarong ngaran, bilang tanda kan doseng tribu nin Israel.

²² Gumibo kamo para sa pantahob sa daghan nin duwang kadenang purong bulawan na sinalapid.

²³ Gumibo man kamo nin duwang siningsing na bulawan asin ikabit nindo sa duwang itaas na kanto kan pantahob sa daghan,

²⁴ dangan igakod nindo sa duwang siningsing na ini an duwang kadenang bulawan.

²⁵ An duwa pang poro kan kadenang bulawan igakod nindo sa duwang kalopkop na nasa tirante kan efod sa atubangan.

²⁶ Dangan gumibo kamo nin duwang siningsing na bulawan asin ikabit sa duwang ibabang kanto kan pantahob sa daghan, sa parteng irarom na harani sa efod.

²⁷ Gumibo pa kamo nin duwang siningsing na bulawan dangan ikabit nindo sa atubangan, sa parteng ibaba kan tirante kan efod, sa sinugponan na nasa itaas kan habay.

²⁸ Gagakodan ninda nin pising asul an mga siningsing kan pantahob sa daghan asin an mga siningsing kan efod tanganing an pantahob sa daghan dai masiblag sa efod kundi makatakod asin mapamugtak sa itaas kan habay.

²⁹ “Paglaog ni Aaron sa Banal na Lugar, isusulot niya an pantahob sa daghan, na nauukitan kan ngaran kan mga aki ni Jacob tanganing ako, an Kagurangnan danay na makagiromdom sa sakong banwaan.

³⁰ Ilaog nindo sa pantahob sa daghan an Urim asin Tummim tanganing mamugtak sa daghan ni Aaron kun minadolok siya sa atubangan ko. Kaya danay na isusulot ni Aaron an pantahob sa daghan tanganing maaraman niya an sakong kabotan para sa banwaan nin Israel.

An iba pang Gubing kan Padi

³¹ “An abito kan efod gibohon nindo sa telang lana na kolor asul.

³² Bugtakan nindo nin labot na sulotan kan payo, asin an palibot kan labot tahian nindo nin hinabol na pambilit tanganing dai magisi.

^33-34 An gayad kan abito kabitan nindo nin mga granadang gibo sa telang lana na kolor asul, purpura asin pula. Sa lambang pagultanan kan duwang granada bugtakan nindo nin kampanilyang bulawan.

³⁵ Isusulot ni Aaron an abitong ini kun naglilingkod siya bilang padi. Paglaog asin pagluwas niya sa Banal na Lugar, madadangog an tanog kan mga kampanilya, kaya dai siya gagadanon.

³⁶ “Gumibo ka nin koronang anas na bulawan dangan iukit mo diyan ining mga tataramon, ‘Konsagrado sa Kagurangnan.’

³⁷ An koronang ini ikakabit nindo sa atubangan kan mitra; asul na lubid an gamiton nindo.

³⁸ Mamumugtak ini sa angog ni Aaron; siya an maako kan anoman na nagibong kasalan sa pagdolot kan mga tawo kan saindang atang. Danay na mamumugtak sa angog ni Aaron an koronang ini tanganing akoon ko an saindang atang.

³⁹ “An tunika saka an mitra gibohon nindo sa hinabol na pinong lino, asin gumibo man kamo nin sarong habay na binurdahan.

⁴⁰ “An mga aki ni Aaron igibo nindo nin mga abito, mga habay asin mga turban tanganing magkaigwa sinda nin dignidad asin gayon.

⁴¹ Gubingan mo kaiyan si Aaron na saimong tugang asin an saiyang mga aki, dangan lahidan mo sinda nin lana, ordenan saka konsagrahon, tanganing maglingkod sinda sako bilang mga padi.

⁴² Ipagibo mo sinda nin linong sarwal na sagkod sa paa tanganing matahoban an saindang pagkanihuba.

⁴³ Kun maglaog sa Tabernakulo si Aaron saka an saiyang mga aki, o magdolok sinda sa altar tanganing maglingkod sa Banal na Lugar, masulot sinda kan sarwal tanganing dai sinda magkasala huli sa pagkanihuba asin magadan. Ini sarong danay na pagboot para ki Aaron sagkod sa mga kapagarakian niya.