Exodo 19 - Marahay na Bareta Biblia

An mga Israelita sa Bukid nin Sinai

^1-2 Naghale sa Refidim an mga Israelita asin nakaabot sinda sa kalangtadan nin Sinai sa enot na aldaw kan ikatolong bulan pakahale ninda sa Egipto. Nagkampo sinda sa pamitisan kan bukid.

³ Nagtukad si Moises sa bukid tanganing tuparon an Dios. Inapod siya nin Kagurangnan hale sa bukid asin tinaraman, “Sabihan mo an mga kapagarakian ni Jacob, an banwaan nin Israel:

⁴ Nahiling nindo kun ano an ginibo ko sa mga Egipcio asin kun paano ko kamo dinara sa sakuya siring sa pagdara kan agila sa saiyang siwo sa ibabaw nin saiyang pakpak.

⁵ Kaya ngunyan, kun susunodon nindo ako asin kun ootobon nindo an sakong tipan, pipilion ko kamo bilang sadiri ko sa gabos na banwaan huli ta rogaring ko an bilog na kinaban.

⁶ Kamo magigin kahadean nin mga padi asin sarong banal na nasyon para sa sako. Ini an itaram mo sa mga Israelita.”

⁷ Kaya naghilig si Moises asin tiniripon an mga lider nin Israel dangan sinabihan kan gabos na ipinagboot saiya nin Kagurangnan.

⁸ Sarabay na nagsimbag an mga tawo, “Gigibohon mi an gabos na itinaram nin Kagurangnan,” asin ibinareta ni Moises sa Kagurangnan an simbag kan mga tawo.

⁹ Nagtaram an Kagurangnan ki Moises, “Madolok ako saimo sa mahibog na panganoron, tanganing madangog kan mga tawo an pagtaram ko saimo, asin tanganing sagkod lamang magtubod sinda sa saimo.” Ibinareta ni Moises sa Kagurangnan an simbag kan mga tawo.

¹⁰ Tinaraman siya nin Kagurangnan, “Magduman ka sa mga tawo asin sabihan mo na maglinig sinda ngunyan sagkod sa aga. Palabahan mo sainda an saindang mga gubing

¹¹ asin mag-andam sinda sa ikatolong aldaw; huli ta sa aldaw na iyan mahilig ako sa Bukid nin Sinai tanganing mahiling kan mga tawo.

¹² Bugtakan mo nin kasagkoran sa palibot kan bukid na dai dapat lampasan kan mga tawo, asin sabihan mo sinda na dai magtukad o magrani sa bukid. An maggibo kaiyan, gagadanon;

¹³ mayo nin magduta saiya alagad dapat siyang gapoon o panaon. Tawo man o hayop, dapat na gadanon. Pagtanog kan trompeta, dangan na magrani sa bukid an mga tawo.”

¹⁴ Naghilig sa bukid si Moises asin pinaandam an mga tawo para sa pagsamba. Kaya linabahan ninda an saindang mga gubing.

¹⁵ Sinabihan sinda ni Moises, “Magin andam kamo sa ikatolong aldaw; mayo ngona nin magdorog.”

¹⁶ Pagkaaga kan ikatolong aldaw, nagkaigwa nin daguldol saka kikilat, nagtunga sa bukid an sarong mahibog na panganoron asin nadangog an makosog na tanog kan trompeta. An gabos na tawo sa kampo nagtarakig sa takot.

¹⁷ Dinara ni Moises sa luwas kan kampo an mga tawo tanganing magsabat sa Dios; nagtindog sinda sa pamitisan kan bukid.

¹⁸ Napatos nin aso an bukid huli ta naghilig duman an Kagurangnan sa porma nin kalayo. Nag-itaas an aso arog sa aso nin sarong horno asin naglinog nin makosog an bilog na bukid.

¹⁹ Mantang orog na nagkokosog an tanog kan trompeta, nagtaram si Moises, asin sinimbag siya nin Dios sa daguldol.

²⁰ Huminilig an Kagurangnan sa alitoktok kan bukid asin inapod niya si Moises, kaya nagtukad ini.

²¹ Tinaraman siya nin Kagurangnan, “Maghilig ka asin patanidan mo an mga tawo na dai maglampas sa kasagkoran sa paghiling sako. Kun gibohon ninda iyan, dakul sainda an magagadan.

²² Maski an mga padi na minadolok sako kaipuhan magpakabanal man; kun dai, papadusahan ko sinda.”

²³ Nagsabi si Moises sa Kagurangnan, “Dai pwedeng magtukad an mga tawo huli ta nagboot ka samo na midbidon na banal an bukid asin bugtakan nin kasagkoran an palibot.”

²⁴ Nagtaram an Kagurangnan, “Maghilig ka asin ipag-iba mo digdi si Aaron. Alagad dai mo pagtugotan an mga padi asin an mga tawo na maglampas sa kasagkoran tanganing makarani sako; kun gibohon ninda iyan, papadusahan ko sinda.”

²⁵ Naghilig si Moises asin sinabihan an mga tawo.