Exodo 20 - Marahay na Bareta Biblia

An Sampolong Togon

¹ Nagtaram an Dios, asin ini an saiyang mga tataramon:

² “Ako an Kagurangnan na saindong Dios na nagdara saindo sa luwas kan daga nin Egipto, sa luwas kan harong nin kaoripnan.

³ “Dai kamo nin ibang dios na sasambahon kundi ako sana.

⁴ “Dai kamo maggibo nin ladawan kan ano man na nasa langit o nasa daga o nasa tubig sa irarom kan daga.

⁵ Dai kamo magduko sa mga dios-dios o magsamba sa sainda, huli ta ako an Kagurangnan na saindong Dios, sarong maimon na Dios. Pinapadusahan ko an mga naoongis sako pati an saindang mga aki sagkod sa ikatolo saka sa ikaapat na henerasyon.

⁶ Alagad ipinapahiling ko an danay kong pagkamoot sa rinibong henerasyon kan mga namomoot sako asin nag-ootob kan sakong mga togon.

⁷ “Dai nindo paggamiton an sakong ngaran nin basang lamang, huli ta ako, an Kagurangnan na saindong Dios, mapadusa sa kiisay man na magbasang-basang kan sakong ngaran.

⁸ “Giromdoma nindo an Sabbath asin pakabanala nindo iyan.

⁹ Igwa kamo nin anom na aldaw tanganing gibohon an saindong mga trabaho,

¹⁰ alagad an ikapitong aldaw, sarong aldaw nin pahingalo na talaan para sako. Sa aldaw na iyan, mayo nin siisay man saindo na magtrabaho—kamo, an saindong mga aki, an saindong mga oripon, an saindong mga hayop o an mga dayuhan na nag-eerok sa saindong banwa.

¹¹ Huli ta sa anom na aldaw ginibo ko an daga, an langit, an kadagatan sagkod an gabos na yaon diyan, alagad sa ikapitong aldaw, nagpahingalo ako. Kaya benendisyonan ko an Sabbath asin pinabanal iyan.

¹² “Galangan nindo an saindong ama asin ina, tanganing mabuhay kamo nin halawig sa dagang itatao ko sa saindo.

¹³ “Dai kamo maggadan.

¹⁴ “Dai kamo magdorog sa bako nindong agom.

¹⁵ “Dai kamo maghabon.

¹⁶ “Dai kamo magsaksi nin putik laban sa saindong kapwa.

¹⁷ “Dai kamo maara sa harong kan ibang tawo; dai kamo maara sa saiyang agom, sa saiyang mga oripon, asin sa saiyang mga baka, mga asno o sa ano man na pagsadiri niya.”

Natakot an mga Tawo

¹⁸ Kan madangog kan mga tawo an daguldol saka an tanog kan trompeta asin kan mahiling ninda an kikilat sagkod an nag-aasong bukid, nagtarakig sinda sa takot; kaya nagtirindog sinda sa harayo.

¹⁹ Nagsarabi sinda ki Moises, “Ika an magtaram samo asin madangog kami; alagad dai mo pagpataramon samo an Dios huli ta tibaad magadan kami.”

²⁰ Nagsimbag si Moises, “Dai kamo matakot; huli ta an Dios napadigdi sa pagbalo sa saindo. Boot niyang magkaigwa kamo nin takot sa saiya tanganing dai kamo magkasala.”

²¹ Alagad padagos na nagtindog sa harayo an mga tawo; si Moises sana an nagdolok sa mahibog na panganoron saen yaon an Dios.

Mga Togon Manongod sa mga Altar

²² Nagboot an Kagurangnan ki Moises na taraman an mga Israelita, “Nahiling nindo kun paano ako, an Kagurangnan, nagtaram sa saindo hale sa langit.

²³ Dai kamo maggibo nin mga dios-dios na plata o bulawan na sasambahon bilang dugang sa sako.

²⁴ Gumibo kamo nin altar na daga para sako; sa ibabaw kaiyan idolot nindo an saindong karnero saka an saindong baka bilang tinutong na atang asin atang para sa katoninongan. Sa lambang lugar na pinili ko na pagsasambahan nindo sako, madatong ako dangan bebendisyonan ko kamo.

²⁵ Kun maggibo kamo nin altar na gapo para sako, dai kamo maggamit nin sinapsapan na gapo, huli ta kun gamitan nindo nin pansapsap an gapo, bako na iyan maninigo para sako.

²⁶ Dai nindo ako ipaggibo nin altar na may mga tangga, huli ta kun magsakat kamo diyan, mahihiling an saindong pagkanihuba.