Exodo 23 - Marahay na Bareta Biblia

Mga Pagsusundon Manongod sa Katanosan

¹ “Dai ka mag-istorya nin bakong totoo. Dai mo pagtabangan sa paagi nin pagputik an tawong may sala.

² Dai ka magsunod sa kadaklan kun minagibo sinda nin sala o kun minasaksi sinda nin putik tanganing mabiko an hustisya.

³ Dai ka magpahiling nin pagpaorog sa sarong dukha kun binibista siya.

⁴ “Kun mahiling mo na nakabutas an baka o an asno nin saimong kaiwal, ibalik mo iyan saiya.

⁵ Kun mahiling mong napalugmok an asno kan sarong naanggot saimo huli sa gabat kan karga, tabangan mo siya na mapabuhat giraray iyan; dai mo siya pagpabayaan.

⁶ “Itao mo an hustisya sa tawong dukha kun siya mag-atubang sa husgado.

⁷ Dai ka magtugod-tugod; dai mo paggadanon an tawong mayong sala asin matanos, huli ta dai ko paliligtason an may sala.

⁸ Dai ka mag-ako nin suhol, huli ta an suhol nakakabuta sa tawo asin nakakapadaog sa mga tawong mayong sala.

⁹ “Dai mo pagdaog-daogon an sarong dayuhan; aram mo an namamatean niya, huli ta ika nagin dayuhan man sa daga nin Egipto.

An Ikapitong Taon asin an Ikapitong Aldaw

¹⁰ “Anom na taon kamong magtatanom sa saindong daga asin mag-aani kan bunga kaiyan.

¹¹ Alagad sa ikapitong taon pabayaan nindo an daga asin dai nindo pag-anihon an ano man na magtalubo diyan tanganing may makakan an mga dukha, asin an matada makakan kan mga lalaw na hayop. Arog man kaiyan an saindong gibohon sa saindong ubasan saka olibahan.

¹² “Magtrabaho kamo sa laog nin anom na aldaw alagad sa ikapitong aldaw magpahingalo kamo, tanganing makapahingalo man an saindong mga oripon saka an mga dayuhan, dangan mahingaloan man an saindong mga hayop.

¹³ “Dangoga nindo an gabos kong itinaram. Dai kamo mamibi sa ibang mga dios; maski an saindang ngaran dai nanggad nindo pagsambiton.

An Tolong Darakulang Pyesta

¹⁴ “Sa laog nin sarong taon, tolong beses na maselebrar kamo nin pyesta para sako.

¹⁵ Selebraron nindo an Pyesta nin Tinapay na Mayo nin Lebadura. Siring sa ipinagboot ko saindo, pitong aldaw kamong dai magkakan nin tinapay na igwa nin lebadura sa bulan nin Abib, huli ta ini an bulan kan paghale nindo sa Egipto. Dai nin siisay man na magdolok sako na mayong darang dolot.

¹⁶ “Selebraron nindo an Pyesta nin Pag-ani pagpoon kan saindong pag-ani kan mga bunga nin saindong kapagalan, nin saindong tinanom sa oma. “Sa kataposan kan taon selebraron nindo an Pyesta nin mga Harong-harong kun gunoon na nindo asin tiponon an mga bunga kan saindong ubasan, asin kan iba pang mga kahoy.

¹⁷ Tolong beses sa sarong taon, an gabos nindong lalaki maatubang sako, sa Kagurangnan Dios.

¹⁸ “An hayop na iaatang nindo sako dai nindo pag-ibahan nin tinapay na igwa nin lebadura o pagpaagahan an taba kan hayop na para sa pyesta.

¹⁹ “Taon-taon dadarahon nindo sa harong nin Kagurangnan na saindong Dios an pinakamarahay sa mga enot na bunga kan saindong daga. “An ogbon na karnero o kanding dai nindo paglutoon sa gatas nin saiyang ina.

Mga Panuga asin mga Katukdoan

²⁰ “Susugoon ko an sarong anghel na mangengenot saindo tanganing bantayan kamo sa dalan asin tanganing darahon kamo sa lugar na sakong inandam.

²¹ Magdangog kamo saiya asin magsunod sa gabos niyang sasabihon. Dai nindo siya pagkontrahon huli ta sugo ko siya, asin dai niya papatawadon an saindong pagkakasala.

²² Alagad kun sunodon nindo siya asin gibohon an gabos kong itinaram, lalabanan ko an gabos nindong kaiwal.

²³ Mangengenotan sa saindo an sakong anghel pasiring sa daga kan mga Amoreo, Heteo, Perezeo, Cananeo, Heveo asin Jebuseo dangan paparaon ko sinda gabos.

²⁴ Dai kamo magduko o magsamba sa saindang mga dios-dios, o mag-arog kan saindang mga ginigibo. Raoton nindo an saindang mga dios-dios asin gabaon nindo an saindang mga banal na hariging gapo.

²⁵ Kun ako, an Kagurangnan na saindong Dios, iyo sana an saindong sasambahon, bebendisyonan ko an saindong pagkakan asin inomon; dangan hahaleon ko saindo an gabos na helang.

²⁶ Sa saindong banwaan mayo nin babae na makukuahan o magigin baog. Tatawan ko kamo nin halawig na buhay.

²⁷ “Gigibohon ko na matakot sako an mga tawo na makontra sa saindo. Riribongon ko an mga banwaan na lalabanan nindo dangan masibog sinda saka madulag.

²⁸ Mapadara ako nin mga kutakti na iyo an mapahale sa mga Heveo, Cananeo, asin mga Heteo mantang naglalaog kamo sa saindang daga.

²⁹ Dai ko sinda papahaleon sa laog sana nin sarong taon huli ta kun gibohon ko iyan, mawawaraan nin tawo an daga asin magigin kadakul para sa saindo an lalaw na mga hayop.

³⁰ Mantang naglalaog kamo, dikit-dikit ko sana sindang papahaleon, sagkod na dakul na kamo tanganing sadirihon an daga.

³¹ Ibubugtak ko an mga kasagkoran kan saindong daga magpoon sa Salog nin Eufrates sagkod sa Dagat na Pula, asin magpoon sa kalangtadan sagkod sa Dagat nin Mediteraneo. Ibubugtak ko sa saindong mga kamot an mga nag-eerok sa daga asin papahaleon nindo sinda mantang naglalaog kamo sa daga.

³² Dai kamo makipagtipan sa sainda o sa saindang mga dios-dios.

³³ Dai nindo sinda pagtugotan na mag-erok sa saindong daga huli ta kun magtugot kamo, papagkasalaon ninda kamo sa sakuya; iyan an magigin siod sa saindo kun sambahon nindo an saindang mga dios-dios.”